1 Tesalonika 1:10 - Porjanjian Boharu Torjomahan Baso Dilakng Soari-ari

¹⁰ Sia' pan mongisahan obai kaitn monanti watu Ana' Allah paca'an datakng agi' ko dunia ni'in doi' sorugo. Ia'an, Yesus inyo udah Allah hidupan agi' doi' komatian. Yesus nantaiam inyo monyolamant'an kito doi' hukupan Allah inyo paca'an datakng.

1 Tesalonika 1:10 ပူးပေါင်းရင်းမြစ်များ

Matius 1:21

Maria paca'an boana'an siku' bobia' lolaki. Kolai gola' mondamo'i-Nyo, Yesus, obai Io monyolamant'an umant-Nyo doi' boko dosa sia'.”

Matius 16:27

Obai Ana' Monsio paca'an datakng agi' agatn kuaso Allah Bopai-Nyo huatan diiriki boko molekat-Nyo. Timpu nantai, Sio paca'an mombalas sotiap urakng sosuai agatn porbuatannyo.

Matius 16:28

Dinga'anbo, ado urakng di antaro kaitn somuo di si'itn inyo kinyo paca'an mati sobolupm moniant Ana' Monsio datakng agatn Korajaan-Nyo.”

Matius 3:7

Apo banya' jam pomimpitn agama Yahudi pan datakng pakai' dibaptis. Ado doi' kolompok Farisi huatan kolompok Saduki. Watu Yohanes moniant sia', io bopandir, “Oi kaitn inyo jahat huatan licik sama'an ular biso! Jangan bopikir kaitn ulih morarian diri doi' hukupan Allah nononyo.

Lukas 2:25

Timpu nantai di kota Yerusalem ado urakng damonyo Simeon. Sio ni'in urakng onsi', inyo hala mohormati huatan monaati Allah. Sio monanti Rajo Inyo Dijanjian Allah nononyo datakng moonji'i kodamaian ko banso Israel. Roh Allah monyoroto'i Simeon.

Lukas 3:7

Banyaꞌ urakng Yahudi datakng pakai' dibaptis. Ongko Yohanes bopandir, “Uai kaitn inyo jahat huatan licik samaꞌan Rajo Sitatn, jangan bopikir kaitn ulih morarian diri doi' hukupan Allah nononyo.

Kisah Boko Rasul 1:11

Koduo urakng nantai bopandir, “Oi boko urakng doi' doerah Galilea. Jangan kaitn ija' bodiritn di si'itn, monongadah ko langit. Kaitn udah moniant Yesus noi' ko sorugo doi' antaro kaitn. Nononyo, Sio paca'an datakng agi' agatn caro inyo samo ubo nantaiam.”

Kisah Boko Rasul 17:31

Kito gola' moninggalan dosa obai Allah paca'an mohakipi somuo urakng agatn adil. Sio udah monontuan sombilo ponghakipan nantai paca'an tojadi. Sio jam udah momilih siku' Urakng pakai' monjadi Hakipm. Allah mombutian somuo nantai agatn caro mombulah Urakng nantai bobali' hidup doi' komatian.”

Kisah Boko Rasul 2:24

Jadi, co mungkitn Yesus ija' totap mati. Obai nantaiam, Allah udah bulah Sio bobali' hidup huatan mombebasan Sio doi' ajab sonsaro komatian.

Kisah Boko Rasul 2:32

Boko somadikan, Yesus nanam Rajo nantai! Lopas Yesus mati, Allah bulah Sio hidup agi' doi' komatian. Koi somuo udah moniant Sio. Koi moniant agatn mato kopala' koi siku'.

Kisah Boko Rasul 3:21

Apo Yesus gola' bodiapm di sorugo holu'ai. Sio paca'an datakng agi', watu Allah bulah dunia monjadi boharu. Allah udah bojanji mongona'i hal nantai. Janji-Nyo ditulis boko nabi-Nyo watu joman komai.

