1 Timotius 4:14 - Porjanjian Boharu Torjomahan Baso Dilakng Soari-ari

¹⁴ Ingantcam pado watu boko ponotua' molota'an jarinyo ko kopala' kolai. Pado watu nantai, ado inyo monyampaian posatn doi' Allah. Allah moonji'i komampuan husus ko kolai. Jangan botongga' monggunoan komampuan husus nantai.

1 Timotius 4:14 ပူးပေါင်းရင်းမြစ်များ

Kisah Boko Rasul 11:30

Sia' moonji'i sumbakan nantai ko Barnabas ongko Saulus oca' sia' duo ulih moonju'annyo ko boko pomimpitn urakng pocayo agatn Yesusdi Yerusalem.

Kisah Boko Rasul 13:3

Sia' somuo bopuaso huatan bodoa agi'. Sia' molota'an jari ko Barnabas ongko Saulus kapikng bodoa mominto potulukan Allah, ongko monyiuh sia' duo botula' molabuhan polayatan nantai.

Kisah Boko Rasul 19:6

Ongko, Paulus molota'an jarinyo ko pucu' sia'. Roh Allah turutn ko pucu' sia'. Sia' mula'i bopandir dalapm bomacapm baso inyo dionji'i Roh Allah. Momadahan boko posatn-pontal doi' Allah.

Kisah Boko Rasul 22:5

Imam Agukng huatan somuo kolompok pomimpitn agama inyo kotakan bokuaso ulih momadahan obai hal nantai bondar. Obai aku mondapat'an boko surat doi' sia' inyo ditujuan ko boko pomimpitn boko rumah sombayakng agama Yahudi di kota Damsyik. Di kota nantai ado jam boko urakng inyo jumpat boko ajaran Tuhatn Yesus. Boko surat nantai moonji'i hak oca' aku ulih monangkap sia'. Hajatku honda' mombaba' sia' bobali' ko kota Yerusalem ni'in, oca' sia' dihukupm.

Kisah Boko Rasul 6:6

Tujuh urakng ni'in dibaba' ko boko rasul. Boko rasul bodoa kapikng molota'an jarinyo ko kotujuh urakng nantai. Nianam caro sia' disiuh pakai' molabuhan tugas nantai.

Kisah Boko Rasul 8:17

Jadi Petrus ongko Yohanes molota'an jarinyo ko pucu' sia'. Watu nantai, hoyu' sia' monorima' Roh Allah.

1 Tesalonika 5:19

Jangan monongga'an Roh Allah doi' pokoroja'an-Nyo di antaro kaitn.

1 Timotius 1:18

Timotius, kolai sama'an ana'ku siku'. Ingant watu komai ado inyo momadahan posatn doi' Allah mongona'i diri kolai. Ni'in aku monugasan kolai: Gunoan cam posatn nantai pakai' molawatn kojahatan huatan usahaancam inyo boi' agatn hala pocayo agatn hati nurani inyo suci.

1 Timotius 4:15

Porotian somuo tugas inyo aku pandiran nantai. Labuhan somuonyo agatn rajitn. Agatn caro nantai somuo urakng moniant obai kolai somongkitn mampu mongajar huatan momimpitn agatn boi'.

1 Timotius 5:17

Jomaat gola' bondar-bondar mohormati huatan monulukng kohidupan boko ponotua' inyo momimpitn agatn boi', hususnyo boko ponotua' inyo bohotbah ongko mongajar mongona'i Pomandiran Allah.

1 Timotius 5:19

Timotius, aman siku' ponotua' dituduh, jangan lansukng pocayo tuduhan nantai. Apo, tuduhan inyo ulih ditorima' aman ado duo urakng monjadi sasinyo, obai ponotua' nantai bondar-bondar bodosa.

1 Timotius 5:22

Jangan tolalu copat momilih urakng monjadi ponotua' lalu molota'an jari ko io pakai' monsahannyo. Aman ado urakng bukai bulah dosa, kolai pan jangan sonjumpat'an bulah dosa. Kolai gola' monjago diri oca' kolai hidup co bulah bodosa

1 Timotius 6:12

Samo sama'an urakng bouyuh-jorih dalapm potandikan, kolai pan gola' bouyuh-jorih oca' kolai pagutn pocayo lalu mondapat'an hidup inyo somanah-manahnyo di sorugo. Pakai' hal nantaiam kolai udah ditingkau huatan udah mongatoan di hadapan urakng banya' obai kolai pocayo ko Yesus.

2 Timotius 1:6

Obai nantai, aku moingant'an kolai pakai' bulah komampuan husus kolai oca'nyo bonyalo lobih honggur. Komampuan husus nantai boasal doi' Allah timpu aku molota'an jariku ko pucu' kopala' kolai.