1 Timotius 3:2 - Porjanjian Boharu Torjomahan Baso Dilakng Soari-ari

² Obai nantai, siku' urakng ponotua' gola' hidup agatn caro inyo boi'. Io gola' hidup bujur bondar oca' urakng bukai co ulih monyalahan io. Io co ulih bisi bini lobih doi' siku'. Io gola' ulih mongondalian dirinyo. Io gola' pintar-corodi' huatan sopatn. Io gola' agatn coraca'an moonji'i koluntukan. Io gola' mampu mongajar urakng agatn boi'.

1 Timotius 3:2 ပူးပေါင်းရင်းမြစ်များ

Lukas 1:6

Siaꞌ duo laki-bini hidup monyonangan hati Allah. Sia' monuruti somuo porintah ongko poraturan Allah, agatn soponuh hati.

Lukas 2:36

Di tongahlamanan Rumah Allah nantai pan ado siku' urakng nabi botina' inyo udah kotakng tuho. Damonyo Hana. Io ana' Fenuel doi' suku Asyer. Io kalo kawitn somanahan tujuh tohutn, apo lopas nian lakinyo mati ongko monjadi balu. Io boumur dolapatn puluh ompat tohutn. Io hala di Rumah Allah. Siakng-malapm sombayakng agatn hala bopuaso ongko bodoa.

Roma 12:13

Tulukngcam kopontikan boko urakng inyo pocayo ko Kristus. Kaitn gola' hala sonang hati monorima' urakng pocayo dalapm rumah kaitn.

Filipi 2:15

Agatn ubo nantai, kaitn hidup agatn caro inyo bondar ongko borosih. Kaitn hidup ubo poana'an Allah inyo culih disalahan biar pan kaitn ado di tongah-tongah boko urakng inyo jahat ongko co mongonal caro hidup inyo bondar. Jadi, kaitn monjadi torakng bagi sia', samo sama'an boko bintakng inyo bocohayo di dunia ni'in.

1 Timotius 3:12

Siku' urakng diakon co ulih bobini lobih doi' siku'. Io gola' momimpitn boko poana'annyo agatn boi', somuo koluarganyo huatan somuo urakng inyo bodiapm di rumahnyo.

1 Timotius 3:8

Samo sama'an ponotua', boko diakon gola' hidup agatn caro inyo boi'. Sia' gola' tohormat. Sia' gola' jadi urakng jujur. Sia' co ulih jadi urakng ongkah hala mabu'. Sia' co ulih kaha'-kolobu'.

1 Timotius 4:3

Boko urakng tumbukan nantai morarakng urakng pakai' kawitn. Sia' pan morarakng urakng pakai' makatn pomakatn totontu. Apo sobondarnyo Allah bulah somuo pomakatn oca' boko urakng inyo pocayo ajaran bondar monorima' pomakatn agatn oso sukur ko Sio.

1 Timotius 5:10

Botina' balu nantai gola' dikonal sobagai urakng inyo hala bulah koboi'an. Contohnyo: io mombosaran poana'annyo agatn caro boi', io gola' agatn coraca'an bosodia moonji'i koluntukan, io gola' rondah hati molayati boko urakng pocayo huatan mombasu'i kaki sia', io gala' monulukng urakng inyo moalapi kosusahan. Io gola' moutamoan boko porbuatan boi' sama'an nantai dalapm kohidupannyo.

1 Timotius 5:22

Jangan tolalu copat momilih urakng monjadi ponotua' lalu molota'an jari ko io pakai' monsahannyo. Aman ado urakng bukai bulah dosa, kolai pan jangan sonjumpat'an bulah dosa. Kolai gola' monjago diri oca' kolai hidup co bulah bodosa

1 Timotius 5:9

Pulahcam daptar damo boko botina' balu inyo paca'an mondapat bantu'an doi' jomaat. Boko botina' balu nantai diharapan pakai' dilayati jomaat. Apo ado boboropo syarat: Sia' gola' boumur onam puluh tohutn ko pucu'. Sobolupm sia' monjadi botina' balu, sia' ongkah bolaki siku' mo.

2 Timotius 2:24

Urakng inyo molayati Tuhatn co ulih bokolohi. Io gola' ramah ko somuo urakng. Io gola' corodi' mongajar. Io pan gola' hala sabar.

Titus 2:2

Ajaricam boko lolaki inyo udah tuho oca'nyo ulih monahan diri sia'. Sia' gola' sopatn ongko pintar-corodi'. Sia' gola' totap pocayo ko Yesus, mongasihi Allah ongko urakng bukai, huatan botahatn dalapm mohadapi ajab sonsaro.

Ibrani 13:2

Jangan hohatian moonji'i koluntukan ko urakng bukai. Obai, boboropo urakng udah molabuhan nantai, ongko sobondarnyo sia' moonji'i koluntukan ko boko molekat biar pan sia' kinyo tohu nantai.

Ibrani 3:14

Obai, kito bokorojosamo agatn Kristus aman kito hala kuat pocayo ko Sio. Samo sama'an mulonyo, kito gola' totap kuat pocayo sampai ahir hidup kito.

1 Petrus 4:7

Boko somadikan ahir dunia ni'in udah dampikam. Obai nantai, kaitn gola' kondalian diri kaitn, ongko hala siap oca' kaitn ulih bodoa.

1 Petrus 4:9

Kaitn gola' hala monorima' urakng pocayo inyo bukai dalapm rumah kaitn siku'-monyiku' agatn sonang hati. Jangan mongoluh.

1 Petrus 5:8

Apo kaitn gola' hala mongondalian diri kaitn, huatan hala bojojago. Rajo Sitatn nan musuh kaitn. Sitatn honda' mohancuran kopocaya'an kaitn. Sitatn nan samo sama'an singa inyo mondorah, bojalatn kolilikng-kolimbat bogoyap urakng inyo ulih ditolatnnyo.