1 Tesalonika 2:14 - Porjanjian Boharu Torjomahan Baso Dilakng Soari-ari

¹⁴ Butinyo ia'an kaitn sonjumpat'an caro hidup inyo samo sama'an boko urakng inyo pocayo ko Kristus Yesus di doerah Yudea. Lopas kaitn monjadi pocayo, kaitn didorako'i boko urakng doi' banso kaitn siku'. Sama'an nantai jam, lopas boko urakng Yahudi di doerah Yudea monjadi pocayo, sia' didorako'i boko urakng doi' banso sia' sikuꞌ.

1 Tesalonika 2:14 ပူးပေါင်းရင်းမြစ်များ

Kisah Boko Rasul 11:19

Somontaro nantai, boko urakng inyo pocayo Yesus udah tosebar ko mono-mono. Lopas jadi Stefanus dibunuh, di kota Yerusalem boko urakng pocayo didorako'i. Obai nantai, sia' morarian diri jouh sampai ko nogori Fenisia, pulau Siprus, huatan kota Antiokhia. Sia' torus monyampaian Kabar Boi' mongona'i Yesus di boko tompat nantai. Apo sia' bayo momboritoan nantai ko urakng Yahudi ja'am.

Kisah Boko Rasul 13:50

Apo boko urakng Yahudi mohadu boko urakng pontikng di kota nantai, tomansu' boko botina' inyo bopongaruh udah mansu' agama Yahudi. Boko urakng pontikng nantai bulah urakng bukai mondorako'i Paulus ongko Barnabas. Koponsuahannyo, Paulus ongko Barnabas ditundukng doi' doerah nantai.

Kisah Boko Rasul 14:19

Lopas nian boboropo urakng Yahudi doi' Antiokhia huatan Ikonium datakng ko santai. Sia' moyakit'an banya' urakng di kota Listra nantai oca' kinyo pocayo agatn pomandiran Paulus. Ongko sia' monikapm Paulus agatn batu pakai' mombunuh io. Watu sia' bopikir Paulus udah mati, sia' mombuakan bukakngnyo ko luar kota nantai.

Kisah Boko Rasul 14:2

Apo ado boko urakng Yahudi inyo kinyo pocayo. Sia' mohadu boko urakng bukainyo urakng Yahudi oca' kinyo pocayo jam. Jadi, boko urakng nantai kotakan godi agatn boko urakng inyo pocayo.

Kisah Boko Rasul 14:4

Jadi, pondudu' kota nantai topisah monjadi duo kolompok. Ado inyo bopihak ko boko urakng Yahudi inyo kinyo pocayo, huatan ado inyo bopihak ko Rasul Paulus ongko Barnabas.

Kisah Boko Rasul 14:5

Boko urakng inyo molawatn Paulus ongko Barnabas, bohoupm agatn boko urakng Yahudi huatan boko pomimpitn sia' pakai' mondorako'i huatan monikapi Paulus ongko Barnabas agatn batu.

Kisah Boko Rasul 17:13

Apo boko urakng Yahudi di Tesalonika mondinga' mongona'i Paulus di Berea. Sia' mondinga' obai Paulus tongahan monyampaian borito doi' Allah mongona'i Yesus di kota nantai jam. Jadi, sia' pan botula' ko su'utn huatan monjahai'an Paulus.

Kisah Boko Rasul 18:12

Pado watu Paulus ija' di kota Korintus, pomorintah Romawi moangkat Galio monjadi gubernur propinsi Akhaya nantai. Watu nantai, boko urakng Yahudi bosamo-samo molawatn Paulus. Sia' mombaba' io ko pohadapan Galio pakai' diadili.

Kisah Boko Rasul 9:1

Somontaro boko rasul momboritoan Kabar Boi', Saulus kotakan godi bondar. Io moancapm boko murid Tuhatn Yesus. Katonyo io paca'an mombunuh sia'. Jadi, io botula' ko Imam Agukng.

Kisah Boko Rasul 9:13

Apo Ananias bopandir, “Tuhatn, aku udah mondinga' banya' kisah mongona'i Saulus nantai. Di Yerusalem, io banya' mondorako'i urakng inyo pocayo ko Duatn.

Kisah Boko Rasul 9:31

Lopas nantai somanah boboropo watu, boko urakng inyo pocayo Yesus di soluruh doerah Yudea, doerah Galilea, huatan doerah Samaria ulih hidup agatn sonang-asau. Co nyiant inyo mondorako'i sia'. Roh Allah monulukng huatan monguat'an sia'. Obai nantai, mongkitn manah mongkitn banya' urakng inyo pocayo agatn Yesus. Sia' somuo hidup agatn ponuh oso hormat ko Tuhatn inyo bokuaso.

1 Korintus 10:32

Jangan molabuhan sosuatu inyo monyinggukng hati urakng bukai, boi' nantai urakng Yahudi, sama'an nian jam urakng Yunani huatan boko urakng dalapm kolompok urakng inyo pocayo ko Yesus.

1 Korintus 7:17

Pokoknyo, ko somuo urakng pocayo aku monosihat'i: Hidupcam dalapm koadaan inyo samo watu kaitn ditingkau Allah monjadi umat-Nyo. Niannam koadaan inyo udah ditontuan Tuhatn pakai' kaitn. Aku moajaran porintah nantai di somuo jomaat.

Galatia 1:22

Obai nantai, boko jomaat Kristus di Yudea bolupm kalo botomu agatn aku socaro lansukng.

1 Tesalonika 1:1

Ko inyo tohormat boko urakng pocayo di kota Tesalonika. Kaitn inyo monjadi umputn Allah Bopai ongko Yesus Kristus, Tuhatn inyo bokuaso di pucu' kito. Salapm doi' aku, Paulus ongko doi' Silas huatan Timotius. Kasih karunia ongko sonang-asau doi' Allah, Bopai kito, huatan Tuhatn Yesus Kristus monyoroto'i kolai.

1 Tesalonika 1:6

Ongko, kaitn hidup agatn caro inyo samo sama'an koi, huatan samo sama'an Tuhatn Yesus jam. Masud aku, watu kaitn monjadi pocayo ko Yesus, kaitn kotakng di dorako'i. Apo kaitn totap pocayo Kabar Boi' nantai agatn rindakng-rigah doi' Roh Allah.

1 Tesalonika 3:4

Komai, watu koi ija' bosamo agatn kaitn, koi udah opat momadahan obai kito inyo pocayo paca'an didorako'i sama'an nantai. Kaitn tohu pomandiran nantai bondar obai hal nantai udah tojadi.

2 Tesalonika 1:1

Ko inyo tohormat boko urakng inyo pocayo di kota Tesalonika. Kaitn inyo pocayo ko Allah Bopai kito huatan Yesus Kristus, Tuhatn kito. Salapm doi' aku, Paulus. Doi' Silas huatan Timotius jam.

2 Tesalonika 1:4

Obai nantai, koi bangga mongisahan mongona'i kaitn ko boko jomaat inyo bukai. Koi mongisahan obai kaitn didorako'i huatan moalapi banya' kosusahan obai kaitn pocayo ko Yesus. Apo kaitn totap botahatn huatan pocayo.