1 Tesalonika 2:6 - Porjanjian Boharu Torjomahan Baso Dilakng Soari-ari

⁶ Koi pan co kalo bogoyap pujian doi' monsio boi' doi' kaitn honda' pan doi' urakng bukai. Koi ado hak pakai' monuntut la'apo inyo koi pontikan doi' kaitn obai koi ni'in rasul Kristus.

1 Tesalonika 2:6 ပူးပေါင်းရင်းမြစ်များ

Yohanes 12:43

Sia' lobih sonang dihormati boko monsio, daripado dihormati Allah.

Yohanes 5:41

Aku co bogoyap pujian doi' monsio.

Yohanes 5:44

Nantai obai kaitn gala' hala bogoyap kohormatan doi' sosamo kaitn mo. Apo kaitn co kalo goyap pujian doi' Allah inyo satu-satunyo inyo bondar. Aman ubo nian, pasti kaitn co pocayo agatn Aku!

Yohanes 7:18

Urakng inyo mongajar agatn pomandiran doi' dirinyo siku', io bayo goyap kohormatan pakai' dirinyo siku'. Apo urakng inyo goyap kohormatan pakai' Sio inyo moutusnyo, urakng nantai bujur bondar. Io kinyo monipu urakng bukai.

1 Korintus 11:9

Solaitn nantai, obai, Allah bulah lolaki kinyo pakai' botina'. Apo Allah bulah botina' pakai' lolaki.

2 Korintus 13:10

Nianam sobabnyo aku monulis surat ni'in timpu ku bolupm ado bosamo agatn kaitn. Oca' watu aku bosamo kaitn nononyo, aku co gola' botindak koras momakai kuaso inyo Tuhatn onju' ko aku. Sio moonju' kuaso nantai pakai' monulukng kaitn lobih kuat, bukainyo pakai' mohancuran kopocaya'an kaitn.

2 Korintus 4:5

Obai bukainyo diri koi siku' inyo koi boritoan. Apo, koi momboritoan mongona'i Yesus Kristus sobagai Tuhatn. Sio inyo moutus koi pakai' monjadi polayatn kaitn.

Galatia 1:10

Agatn pomandiran nantai, udah jolas aku kinyo bousaha monyonangan monsio. Aku bayo bousaha monyonangan hati Allah mo! Soandainyo aku bousaha monyonangan monsio, nantai paca'an bulah aku co agi' monjadi hulutn umputn Rajo Inyo Dijanjian Allah.

Galatia 5:26

Janganam kito monjadi buhau. Janganam kito hala bulah urakng bukai godi. Janganam kito hala honda' barakng umputn urakng bukai.

Galatia 6:13

Sia' nantai udah disunant. Apo sia' kinyo monaati somuo porintah huatan poraturan Allah inyo ditulis Musa dalapm buku Hukupm Torat. Sia' bayo honda' kaitn disunant oca' sia' ulih mombuhau'i.

1 Tesalonika 2:9

Boko somadikan, pasti kaitn ingant kotakng kuat koi bokorojo watu koi ado bosamo agatn kaitn di Tesalonika. Koi uyuh-jorih bokorojo siakng malapm pakai' momonuhi kopontikan koi siku'. Jadi, watu koi momboritoan Kabar Boi' doi' Allah, kaitn kinyo gola' momonuhi kopontikan koi.

1 Timotius 5:17

Jomaat gola' bondar-bondar mohormati huatan monulukng kohidupan boko ponotua' inyo momimpitn agatn boi', hususnyo boko ponotua' inyo bohotbah ongko mongajar mongona'i Pomandiran Allah.