1 Petrus 5:8 - Porjanjian Boharu Torjomahan Baso Dilakng Soari-ari

⁸ Apo kaitn gola' hala mongondalian diri kaitn, huatan hala bojojago. Rajo Sitatn nan musuh kaitn. Sitatn honda' mohancuran kopocaya'an kaitn. Sitatn nan samo sama'an singa inyo mondorah, bojalatn kolilikng-kolimbat bogoyap urakng inyo ulih ditolatnnyo.

1 Petrus 5:8 ပူးပေါင်းရင်းမြစ်များ

Matius 13:39

Musuh inyo moabur bonih solalakng nantai monggambaran Rajo Sitatn. Watu bohanyi nantai monggambaran ahir joman. Ongko boko urakng bohanyi nantai monggambaran boko molekat.

Matius 24:42

Obai nantaiam, bojojagocam! Kaitn co tohu sombilo Tuhatn kolai datakng.

Matius 25:41

Lopas nian, Rajo nantai paca'an bopandir ko boko urakng di sopia' kiba'nyo, ‘Hingkascam doi' pohadapan-Ku, kaitn inyo dihukupm! Mansu' cam ko dalapm api inyo co kalo buta' ia'an nantai tompat inyo udah disiapan pakai' Rajo Sitatn huatan boko molekatnyo.

Matius 4:1

Lopas nantai, Roh Allah moirikan Yesus ko padakng pasir inyo langunt oca' dicubo'i Rajo Sitatn.

Matius 4:11

Pas, Rajo Sitatn moninggalan Yesus. Ongko boko molekat datakng molayati Sio.

Markus 4:15

Tanah di jalatn nantai monggambaran boko urakng inyo mondinga'an Pomandiran Allah. Apo, lansukng Rajo Sitatn datakng ongko mombulah sia' tongkolupatn Pomandiran Allah, sampai hati sia' kinyo pocayo.

Lukas 21:34

“Jagocam diri kaitn. Jangan sampai ado boko hal di dunia ni'in inyo moncaci' pikiran kaitn, ubo mabu', porbuatan jahat inyo dilabuhan aman udah komabu'an, boko mosalah kohidupan ni'in. Aman pikiran kaitn samaꞌan nian, nononyo kaitn co siap timpu ari nantai datakng. Obai ari nantai tajahan datakng pakai' somuo urakng, conyiant inyo tohu, samo samaꞌan joyat ntobukan mongujut bonatakng.

Lukas 21:36

Jadi, kaitn gola' hala monjago diri. Bodoacam oca' kaitn totap pocayo ko Allah, watu kaitn mohadapi ajab sonsaro inyo co manah agi' tajahan tojadi. Lalu kaitn paca'an tenang watu Ana' Monsio bobali' ko dunia ni'in, moadili somuo urakng am.”

Lukas 22:31

Lopas nian Yesus bopandir ko Simon Petrus, “Simon, Simon! Dinga'anbo! Rajo Sitatn udah monuntut ko Allah oca' molalu'i kosusahan io ulih monyongkayoan rasul inyo sotia doi' inyo kinyo sotia, samo samaꞌan potani monyongkayoan gandupm doi' kopunyo. Allah udah moijitan Rajo Sitatn molabuhan hal nantai.

Yohanes 8:44

Kaitn ninam boko poana'an Rajo Sitatn! Io nam bopai kaitn nan. Kaitn honda' monuruti kohonda' bopai kaitn nantai. Doi' mulonyo io nam pombunuh. Io co kalo ado hubukan agatn boko hal inyo bondar obai conyiant ado inyo bondar di dalapm dirinyo. Pas io bulah kotumbukan, nantai wajar, obai sipatnyo ongkah bulah kotumbukan nam. Sio nianam bopai boko tumbukan.

2 Korintus 2:11

Kito gola' moamputi oca' Rajo Sitatn kinyo mongacauan kito, obai kito tohu boko hajatnyo.

Efesus 4:27

Jangan molongahan Rajo Sitatn pakai' mombulah kaitn bodosa.

Efesus 6:11

Kaitn gola' momakai somuo sonjato inyo dionju' Allah ko kaitn oca' kaitn dapat botahatn molawatn boko hajat inyo dipulah Rajo Sitatn pakai' monipu kaitn.

1 Timotius 2:15

Biar pan Hawa bodosa boko botina' ulih disolamant'an agatn molahiran ana'. Aman sia' hala pocayo ko Yesus, aman sia' mongasihi urakng bukai, huatan aman sia' hidup agatn caro inyo suci huatan ulih monjago dirinyo.

1 Timotius 2:9

Aku pan muhun ko somuo botina' pakai' bopakaian agatn caro inyo boi', sederhana, ongko sopatn. Jangan moatur rambut kaitn agatn caro inyo bolobihan. Jangan momakai pohiasan omas damo mutiara. Jangan momakai pakai'an inyo bokomahalan.

1 Timotius 3:11

Ubo nian jam, bini boko diakon gola' hidup agatn caro inyo boi'. Sia' gola' tohormat. Sia' co ulih hala bojahat urakng. Sia' gola' mongondalian diri. Sia' pan gola' dapat dipocayo'i dalapm somuo hal.

