1 Timotius 4:16 - Porjanjian Boharu Torjomahan Baso Dilakng Soari-ari

¹⁶ Jagocam diri kolai oca' kolai hidup agatn caro inyo boi' huatan oca' kolai mongajar boko ajaran inyo bondar. Totap labuhan somuonyo nantai agatn sotia. Agatn caro nantai, Allah paca'an monyolamant'an kolai huatan monyolamant'an boko urakng inyo mondinga'an ajaran kolai.

1 Timotius 4:16 ပူးပေါင်းရင်းမြစ်များ

Titus 1:9

Io pan gola' bobondar pocayo Kabar Boi' inyo kito ajaran ko io, ia'an ajaran inyo bondar huatan ulih dipocayo. Io gola' bobondar pocayo tohadap ajaran nantai oca' io mampu momadahi ongko moonji'i somangant ko urakng bukai pakai' monaati ajaran inyo bondar nantai. Io gola' bobondar pocayo oca' io pan ulih monunju'an ko urakng inyo molawatn ajaran nantai, obai sia' salah.

Titus 2:7

Titus, kolai gola' bulah koboi'an oca' kolai monjadi contoh pakai' somuo sia'. Sotiap kali kolai mongajar, ajaricam agatn hati inyo bujur bondar. Ajaricam agatn caro inyo cucu' pakai' dihormati.

2 Timotius 4:2

Boritoancam pomandiran Allah! Boritoancam agatn torus-monorus sotiap watu. Tulukngcam boko urakng oca' mongomboi'i caro hidupnyo. Olikancam urakng inyo bulah kosalahan. Padahicam huatan onji'i somangant ko boko urakng oca' hala bulah koboi'an. Labuhancam somuo nantai agatn sabar. Labuhancam somuonyo nantai kapikng mongajar Pomandiran Allah.

Efesus 4:14

bukainyo sama'an boko bobia' agi' inyo mudah ditipu agatn somuo macapm ajaran inyo salah. Kito kinyo pocayo ko boko urakng licik nantai inyo honda' mombulah urakng monjadi sosat.

Ibrani 13:9

Jangan tontuyutan boko bomacapm ajaran molikahan inyo mombulah kaitn sosat. Obai, inyo boi' ia'an hati kaitn monjadi kuat doi' kasih karunia Allah, bukainyo doi' boko poraturan mongona'i pomakatn. Boko poraturan nantai kinyo ado gunonyo pakai' boko urakng inyo moikutinyo.

Ibrani 12:15

Bojojagocam oca' jangan ado siku' urakng pan di antaro kaitn inyo moninggalan kasih karunia Allah. Aman ado urakng inyo molabuhan nantai, io monjadi samo sama'an tontanaman agatn buah inyo pohit huatan boracutn. Io morusa' kosatuan kaitn ongko mombulah urakng banya' mombulah dosa.

2 Timotius 3:14

Apo kolai gola' totap pocayo ko ajaran inyo udah kolai polajari. Kolai udah monjadi yakitn obai nantai ajaran inyo bondar. Kolai udah konal agatn koi inyo mongajar kolai. Kolai tohu obai koi ulih dipocayoan jadi, hala pocayo ajaran inyo bondar nantai.

Lukas 21:34

“Jagocam diri kaitn. Jangan sampai ado boko hal di dunia ni'in inyo moncaci' pikiran kaitn, ubo mabu', porbuatan jahat inyo dilabuhan aman udah komabu'an, boko mosalah kohidupan ni'in. Aman pikiran kaitn samaꞌan nian, nononyo kaitn co siap timpu ari nantai datakng. Obai ari nantai tajahan datakng pakai' somuo urakng, conyiant inyo tohu, samo samaꞌan joyat ntobukan mongujut bonatakng.

1 Timotius 4:6

Ajarancam boko hal nantai ko somuo urakng inyo pocayo. Aman ubo nian, kolai paca'an molayati Kristus Yesus agatn kotakng boi', kolai pan paca'an lobih kuat pocayo ko boko ajaran mongona'i kopocaya'an kito huatan dalapm ajaran inyo udah kolai jumpati somanah ni'in.

1 Timotius 1:3

Watu aku botula' ko propinsi Makedonia, aku totap minto oca' kolai totap bodiapm di kota Efesus. Aku mongohonda'i sama'an nantai pakai' kolai monosihat'i boko urakng totontu oca' sia' tongga' mongajaran boko ajaran inyo monyosat'an.

Roma 16:17

Boko somadikan. Aku kotakng muhun ko kaitn oca' kaitn boboi'cam agatn boko urakng inyo honda' bulah popocahan di antaro kaitn. Sia' honda' oca' kaitn monjadi sosat. Ajaran sia' bolawatan agatn ajaran inyo udah ditorima' kaitn. Jangan tuyut sia'!

