1 Tesalonika 1:5 - Porjanjian Boharu Torjomahan Baso Dilakng Soari-ari

⁵ Obai watu koi momboritoan Kabar Boi' ko kaitn, koi kinyo bayo momakai boko pomandiran koi modas. Apo kuaso Roh Allah monulukng koi monyampaiannyo huatan koi kotakng yakitn aman Kabar Boi' nantai bondar. Kaitn mongotohu'i somuo nantai obai kaitn udah moniant caro hidup koi. Watu koi ado di antaro kaitn, koi molayati kaitn.

1 Tesalonika 1:5 ပူးပေါင်းရင်းမြစ်များ

Markus 16:20

Boko murid-Nyo botula' momboritoan Kabar Boi' ko soluruh dunia. Tuhatn Yesus bokorojo dalapm diri sia' oca' sia' ulih mombulah mujisat. Agatn sama'an nantai, Sio mombutian obai inyo diboritoan sia' bondar.

Lukas 1:1

Ko inyo tohormat, Teofilus: tangga'i; potamo Yesus ado di dunia, ado boko urakng inyo moniant agatn matonyo siku'. Sia' molayati Allah agatn caro monyampaian borito mongonaꞌi Yesus nantai. Sia' pan monyampaian borito nantai ko kito duo, samaꞌan nian jam ko boko urakng inyo mondinga' borito nantai. Banya' doi' sia' bousaha monulis niant apo boko kojadian nantai udah tojadi di tongah-tongah kito.

Kisah Boko Rasul 11:21

Tuhatn Allah kotakan monulukng sia' pakai' momboritoan Kabar Boi'. Obai nantai, banya' bondar urakng monjadi pocayo. Banya' urakng bukainyo Yahudi mula'i jumpat Tuhatn Yesus.

Kisah Boko Rasul 16:14

Salah siku' doi' sia' nantai ponjual koitn ungu inyo mahal. Damonyo Lidia. Io boasal doi' kota Tiatira. Io nantai bukai urakng Yahudi apo udah monjadi urakng inyo pocayo agatn Allah. Watu Paulus mongajar boko botina' nantai, Tuhatn bulah hati Lidia monorima' ajaran Paulus. Jadi, io pocayo ajaran Paulus mongona'i Yesus.

Kisah Boko Rasul 2:33

Lopas nantai, Sio udah noi' ko sorugo obai kuaso Allah. Yesus pan udah monorima' Roh Allah obai Roh Allah nantai udah dijanjian Bopai-Nyo. Jadi, watu ni'in Yesus moonji'i Roh Allah ko koi. Nanam kojadian inyo udah kaitn tiat huatan dinga' molalu'i boko urakng inyo bopandir agatn bomacapm baso di si'itn.

Roma 1:16

Aku co malu momboritoan Kabar Boi' nantai obai Kabar Boi' ia'an kuaso Allah pakai' monyolamant'an somuo urakng inyo pocayo, potamo-tamo urakng Yahudi, apo jam urakng bukainyo Yahudi.

Roma 15:13

Boko somadikan! Allah inyo moonji'i harapan ko kito. Aku bodoa obai kaitn pocayo ko Kristus, jadi Allah tajahan bulah kaitn kotakan sonang-nyamanam ongko hidup agatn sonang-asau. Aku bodoa pakai' nantai oca' kuaso Roh Allah bulah kaitn mongkitn boharap ko Sio.

Roma 2:16

Nononyo hal nantai monjadi kotiat'an. Ia'an, timpu Allah molalu'i Kristus Yesus pakai' mohakipi somuo hal inyo tosimpatn dalapm hati monsio. Nantai sosuai agatn Kabar Boi' inyo aku boritoan.

1 Korintus 1:24

Apo pakai' boko urakng Yahudi huatan inyo kinyo urakng Yahudi inyo udah Allah pilih, Kristus monunju'an kuaso Allah huatan kopintar-corodi'an Allah.

1 Korintus 10:33

Pulahcam samo sama'an inyo ku pulah. Aku hala bousaha oca' somuo porbuatanku kinyo bulah sopo pan tosinggukng. Aku hala moutamoan inyo toboi' pakai' urakng banya', daripado inyo toboi' pakai' diriku siku'. Aku molabuhan somuo nantai oca' sia' ulih disolamant'an.

1 Korintus 3:16

Inyo gola' kaitn kotohu'i kaitn samo sama'an Rumah Allah huatan Roh Allah bodiapm di antaro kaitn somuo.

1 Korintus 3:6

Kaitn jomaat Korintus sama'an halnyo lakau umputn Allah. Aku samo sama'an urakng inyo monanam kabar boi' ko kaitn, sodakan Apolos samo sama'an urakng inyo monyirapm. Urakng inyo monanam huatan urakng inyo monyirapm kinyo pontikng. Inyo pontikng ia'an Allah, obai Sio inyo mombulah kaitn botumbuh. Obai nantai, koi duo samo-samo bokorojo pakai' Sio. Koi paca'an monorima' upah sosuai agatn pokoroja'an koi siku'-monyiku'.

1 Korintus 4:20

Obai Koraja'an Allah kinyo mongona'i momakai pomandiran apo mongona'i kuaso.

1 Korintus 9:14

Samo sama'an nantai jam, Tuhatn Yesus udah bulah poraturan ni'in: Boko urakng inyo momboritoan Kabar Boi', sia' bohak mondapat'an kopontikan hidup doi' pokoroja'an nantai.

