1 Yohanes 2:15 - Porjanjian Boharu Torjomahan Baso Dilakng Soari-ari

¹⁵ Jangan moncintai dunia ni'in damo lapo pan inyo ado di dalapm dunia ni'in. Aman urakng moncintai dunia, rotinyo io co moncintai Allah Bopai.

1 Yohanes 2:15 ပူးပေါင်းရင်းမြစ်များ

Matius 4:8

Lopas nian Rajo Sitatn moirikan Yesus botula' ko pucu' bukit inyo kotakan tinggi. Rajo Sitatn monunju'an ko Sio somuo koraja'an di dunia agatn somuo kodampuannyo.

Matius 6:24

“Co mungkitn siku' urakng hulutn bokorojo pakai' duo urakng habakng. Aman io molabuhan hal nantai, io bayo paca'an mongasihi salah siku' habakngnyo apo bonci' agatn inyo siku'nyo. Io bayo paca'an sotia ko siku' habakng, apo kinyo sotia agatn inyo siku'nyo. Ubo nian jam agatn kaitn. Co mungkitn kaitn monjadi hulutn Allah huatan co mungkitn monjadi hulutn kodampuan kaitn.”

Lukas 16:13

Co mungkitn siku' hulutn molayati duo habakng. Aman io molabuhan hal nantai, io paca'an bayo mongasihi salah siku' habakng apo mombonci' io siku'nyo. Io paca'an bayo taat ko siku' habakng, apo co taat ko io siku'nyo. Ubo nian jam kaitn. Co mungkitn kaitn monjadi hulutn Allah timpu inyo samo kaitn pan monjadi hulutn kodampuan.”

Yohanes 15:19

Soandainyo kaitn ija' bosatu agatn boko urakng di dunia, pasti sia' mongasihi kaitn obai sokolompok agatn sia'. Apo, kaitn co bosatu agatn boko urakng di dunia. Aku udah momilih kaitn doi' sia'. Nantai sobabnyo sia' bonci'an kaitn.

Roma 12:2

Jangannam kaitn tontuyutan kolaku'an boko urakng bukai di dunia ni'in. Apo biar Allah morubah pomikiran kaitn monjadi boharu. Agatn ubo nantai, kaitn ulih mongotohu'i la'apo inyo Allah kohonda'i, ia'an lapo inyo boi', la'apo inyo monyonangan Sio, huatan la'apo inyo sompurna.

Galatia 1:10

Agatn pomandiran nantai, udah jolas aku kinyo bousaha monyonangan monsio. Aku bayo bousaha monyonangan hati Allah mo! Soandainyo aku bousaha monyonangan monsio, nantai paca'an bulah aku co agi' monjadi hulutn umputn Rajo Inyo Dijanjian Allah.

Efesus 2:2

Watu nantai, caro hidup kaitn samo sama'an boko urakng di dunia ni'in inyo kinyo mongonal Allah. Kaitn tuyut Rajo Sitatn inyo bokuaso di langit di pucu' somuo kuaso jahat. Io ia'an roh inyo bokorojo dalapm hati boko urakng inyo kinyo monaati Allah.

1 Timotius 6:10

Jadi, kaha'-kolobu' agatn duit bulah urakng molabuhan somuo macapm kojahatan. Ado boko urakng inyo udah kaha'-kolobu' agatn duit. Obai nantai, sia' udah co pocayo agi' ko Yesus. Sia' bulah diri sia' siku' ajab sonsaro. Samo sama'an sia' monuhu' diri sia' siku' agatn sundakng.

Yakobus 1:27

Apo ninam sombayakng inyo monyonangan Allah Bopai kito. Ia'an io borotian pondorita'an boko bobia' kumang ongko boko urakng balu janda, lalu monulukng sia'. Io pan monjago diri oca' boko hal jahat di dunia ni'in kinyo mompongaruhi io.

Yakobus 4:4

Kaitn co sotia ko Allah samo sama'an siku' urakng inyo bomporajoan rotinyo co sotia ko pasakannyo. Kaitn gola' mongotohu'i ni'in: Boko urakng inyo moncintai kosonangan di dunia ni'in, sia' monjadi musuh Allah. Jadi, aman kaitn moncintai kosonangan di dunia ni'in, rotinyo kaitn monjadi musuh Allah.

1 Yohanes 3:17

Sopo pan inyo hidupnyo dampu, huatan io pan moniant somadikannyo jaro uyuh, apo io co honda' monulukng urakng nantai, ubo apo kasih Allah ado dalapm dirinyo!

1 Yohanes 4:5

Boko nabi palsu nantai boasal doi' dunia ni'in. Obai nantai, sia' bopandir mongona'i boko hal inyo ado di dunia ni'in huatan boko urakng inyo ado di dunia ni'in pocayo ko sia'.

1 Yohanes 5:10

Urakng inyo pocayo ko Ana' Allah, boroti io pocayo agatn kosasian Allah nantai dalapm hatinyo. Apo urakng inyo co pocayo agatn kosasian nantai, boroti io moanggap Allah bulah kotumbukan. Obai, io kinyo pocayo agatn kosasian Allah mongona'i Ana'-Nyo.