2 Timotius 2:10

Jadi, aku botahatn mohadapi somuo macapm ajab sonsaro oca' boko urakng inyo dipilih Allah dapat kosolamant'an molalu'i Kristus Yesus huatan hidup tohormat somanah-manahnyo.

1 Korintus 9:27

Apo aku molatih bukakng-tubuhku agatn koras. Aku mongondalian diriku. Aku molabuhan boko hal nantai oca' lopas momboritoan Kabar Boi' ko urakng bukai, jangan sampai aku malahan kinyo cucu' di hadapan Allah.

Kisah Boko Rasul 6:4

Oca' koi siku' ulih hala bodoa ongko torus momboritoan Kabar Boi' mongona'i Yesus.”

Markus 13:9

Kaitn gola' boboi' obai kaitn tajahan ditangkap lalu dibaba' ko sidakng pomimpitn agama pakai' dipokaroan. Kaitn tajahan dipoduda'an diboko rumah sombayakng. Obai kaitn nantai murid-Ku, obai nianam kaitn tajahan dibaba' ko boko ponguaso huatan ko boko rajo pakai' dipokaroan jam. Apo, nianam watunyo pakai' kaitn bosasi mongona'i Aku.

Yakobus 5:20

Urakng inyo mombimbikng io nantai, gola' mongotohu'i ni'in: Aman urakng bodosa nantai bobali' monuruti ajaran inyo bondar, jadi jiwa urakng nantai paca'an disolamant'an doi' noraka huatan banya' dosa jam paca'an diamputi.

Titus 2:15

Ajaricam somuo ni'in ko boko urakng pocayo di pulau Kreta nantai. Padahicam ongko onji'i pomandiran ko sia' sama'an pomimpitn inyo pintar-corodi'. Jadi, jangan molongahan urakng bukai moanggap kolai co bopasal.

Kolose 4:17

Lopas nantai sampaian posatn ni'in ko somadikan kito Arkhipus, “Pontiat'ancam boboi' oca' kolai monyolosaian tugas polayatan inyo Tuhatn onju' ko kolai.”

1 Korintus 9:22

Aman aku bosamo agatn boko urakng inyo lomah, aku hidup samo sama'an urakng inyo lomah. Aku molabuhan nantai oca' monulukng sia' pakai' pocayo ko Yesus lobih kuat. Pokoknyo, aku monyosuaian diri agatn caro hidup somuo urakng inyo aku layati. Aku molabuhan nantai oca' ado boboropo urakng di antaro sia' inyo disolamant'an.

Roma 11:14

Agatn ubo nian, aku mungkitn ulih bulah banso ku siku' monjadi tungi. Aku boharap agatn boboropo urakng doi' sia' honda' pocayo ko Yesus jam sampai sia' monjadi solamant.

Roma 2:7

Allah paca'an moonju' kohidupan kokal ko urakng inyo kinyo monyorah pakai' bulah koboi'an, ia'an urakng inyo bulah koboi'an obai moncari' komulia'an huatan hormat doi' Allah, huatan honda' dionji'i hidup kokal doi' Sio.

Kisah Boko Rasul 26:22

Apo Allah molindukiku. Sampai ni'inan aku ija' hidup inya'anpan aku ija' ulih momboritoan mongona'i Yesus ko boko urakng inyo dianggap kinyo pontikng honda' pan boko urakng pontikng. La'apo inyo aku boritoan kinyo bukai doi' la'apo inyo ditulis boko nabi huatan Musa. Pado joman komai sia' momboritoan obai

Filemon 1:19

Aku, Paulus, monulis ni'in agatn jariku siku' pakai' monjaminnyo: “Aku tajahan molunasinyo nantai.” (Apo, jangan tongkolupatn kolai bohutakng agatn aku ia'an nantai kohidupan kolai inyo boharu dalapm Yesus Kristus.)

1 Tesalonika 2:16

obai sia' bousaha monongga'an koi oca' co momboritoan Kabar Boi' ko urakng inyo bukainyo urakng Yahudi. Sia' kinyo honda' kaitn inyo bukainyo urakng Yahudi disolamant'an! Agatn boko porbuatan nantai, sia' torus-monorus monambah dosa sia' udah langkukng-lalu ongko. Ni'in, koponsuahannyo Allah pan godi. Pasti sia' paca'an dihukupm kotakng borat.

1 Korintus 1:21

Allah bulah koputusan ni'in sosuai agatn kopintar-corodi'an-Nyo. Ia'an, Sio mombulah oca' monsio kinyo ulih mongonal Sio molalu'i kopintar-corodi'an monsio. Jadi, agatn sonang hati Allah monyolamant'an urakng inyo pocayo agatn momakai caro inyo dianggap budu, ia'an pomboritoan kabar boi'.

1 Timotius 4:15

Porotian somuo tugas inyo aku pandiran nantai. Labuhan somuonyo agatn rajitn. Agatn caro nantai somuo urakng moniant obai kolai somongkitn mampu mongajar huatan momimpitn agatn boi'.