2 Korintus 3:6

Sio inyo bulah koi sanggup dalapm molayati pomboritoan mongona'i Pojanjian Boharu inyo Sio pulah pakai' monsio. Pojanjian Boharu nantai kinyo mongona'i monuruti boko porintah inyo ditulis, apo mongona'i monuruti Roh Allah. Obai, boko porintah inyo ditulis di Hukupm Torat nantai mombaba' komatian. Apo, Roh Allah mombaba' kohidupan.

Galatia 5:5

Apo kito pocayo ko Yesus huatan Roh Allah monulukng kito. Aman ubo nian, kito monantian agatn yakitn huatan moharap watunyo Allah moanggap kito bondar.

Efesus 2:10

Obai kito ni'in pulahan Allah huatan molalu'i Kristus, Allah mombulah kito oca' kito molabuhan boko hal inyo boi', ia'an boko pokoroja'an inyo udah Sio siap'an sobolupmnyo pakai' kito.

Efesus 3:20

Topujiam Allah! Sio sanggup molabuhan banya' hal, lobih banya' doi' inyo ulih kito minto damo bayakan. Obai, kuaso-Nyo bokorojo di dalapm diri kito.

Filipi 2:13

Obai, Allah siku' bokorojo di dalapm kaitn. Sio moonju' ko kaitn kohonda' ongko komampuan pakai' monyonangan Sio.

Filipi 4:9

Solaitn nantai, kaitn gola' hidup sosuai agatn ajaran inyo ku sampaian ko kaitn. Labuhancam lapo inyo kaitn torima' doi' ku. Turuticam boko pomandiran inyo kaitn dinga' doi' ku. Labuhancam boko porbuatan inyo kaitn tiat udah ku labuhan. Agatn ubo nantai, Allah inyo moonji'i sonang-asau tajahan monyoroto'i kaitn.

Kolose 2:2

Aku bousaha oca' hati kaitn somuo dikuatan huatan kaitn bosatu dalapm kasih. Agatn ubo nian, kaitn mondapat'an somuo borokat huatan monjadi yakitn obai sobondarannyo mongoroti mongona'i Yesus. Kaitn pan paca'an mongotohu'i hajat Allah inyo komai kinyo dikotohu'i monsio. Ia'an, kaitn somuo ulih mongonal Kristus.

1 Tesalonika 2:13

Koi hala bosukur ko Allah obai timpu koi momboritoan Kabar Boi' ko kaitn, kaitn pocayo nantai bondar-bondar doi' Allah huatan bukainyo doi' pikiran monsio. Kopocaya'an kaitn nantai pan udah morubah caro hidup kaitn.

2 Timotius 2:10

Jadi, aku botahatn mohadapi somuo macapm ajab sonsaro oca' boko urakng inyo dipilih Allah dapat kosolamant'an molalu'i Kristus Yesus huatan hidup tohormat somanah-manahnyo.

2 Timotius 2:8

Kabar Boi' inyo aku boritoan ia'an mongona'i Yesus Kristus, koturutan Rajo Daud. Sionam Kristus inyo udah bobali' hidup doi' komatian.

Ibrani 10:22

Obai nantai, mara kito datakng dampikng ko Allah agatn hati inyo boi' ongko bondar-bondar kuat pocayo. Obai, hati kito udah diborosihi doi' pikiran jahat, ongko bukakng-tubuh kito udah diborosihi agatn ara'i inyo murni.

Ibrani 6:11

Apo koi honda' kaitn siku'-monyiku' totap torus bosomangant mombulah sama'an nantai sampai ahir, oca' kaitn yakitn mongona'i harapan kaitn.

1 Petrus 1:12

Allah momadahannyo ko sia' obai polayatan sia' nantai bukainyo pakai' sia' siku', apo pakai' kaitn. Ia'an, watu ni'in Kabar Boi' mongona'i kosolamant'an nantai udah diboritoan ko kaitn. Nantai tojadi obai Roh Allah inyo diutus doi' sorugo monyoroto'i boko urakng nantai pakai' momboritoan Kabar Boi' nantai. Boko molekat pan honda' mongotohu'i mongona'i Kabar Kosolamant'an nantai.

1 Petrus 1:3

Topujicam Allah, ia'an Bopai doi' Yesus Kristus, Tuhatn kito. Allah udah monunju'an koboi'an-Nyo inyo luar biaso ko kito agatn caro ni'in: Sio bulah Yesus Kristus hidup agi' doi' antaro urakng mati. Molalu'i nantai, Sio moonju' kohidupan boharu ko kito samo sama'an kito hoyu' lahir. Obai nantai, hal ni'in moonji'i kito pongharapan inyo kuat.

1 Petrus 5:3

Jangan buhau botindak ubo rajo, tohadap sia' inyo dipocayo'i Allah pakai' kaitn. Apo, kaitn gola' monjadi toladatn sia'.

2 Petrus 1:10

Obai nantaiam, boko somadikanku, bousahacam lobih kuat agi' molabuhan somuo nantai. Agatn ubo nian, kaitn lobih yakitn obai Allah udah momilih huatan moningkau kaitn pakai' monjadi umant-Nyo. Obai, aman kaitn molabuhan nantai, kaitn co paca'an jatu' ko dalapm dosa.

2 Petrus 1:19

Obai nantai, koi monjadi lobih yakitn agi' obai pomandiran boko nabi mongona'i Kristus bondar. Soboi'nyo kaitn pan gola' mondinga'an pomandiran boko nabi. Pomandiran nantai paca'an mombimbikng kaitn ko jalatn inyo bondar samo sama'an cohayo pompolitoan di tompat inyo potakng, sampai matoari moncara' ongko bintakng timur, ia'an Kristus, bosinar dalapm hati kaitn.