1 Timotius 3:2

Obai nantai, siku' urakng ponotua' gola' hidup agatn caro inyo boi'. Io gola' hidup bujur bondar oca' urakng bukai co ulih monyalahan io. Io co ulih bisi bini lobih doi' siku'. Io gola' ulih mongondalian dirinyo. Io gola' pintar-corodi' huatan sopatn. Io gola' agatn coraca'an moonji'i koluntukan. Io gola' mampu mongajar urakng agatn boi'.

2 Timotius 4:17

Apo, watu nantai, Tuhatn monyoroto'iku. Sio moonji'i kokuatan ko aku. Obai nantai, aku ulih momboritoan Kabar Boi' ko urakng inyo bukainyo urakng Yahudi. Watu nantai, aku co dihukupm mati samo sama'an lopas doi' tontorokapan bonatakng buas.

Titus 1:8

Apo, io agatn coraca'an ulih moonji'i tumpakan ongko gala' bulah koboi'an. Io gola' pintar-corodi', hidup bondar di hadapan Allah, co bulah dosa, ongko ulih mongondalian dirinyo.

Titus 2:12

Agatn caro nantai, Allah mongajar kito oca' kito botongga' molabuhan boko hal inyo kinyo monyonangan Sio, ongko oca' kito botongga' jumpat kohonda' jahat dunia ni'in. Sio mongajar kito oca' kito mampu monahan diri kito, oca' kito hidup agatn caro inyo bondar di hadapan Sio, ongko oca' kito hidup sosuai agatn kohonda' Sio. Kito bolajar caro hidup sama'an nantai watu joman ni'in,

Titus 2:2

Ajaricam boko lolaki inyo udah tuho oca'nyo ulih monahan diri sia'. Sia' gola' sopatn ongko pintar-corodi'. Sia' gola' totap pocayo ko Yesus, mongasihi Allah ongko urakng bukai, huatan botahatn dalapm mohadapi ajab sonsaro.

Titus 2:4

Agatn caro nantai boko botina' inyo udah tuho nantai ulih mondidik boko botina' inyo ija' muda' oca' sia' mongasihi laki sia' ongko boko poana'an sia',

Titus 2:6

Sama'an nian jam boko lolaki inyo ija' muda'. Padahicam ongko onji'i nosihat ko sia' oca' ulih monahan diri sia' dalapm hal la'apo pan.

Yakobus 4:7

Obai nianam, turuti kohonda' Allah huatan lawatncam kohonda' Rajo Sitatn, lalu io paca'an botongga' moncubo bulah kaitn bodosa.

1 Petrus 1:13

Obai somuo nantai, kaitn gola' bosiap-siap dalapm akal budi kaitn huatan hala mongondalian diri oca' monyonangan Tuhatn. Nononyo, Yesus Kristus tajahan datakng agi' monyatoan diri-Nyo. Timpu nantai, kaitn tajahan disolamant'an. Jadi, kaitn gola' bobondar boharap agatn koboi'an Allah nantai.

1 Petrus 4:7

Boko somadikan ahir dunia ni'in udah dampikam. Obai nantai, kaitn gola' kondalian diri kaitn, ongko hala siap oca' kaitn ulih bodoa.

Wahyu 12:10

Lalu, aku mondinga' saro inyo borakng di sorugo. Katonyo, “Ninam watunyo Allah monyolamant'an umat-Nyo! Ninam watunyo Allah monunju'an kuaso-Nyo. Ninam watunyo Allah kito moninjakan Korajaan-Nyo. Ninam watunyo Rajo Inyo Dijanjian Allah momorintah agatn kuaso-Nyo. Obai, Rajo Sitatn udah ditikapan doi' sorugo. Sio culih agi' monuntut boko somadikan kito siakng huatan malapm di hadapan Allah kito.

Wahyu 12:12

Obai nantai, sonang-asau cam sorugo huatan kaitn bodiapm di dalapmnyo! Apo bonasoam kaitn di bumi huatan lout! Obai Rajo Sitatn udah turutn ko kaitn. Io kotakan godi obai io tohu co manah agi' io kinyo paca'an bokuaso di dunia.”

Wahyu 12:9

(Nago bosar nantai ia'an ular inyo monipu doi' joman komai. Io jam disobut Si Iblis damo Rajo Sitatn. Io inyo monipu somuo urakng di dunia.) Io ditikapan ko bumi bososamo agatn somuo molekatnyo.

Wahyu 20:10

Rajo Sitatn inyo monipu sia' nantai, paca'an ditikapan ko dalapm loutan api ongko bolerang, tompat bonatakng ongko nabi palsu nantai. Sia' somuo paca'an disiksa siakng-malapm pakai' somanah-manahnyo.

Wahyu 20:2

Io monangkap nago nantai, ia'an ular nantai doi' joman komai, Si ular tuho, ia'an Si Iblis, Rajo Sitatn. Molekat nantai mongobat Rajo Sitatn, ditikapannyo ko dalapm Jurakng Maut, lalu mongunci lawakngnyo pakai' soribu tohutn manahnyo. Rajo Sitatn ditahatn disiatntai oca' culihnyo monipu somuo urakng di dunia sampai masa soribu tohutn nantai udah habis. (Lopas nian, io paca'an dilopasan agi', apo ongkah pakai' watu inyo kinyo manah).