1 Tesalonika 5:10 - Porjanjian Boharu Torjomahan Baso Dilakng Soari-ari

¹⁰ Sio udah mati pakai' monanggukng hukupan dosa kito. Pado watu Sio datakng agi', boi' kito ija' hidup damo pan udah mati, somuo kito inyo pocayo ko Sio paca'an hidup bosamo-samo agatn Sio.

1 Tesalonika 5:10 ပူးပေါင်းရင်းမြစ်များ

Matius 20:28

Kaitn gola' tuyut toladatn Ana' Monsio. Sio datakng ko dunia ni'in bukainyo pakai' dilayati boko urakng, apo pakai' molayati boko urakng bukai. Sio paca'an monyorahan diri sampai mati. Agatn caro nantai, Sio monobus dosa urakng banya'.”

Yohanes 10:11

Aku ninam pongombolo inyo boi'. Pongombolo inyo boi' monyorahan hidupnyo pakai' monyolamant'an boko dombanyo.

Yohanes 10:17

Ninam sobabnyo Bopai mongasihi Aku: Obai Aku monyorahan hidup-Ku pakai' monorima'nyo agi'.

Yohanes 15:13

Urakng inyo kotakan mongasihi pokawalannyo ia'an io inyo monyorahan nyaonyo pakai' sia'.

Roma 8:34

Conyiant ado urakng inyo ulih mohukupm kito. Obai, Kristus Yesus udah dihukupm mati pakai' kito. Malahan lobih doi' nantai agi'! Kristus udah hidup agi' huatan dudu' di tompat inyo tohormat di sopia' kanan Allah. Sio nam inyo mombela kito!

1 Korintus 15:3

Aku udah monorima' Kabar Boi' ongko aku monyampaian nantai ko kaitn. Inyo kotakan pontikng doi' Kabar nantai ia'an boko kojadian ni'in: Kristus udah mati obai boko dosa kito. Hal nantai sama'an inyo ditulis dalapm Buku Suci.

2 Korintus 5:15

Masudnyo ubo ni'in: Kristus udah mati pakai' somuo urakng. Sio molabuhan nantai oca' boko urakng, inyo hidup, sia' co hidup pakai' monyonangan diri sia' siku', apo sia' hidup pakai' monyonangan Sio, ia'an Sio inyo udah mati ongko bobali' hidup agi' pakai' sia'.

2 Korintus 5:21

Kristus kinyo bodosa, apo Allah bulah Sio monanggukng hukupan dosa kito. Allah molabuhan nantai oca' di dalapm Kristus, kito ulih monjadi bondar di hadapan Allah.

Efesus 5:2

Kaitn gola' mongasihi urakng bukai samo sama'an Kristus udah mongasihi kaitn ia'an Sio monyorahan diri-Nyo monjadi kurbatn posombahan pakai' monanggukng hukupan dosa kito. Sio monjadi posombahan harupm inyo monyonangan Allah.

1 Tesalonika 4:13

Boko somadikan, koi kotakng honda' oca' kaitn mongotohu'i mongona'i la'apo inyo paca'an tojadi ko boko urakng inyo pocayo lopas sia' mati. Koi co honda' kaitn bulikng samo sama'an boko urakng inyo kinyo pocayo ko Yesus. Sia' co nyiant pongharapan obai boko urakng inyo mati paca'an bobali' hidup.

1 Tesalonika 4:15

Koi honda' monyampaian ko kaitn pomandiran ni'in doi' Tuhatn Yesus: boko urakng pocayo inyo ija' hidup watu Sio datakng paca'an botomu Yesus. Apo kito kinyo paca'an mondoholu'i sia' inyo udah mati.

1 Tesalonika 4:17

Lopas nantai, kito inyo ija' hidup paca'an diangkat ko pucu' awatn sosamo agatn sia'. Kito paca'an botomu Tuhatn di langit. Doi' watu nantai sampai somanah-manahnyo, kito paca'an bodiapm sosamo agatn Sio.

1 Tesalonika 5:6

Jadi, kito gola' bojago-jago huatan bososiap timpu Tuhatn datakng. Padohan hidup sama'an sia' inyo kinyo pocayo ko Yesus. Watu malapm, sia' ‘ado inyo tidu'’, ado jam inyo komabu'an sampai co bojago-jago huatan bososiap aman ado pongolit datakng.

1 Timotius 2:6

Yesus monyorahan diri sampai mati pakai' monanggukng hukupan dosa somuo urakng. Hal ni'in dibutian pas watu inyo ditontuan Allah.

2 Timotius 2:11

“Aman kito mati bosamo Yesus, kito pan paca'an hidup bosamo Sio. Aman kito botahatn mohadapi ajab sonsaro, kito pan paca'an momorintah bosamo agatn Sio sama'an boko rajo. Apo aman kito momandiran obai kito co konal agatn Sio, Sio paca'an momandiran obai Sio co konal agatn kito. Biar pan kito co sotia ko Sio, Sio pagutn sotia ko kito, Obai Sio co dapat molawatn diri-Nyo siku'.” Bondaram pomandiran ni'in.

Titus 2:14

Yesus monyorahan diri sampai mati. Agatn caro nantai, Sio mombebasan kito doi' boko kojahatan. Sio jam bulah kito borosih doi' boko dosa kito oca' kito monjadi boko urakng umputn Sio siku', ia'an boko urakng inyo bondar-bondar totap hala bulah koboi'an.

1 Petrus 2:24

Kristus siku' pan udah monanggukng hukupan dosa kito watu Sio mati di kayu salib. Sio molabuhan nantai oca' kito jangan bulah dosa agi', oca' kito dapat hidup agatn caro inyo bondar di hadapan Allah. Obai boko luko Kristus, kaitn monjadi nyamanam.

1 Petrus 3:18

Obai, Kristus udah mati sokali pakai' somuo dosa kito. Sio kinyo bodosa, apo Sio mati pakai' boko urakng inyo bodosa oca' Sio mombimbikng kito ko Allah. Sio inyo udah dibunuh dalapm koadaan-Nyo sobagai monsio, apo Roh Allah mombulah Sio hidup agi'.