1 Timotius 6:19 - Porjanjian Boharu Torjomahan Baso Dilakng Soari-ari

¹⁹ Aman sia' molabuhan somuo nantai, sia' paca'an mondapat'an kodampuan di sorugo. Kodampuan nantai pasti huatan kinyo paca'an rusa', samo sama'an rumah agatn pondasi inyo kuat co paca'an rusa'. Sia' gola' molabuhan somuo nantai oca' sia' mondapat'an hidup inyo somombondarannyo.

1 Timotius 6:19 ပူးပေါင်းရင်းမြစ်များ

Matius 19:21

Kato Yesus ko io, “Aman kolai honda' monaati Allah agatn boi', pulakngcam, jual somuo umputn kolai. Lalu pombagi-bagian duitnyo ko boko urakng jaro. Agatn ubo nian, kolai paca'an bodapat kodampuan di sorugo. Lopas kolai molabuhan somuonyo nantai, datakngcam agi' ko si'itn, lalu tuyut Aku cam”

Lukas 12:33

Jadi, jualcam umputn kaitn. Ongko onju'cam duitnyo ko boko urakng jaro. Aman kaitn molabuhan hal nantai, samo sama'an kaitn bulah somacapm dompet di sorugo pakai' diri kaitn. Dompet nantai co rusa' somanah-manahnyo. Kodampuan di sorugo nantai, kinyo paca'an habis. Conyiant pongolit inyo ulih mongolitnyo. Conyiant gogat inyo ulih morusa'annyo.

Lukas 16:25

Apo Abrahapm bopandir, ‘Ana'ku, ingant watu di dunia, kolai monorima' hidup inyo boonsu'an apo Lazarus monorima' hidup inyo ajab sonsaro. Ni'in, io sonang apo kolai ajab sonsaro.

Lukas 16:9

Dinga'anbo ni'in: Soharusnyo kaitn momakai kodampuan di dunia ni'in pakai' monulukng urakng bukai, oca' watu kodampuan nantai kinyo boguno agi', kaitn ditorima' dalapm sorugo.

Lukas 18:2

Kato-Nyo, “Ado siku' urakng hakipm. Hakipm nantai diapm di sobuah kota. Io kinyo gola' agatn Allah, io pan co tonturian agatn urakng bukai.

Lukas 18:22

Mondingaꞌ nantai, Yesus bopandir ko io, “Ongkah ado sobuti' agi' inyo kurakng bolupm kolai labuhan. Pulakngcam, jual somuo umputn kolai. Ongko pombagi-bagian duitnyo ko boko urakng jaro. Aman dipulah samaꞌan nian, kolai tajahan bodapat kodampuan di sorugo. Lopas jadi kolai molabuhan somuo nantai, datakng jam agi' ko Aku, pakai' jadi murid-Ku.”

Galatia 5:6

Obai, hal bosunant kata'an kinyo bosunant co nyiant bedanyo di kito inyo ado di dalapm Kristus Yesus. Inyo pontikng ia'an aman kito pocayo ko Yesus huatan kopocaya'an nantai monyurukan kito pakai' mongasihi urakng bukai.

Efesus 3:17

Agatn sama'an nantai Kristus hala diapm dalapm hati kaitn obai kaitn pocayo ko Sio. Kasih-Nyo monjadi dasar kohidupan kaitn huatan mombulah kaitn mongkitn kuat.

Filipi 3:12

Aku co bomasud aku udah moncapai tujuan nantai! Memang aku bolupm sompurna. Apo aku hala bousaha pakai' moncapai tujuan nantai. Obai, nantaiam hajat Kristus Yesus bagiku timpu Sio moningkau ku monjadi umputn-Nyo.

Filipi 3:14

Aku samo sama'an urakng dalapm polomba'an inyo bonggidi'an oca' mondapat'an hadiahnyo. Hadiahku ia'an Allah moningkauku pakai' hidup bosamo agatn Sio di sorugo. Nantai ulih tojadi ongkah obai Kristus Yesus.

1 Timotius 6:12

Samo sama'an urakng bouyuh-jorih dalapm potandikan, kolai pan gola' bouyuh-jorih oca' kolai pagutn pocayo lalu mondapat'an hidup inyo somanah-manahnyo di sorugo. Pakai' hal nantaiam kolai udah ditingkau huatan udah mongatoan di hadapan urakng banya' obai kolai pocayo ko Yesus.

2 Timotius 1:1

Ko Timotius: inyo sobondarannyo kuanggap sama'an ana'ku siku'. Salapm doi' aku, Paulus. Allah monyiuh aku monjadi rasul Yesus Kristus, Rajo Inyo Dijanjian Allah. Allah pan monyiuh aku momboritoan mongona'i janji Sio, huatan Sio bojanji aman sotiap urakng pocayo ko Kristus Yesus, io paca'an mondapat'an hidup inyo somanah-manahnyo di sorugo. Aku bodoa oca' Allah Bopai huatan Kristus Yesus, Tuhatn kito inyo bokuaso monunju'an koboi'an-Nyo ko kolai, monunju'an jam kasih sayang-Nyo ko kolai, moonji'i jam sonang-asau ko kolai.

2 Timotius 2:19

Apo Allah bulah pondasi inyo kuat, inyo kinyo toguyakng. Di pucu' pondasi nantai totulis, “Tuhatn mongonal boko urakng inyo bondar-bondar umputn Sio,” huatan “Urakng inyo bopandir aman io nantai umputn Allah, urakng nantai gola' botongga' molabuhan inyo jahat.”

1 Petrus 1:4

Ia'an kito ulih boharap agatn kuat obai kito paca'an monorima' borokat inyo Allah janjian. Borokat nantai disimpatn di sorugo pakai' kaitn. Borokat nantai tahatn bondar, kinyo tohu rusa', kinyo tohu buru', kinyo tohu kusap.