1 Tesalonika 1:3 - Porjanjian Boharu Torjomahan Baso Dilakng Soari-ari

³ Koi bosukur ko Allah Bopai kito obai koi moingant caro hidup kaitn. Ia'an, obai kaitn pocayo ko Yesus huatan udah moniant'an dalapm porbuatan kaitn inyo nyata. Kaitn mongasihi urakng bukai agatn somombondarannyo monulukng sia'. Ongko kaitn totap kuat ongkah boharap ko Yesus Kristus, Tuhatn kito.

1 Tesalonika 1:3 ပူးပေါင်းရင်းမြစ်များ

Yohanes 14:15

“Aman kaitn mongasihi Aku, kaitn paca'an monaati boko porintah-Ku.

Yohanes 15:10

Aman kaitn monuruti boko porintah-Ku, Aku pan totap hala mongasihi kaitn. Samo sama'an Aku monuruti porintah Bopai-Ku, huatan Sio pan totap hala mongasihiKu jam.

Kisah Boko Rasul 10:31

Kato molekat nantai, ‘Kornelius, Allah mondinga' doa kolai. Allah pan sonang obai kolai opat moonji'i duit ko boko urakng jaro.

Kisah Boko Rasul 3:19

Obai nantai am, tongga'ancam kaitn bulah dosa huatan bobali' taat agatn Allah. Labuhancam nantai oca' boko dosa kaitn diamputi.

Roma 12:12

Sonang-nyamancam obai kaitn yakitn boharap ko Tuhatn. Kaitn gola' botahatn mohadapi ajab sonsaro ongko hala bodoa.

Roma 15:13

Boko somadikan! Allah inyo moonji'i harapan ko kito. Aku bodoa obai kaitn pocayo ko Kristus, jadi Allah tajahan bulah kaitn kotakan sonang-nyamanam ongko hidup agatn sonang-asau. Aku bodoa pakai' nantai oca' kuaso Roh Allah bulah kaitn mongkitn boharap ko Sio.

Roma 15:4

La'apo pan inyo ditulis komai dalapm Buku Suci, ditulis pakai' moajari kito. Boko ajaran nantai monguat'an hati kito ongko bulah kito botahatn mohadapi ajab sonsaro. Agatn ubo nantai, kito diajari oca' kito boharap ko Allah.

Roma 16:26

Apo watu ni'in Allah inyo hidup kokal udah monyiuh oca' roncana-Nyo dipadahan, ia'an roncana-Nyo inyo udah ditulis dalapm boko buku nabi. Agatn ubo nantai, hajat Allah diboritoan ko somuo banso oca' sia' pocayo ongko monaati-Nyo.

Roma 16:6

Salapm ko Maria inyo udah bokorojo koras pakai' kaitn.

Roma 2:7

Allah paca'an moonju' kohidupan kokal ko urakng inyo kinyo monyorah pakai' bulah koboi'an, ia'an urakng inyo bulah koboi'an obai moncari' komulia'an huatan hormat doi' Allah, huatan honda' dionji'i hidup kokal doi' Sio.

1 Korintus 13:13

Jadi, dalapm koadaan sokarakng ni'in ado tigo hal inyo gola' totap kito labuhan, ia'an: torus pocayo, kinyo botongga' boharap huatan salikng mongasihi. Inyo kotakan pontikng doi' kotigo hal nantai ia'an salikng mongasihi.

1 Korintus 15:58

Jadi, boko somadikan inyo aku kasihi, totap pocayo ko Yesus agatn yakitn. Jangan goyah. Bokorojocam agatn rajitn pakai' Tuhatn. Obai, kaitn tohu obai somuo inyo kaitn korojoan pakai' Tuhatn ado kountukannyo.

2 Korintus 2:17

Obai, banya' urakng momboritoan Pomandiran Allah pakai' mondapat'an kountukan. Apo, koi co sama'an sia'. Koi momboritoan Pomandiran Allah agatn hati inyo tulus. Koi momboritoan sobagai urakng inyo diutus Allah, urakng inyo bopandir di hadapan Allah, urakng inyo hidup dalapm Kristus.

Galatia 1:4

Yesus monyorahan diri-Nyo huatan mati di kayu salib. Agatn porbuatan nantai, Sio monyolamant'an kito doi' hukupan boko dosa kito. Sio molabuhan nantai pakai' monyolamant'an kito doi' kojahatan inyo ado di joman ni'in jam. Somuo nantai tojadi sosuai agatn kohonda' Allah.

Galatia 5:13

Boko somadikan, kaitn udah dipilih Allah pakai' monjadi urakng inyo bebas. Apo nantai kinyo boroti kaitn bebas pakai' hidup sosuai agatn kohonda' diri kaitn inyo jahat. Sobali'nyo, hala molayati siku'-monyiku' agatn ponuh kasih.

Galatia 5:6

Obai, hal bosunant kata'an kinyo bosunant co nyiant bedanyo di kito inyo ado di dalapm Kristus Yesus. Inyo pontikng ia'an aman kito pocayo ko Yesus huatan kopocaya'an nantai monyurukan kito pakai' mongasihi urakng bukai.