Kisah Boko Rasul 4:10

Jadi oca' kaitn somuo tohu. Somuo urakng banso kito Yahudi gola' tohu jam! Urakng ni'in bodiritn sehat di hadapan kaitn sokarakng obai io nyamanam agatn kuaso Yesus Kristus doi' Nazaret. Kaitn udah monula' Sio sampai Sio dihukupm mati di kayu salib. Apo Allah udah bulah Sio hidup agi' doi' komatian.

Roma 2:7

Allah paca'an moonju' kohidupan kokal ko urakng inyo kinyo monyorah pakai' bulah koboi'an, ia'an urakng inyo bulah koboi'an obai moncari' komulia'an huatan hormat doi' Allah, huatan honda' dionji'i hidup kokal doi' Sio.

Roma 4:25

Allah monyorahan Yesus oca' Sio mati di kayu salib pakai' monanggukng hukupan dosa kito. Allah mombulah Yesus bobali' hidup oca' kito ulih monjadi bondar di hadapan-Nyo.

Roma 8:34

Conyiant ado urakng inyo ulih mohukupm kito. Obai, Kristus Yesus udah dihukupm mati pakai' kito. Malahan lobih doi' nantai agi'! Kristus udah hidup agi' huatan dudu' di tompat inyo tohormat di sopia' kanan Allah. Sio nam inyo mombela kito!

1 Korintus 1:7

Jadi, kaitn co nyiant kokurakan la'apo pan dalapm komampuan husus inyo dionju' Roh Allah. Somontaro kaitn monantian kodatakan Yesus Kristus, Tuhatn kito. Somuo urakng paca'an moniant Sio.

Galatia 3:13

Sobondarnyo, kito somuo gola' dihukupm obai kito kinyo hala ulih monaati somuo porintah huatan poraturan Allah inyo ditulis Musa dalapm buku Hukupm Torat. Apo Kristus monyolamant'an kito doi' hukupan nantai. Sio inyo monanggukng hukupan nantai pakai' kito. Watu Sio mati di kayu salib. Obai ado totulis dalapm Buku Suci, “Urakng inyo dipaku di kayu salib ia'an urakng inyo dihukupm Allah.”

Filipi 3:20

Apo, kito ninam pondudu' di sorugo. Doi' su'utan jam kito monantian Ponyolamant kito, Tuhatn Yesus Kristus, datakng agi'.

Kolose 1:18

Sio nantai kopala' bukakng-tubuh-Nyo, ia'an somuo urakng inyo pocayo ko Sio. Sio nantai puku' kohidupan boharu inyo dionji'i ko sia' nantai. Sio monjadi urakng potamo inyo bobali' hidup doi' komatian. Ongko, Sio siku' monjadi inyo palikng pontikng doi' somuo hal.

1 Tesalonika 1:7

Obai nantai, caro hidup kaitn ulih ditiru somuo urakng pocayo di propinsi Makedonia huatan Akhaya.

1 Tesalonika 2:16

obai sia' bousaha monongga'an koi oca' co momboritoan Kabar Boi' ko urakng inyo bukainyo urakng Yahudi. Sia' kinyo honda' kaitn inyo bukainyo urakng Yahudi disolamant'an! Agatn boko porbuatan nantai, sia' torus-monorus monambah dosa sia' udah langkukng-lalu ongko. Ni'in, koponsuahannyo Allah pan godi. Pasti sia' paca'an dihukupm kotakng borat.

1 Tesalonika 2:7

Apo koi kinyo molabuhan nantai. Koi bosipat lomah-lombut di antaro kaitn. Samo sama'an siku' urakng indai morawat boko poana'annyo.

1 Tesalonika 5:9

Kito gola' molabuhan nantai, obai Allah momilih kito oca' kito co kona' hukupan-Nyo. Sio momilih kito oca' kito disolamant'an molalu'i la'apo inyo dikorojoan Yesus Kristus, Tuhatn kito.

