1 Tesalonika 4:8 - Porjanjian Boharu Torjomahan Baso Dilakng Soari-ari

⁸ Jadi, aman ado di antaro kaitn inyo monula' ajaran ni'in, io kinyo monula' monsio apo io monula' Allah. Ingantcam! Allah jam inyo moonji'i Roh-Nyo inyo suci ko kaitn.

1 Tesalonika 4:8 ပူးပေါင်းရင်းမြစ်များ

Lukas 10:16

Lalu Yesus bopandir agi' ko sia' tujuh puluh murid inyo diutus tontai, “Urakng inyo mondingaꞌan kaitn, samo sama'an mondingaꞌan Aku siku'. Urakng inyo monula' kaitn, samo sama'an monula' Aku siku'. Urakng inyo monula' Aku, samo sama'an monula' Allah inyo moutus Aku.”

Yohanes 12:48

Apo, pas ahir joman nononyo, somuo urakng inyo monula' Aku, somuo urakng inyo co mondinga' pomandiran-Ku, sia' paca'an dihukupm. Sia' paca'an dihukupm sosuai agatn ajaran inyo udah Aku sampaian. Pomandiran inyo Aku sampaian monjadi sama'an hakipm inyo mohukupm sia'

Kisah Boko Rasul 13:41

‘Pontiatan boboi', kaitn inyo mohayam pomandiran-Ku! Kaitn paca'an mooso hiratn obai joman ni'in Aku paca'an molabuhan sosuatu inyo bulah kaitn kotakan ajab sonsaro. Biar pan ado urakng inyo momadahan ko kaitn mongona'i hukupan nantai, kaitn ija' bopikir hukupan nantai kinyo paca'an tojadi. Apo hukupan nantai paca'an tojadi. Kaitn paca'an bonaso.’ Jadi, boko somadikan, poniant'an boboi' oca' hukupan nantai kinyo tojadi ko kaitn jam.”

Roma 5:5

Aman kito boharap ko Sio sama'an nantai, jadi kito kinyo paca'an kocewa. Obai, hati kito udah dibisi'i Allah agatn kasih-Nyo. Allah molabuhan nantai agatn porontaroan Roh-Nyo inyo udah dionju' ko kito.

1 Korintus 2:10

Apo Allah udah monyatoan roncana-Nyo nantai ko kito. Allah molabuhan nantai molalu'i Roh-Nyo inyo Sio onju' ko kito. Obai, Roh nantai mongotohu'i huatan ulih monorakan somuo hal, malahan boko hal mongona'i Allah inyo tobumbutn dalapm diri-Nyo.

1 Korintus 7:40

Apo pondapatku botina' balu nantai paca'an lobih sonang hidupnyo aman io kinyo kawitn agi'. Aku bopikir pondapatku nantai doi' Roh Allah inyo monyoroto'i aku jam.

2 Korintus 1:22

Sio udah monyegel kito monjadi umputn-Nyo huatan moonju' Roh-Nyo di dalapm hati kito. Agatn molabuhan nantai Allah monjamin Sio paca'an moonji'i somuo inyo Sio janjian.

Galatia 4:6

Obai kito boko poana'an Allah, ongko Sio moutus Roh Ana'-Nyo ko kito. Roh-Nyo mansu' ko dalapm hati kito. Roh-Nyo bulah kito bodoa somombondarnyo agatn mongatoan, ‘Bopai, oi Bopaiku’.

1 Petrus 1:12

Allah momadahannyo ko sia' obai polayatan sia' nantai bukainyo pakai' sia' siku', apo pakai' kaitn. Ia'an, watu ni'in Kabar Boi' mongona'i kosolamant'an nantai udah diboritoan ko kaitn. Nantai tojadi obai Roh Allah inyo diutus doi' sorugo monyoroto'i boko urakng nantai pakai' momboritoan Kabar Boi' nantai. Boko molekat pan honda' mongotohu'i mongona'i Kabar Kosolamant'an nantai.

2 Petrus 1:21

Obai, boko nabi co kalo monyampaian pomandiran obai kohonda' sia'. Sia' monyampaian Pomandiran Allah obai Roh Allah ado di dalapm diri sia'.

1 Yohanes 3:24

Urakng inyo monuruti boko porintah-Nyo, io hidup bosatu agatn Allah, huatan Allah hidup bosatu agatn io. Kito tohu obai Allah hidup bosatu agatn kito obai ni'in: Sio udah moonju' Roh-Nyo ko kito.

Yudas 1:8

Biar pan sama'an nian, boko urakng totontu nantai inyo mansu' dalapm kolompok kaitn, sia' co botongga' bulah kojahatan. Sia' mongatoan obai sia' ado mimpi. Bodasaran mimpi nantai, sia' totap bulah kojahatan agatn bukakng-tubuh sia'. Sia' mohayam kuaso Allah huatan mohayam somuo inyo bokuaso di sorugo.