Galatia 6:9

Obai nantai, jangan botongga' bulah koboi'an. Pado watu inyo ditontuan Allah, kito paca'an mondapat'an somuo inyo dijanjian-Nyo. Kito paca'an mondapat'annyo, aman kito kinyo botongga' bulah koboi'an.

1 Tesalonika 3:6

Ni'in Timotius udah pulakng doi' kaitn. Io mombaba' kabar inyo kotakan monyonangan. Io momadahan ko koi obai kaitn totap pocayo ko Yesus huatan totap mongasihi urakng bukai. Io mongisahan obai kaitn hala monggonang koi agatn boi'. Io pan momandiran obai kaitn kotakng rindu honda' botomu agi' agatn koi, samo jam sama'an koi rindu botomu agi' agatn kaitn.

2 Tesalonika 1:11

Obai Allah mombalas somuo urakng agatn adil, koi hala mondoa'an kaitn. Koi bodoa oca' Allah moanggap kaitn cucu' pakai' ditingkau-Nyo. Koi pan bodoa oca' kuaso Allah monulukng kaitn pakai' molabuhan somuo inyo kaitn labuhan. Koi pan bodoa oca' Allah moonji'i kokuatan pakai' molabuhan somuo inyo kaitn labuhan obai pocayo ko Yesus.

2 Tesalonika 1:3

Boko somadikan, koi bosukur ko Allah obai kaitn. Cucu' mo koi bosukur obai kaitn mongkitn kuat pocayo ko Yesus. Somuo kaitn pan mongkitn mongasihi siku'-monyiku'.

1 Timotius 1:14

Apo Tuhatn kito kotakan momborokati aku agatn caro bulah aku monjadi pocayo agatn Sio huatan ulih mongasihi.

1 Timotius 2:3

Somuo doa sama'an nantai boi' ongko monyonangan hati Allah, Ponyolamant kito.

Ibrani 10:36

Kaitn gola' sabar botahatn oca' kaitn ulih molabuhan kohonda' Allah. Agatn sama'an nantai, kaitn tajahan monorima' borokat inyo Sio janjian.

Ibrani 11:17

Obai Abrahapm pocayo, jadi io taat watu Allah mouji io. Io rela momposombahan Ishak, ana'nyo inyo tunggal. Padohal, Allah udah bojanji ko Abrahapm.

Ibrani 13:21

Aku bodoa oca' Allah moonju' ko kaitn somuo hal boi' inyo dipontikan kaitn pakai' molabuhan kohonda'-Nyo. Aku bodoa oca' Allah molalu'i Yesus Kristus, mongorojoan dalapm hati kito somuo hal inyo dikohonda'i-Nyo. Mara kito momuji Sio pakai' somanah-manahnyo. Amin!

Ibrani 4:11

Obai nantai, mara kito bousaha oca' kito ulih mansu' ko dalapm tompat torahat nantai. Jangan sampai ado urakng di antaro kito inyo culih mansu' obai io tuyut toladatn sia' doi' joman komai inyo kinyo taat ko Allah.

1 Petrus 3:4

Apo, bousaha pulah diri kaitn lobih boi' di dalapm hati, samo agatn hidup inyo lomah-lombut huatan tenang. Pomboi' ubo nian tahatn sampai somanahnyo huatan kotakng borogo di mato Allah.

1 Yohanes 3:18

Poana'anKu! Jangannam kito bayo bopandir obai kito mongasihi urakng bukai damo bopandir mongona'i kasih ja'am. Apo kohonda'nyo kito bondar-bondar mongasihi agatn porbuatan ongko dalapm kobondaran.

1 Yohanes 3:21

Jadi, boko somadikanku inyo tokasih, aman hati kito co monyalahan kito, jadi kito jangan gola' mohadapi Allah.

1 Yohanes 3:3

Somuo urakng inyo yakitn moharapan obai Sio paca'an mombulah nantai tojadi, sia' monjago diri oca' co bulah dosa samo sama'an Sio co bulah dosa.

1 Yohanes 5:3

Obai, aman kito mongasihi Allah rotinyo kito pan paca'an monuruti boko porintah-Nyo. Boko porintah-Nyo kinyo borat pakai' kito,

Wahyu 2:19

Aku tohu somuo inyo kaitn labuhan, ia'an kaitn mongasihi urakng bukai, kaitn pocayo ko aku, kaitn bokorojo molayati Aku, kaitn botahatn mohadapi ajab sonsaro. Aku tohu kaitn molabuhan lobih banya' porbuatan boi' watu ni'in daripado komai watu kaitn hoyu' pocayo ko aku.

Wahyu 3:10

Kaitn udah monaati porintah-Ku pakai' botahatn dalapm mohadapi ajab sonsaro. Obai niannam, Aku paca'an molinduki kaitn doi' masa kosusahan inyo paca'an monimpa soluruh dunia. Hal nantai tojadi pakai' mouji somuo monsio inyo bodiapm di bumi.