2 Timotius 4:1

Dinga'anbo! Kristus Yesus momorintah dalapm Koraja'an Allah somanah-manahnyo. Sio paca'an datakng bobali' agi' ko dunia ni'in. Watu nantai, Sio paca'an mohakipi somuo urakng, boi' urakng inyo ija' hidup honda' pan urakng inyo udah mati. Obai nantai dihadapan Kristus Yesus huatan Allah moonji'i boko potunju' ni'in ko kolai:

Titus 2:13

kapikng kito monantian ari kodatakan Allah inyo Maho Kuaso ongko Ponyolamant kito, Yesus Kristus, ia'an ari inyo kito harapan agatn rindakng-rigah,

Ibrani 10:27

Kito bayo monanti hukupan doi' Allah, ia'an api inyo honggur inyo tajahan mombonasoan somuo urakng inyo molawatn Sio!

Ibrani 9:28

Sama'an nian jam, Kristus momposombahan diri-Nyo sokali mo pakai' monanggukng hukupan dosa urakng banya'. Sio paca'an datakng agi' inyo koduo kalinyo, bukainyo pakai' monanggukng dosa agi', apo pakai' monyolamant'an boko urakng inyo monantian kodatakan Sio.

1 Petrus 1:21

Ia'an, kaitn dapat monjadi pocayo ko Allah obai porbuatan Kristus nantai. Allah udah bulah Sio hidup agi' doi' antaro urakng mati lalu mombulah Sio monjadi mulia. Agatn ubo nantai, kaitn pocayo huatan boharap ko Allah.

1 Petrus 1:3

Topujicam Allah, ia'an Bopai doi' Yesus Kristus, Tuhatn kito. Allah udah monunju'an koboi'an-Nyo inyo luar biaso ko kito agatn caro ni'in: Sio bulah Yesus Kristus hidup agi' doi' antaro urakng mati. Molalu'i nantai, Sio moonju' kohidupan boharu ko kito samo sama'an kito hoyu' lahir. Obai nantai, hal ni'in moonji'i kito pongharapan inyo kuat.

1 Petrus 2:21

Obai, Allah momilih kaitn pakai' nantai. Kristus siku' moonji'i contoh oca' kaitn moniru porbuatan-Nyo. Ia'an, Sio udah totap kuat mondorita' pakai' kaitn.

1 Petrus 3:18

Obai, Kristus udah mati sokali pakai' somuo dosa kito. Sio kinyo bodosa, apo Sio mati pakai' boko urakng inyo bodosa oca' Sio mombimbikng kito ko Allah. Sio inyo udah dibunuh dalapm koadaan-Nyo sobagai monsio, apo Roh Allah mombulah Sio hidup agi'.

2 Petrus 3:12

Kaitn gola' hidup sama'an nantai kapikng kaitn monanti arinyo Allah paca'an datakng. Agatn sama'an nian, kaitn mombulah ari nantai copat datakng. Pado ari nantai, langit paca'an lobur dicucul api. Somuo hal inyo ado di langit paca'an lobur obai hangantnyo api nantai.

2 Petrus 3:14

Obai nantai, boko somadikanku inyo ku kasihi, kapikng kaitn monanti pakai' somuo hal nantai tojadi, kaitn gola' bousaha oca' kaitn ado hubukan boi' agatn Allah. Kaitn gola' hidup agatn caro nantai oca' Sio moniant kaitn kinyo bodosa apo hidup suci di hadapan-Nyo.

Wahyu 1:18

Aku ninam inyo Hidup. Aku udah mati, apo porotiancam, Aku hidup pakai' somanah-manahnyo. Aku monjujut kunci huatan bokuaso tohadap komatian ongko dunia urakng mati

Wahyu 1:7

Porotiancam! Sio datakng di antaro boko awatn! Somuo urakng paca'an moniant Sio, tomansu' sia' inyo udah monuhu' Sio. Somuo banso di bumi paca'an monangis obai Sio. Au, pasti ni'in tajahan tojadi! Amin!