1 Petrus 3:5 - Porjanjian Boharu Torjomahan Baso Dilakng Soari-ari

⁵ Caro hidup nantai samo agatn caro hidup boko botina' doi' joman komai inyo monyombah Allah, ia'an boko botina' inyo boharap ko Allah. Sia' bulah diri sia' boi' agatn caro mohormati laki sia' sobagai kopala' koluarga.

1 Petrus 3:5 ပူးပေါင်းရင်းမြစ်များ

Kisah Boko Rasul 1:14

Bosamo agatn sia' ado jam boboropo botina' tomansu' Maria (indai Yesus), ongko boko somadikan Yesus. Sia' somuo opat bokumpul pakai' bodoa. Sia' hala bodoa ongko sohati sopikiran.

Kisah Boko Rasul 9:36

Kinyo jouh doi' santai di kota Yope ado siku' urakng botina'. Damonyo Tabita. (Dalapm baso Yunani damo nantai disobut Dorkas.) Dorkas nantai urakng inyo pocayo agatn Yesus. Io hala bulah koboi'an agatn urakng bukai. Io pan opat monulukng urakng jaro.

Efesus 5:33

Biar pan sama'an nantai, ado jam rotinyo pakai' kaitn siku'-monyiku': Sotiap laki gola' mongasihi bininyo sama'an io mongasihi dirinyo siku'. Sotiap bini gola' mohormati lakinyo.

1 Timotius 2:10

Apo caro inyo bondar bopakaian agatn bulah koboi'an. Caro nianam inyo soharusnyo dilabuhan somuo botina' inyo mongaku'i obai sia' monyombah Allah.

1 Timotius 2:15

Biar pan Hawa bodosa boko botina' ulih disolamant'an agatn molahiran ana'. Aman sia' hala pocayo ko Yesus, aman sia' mongasihi urakng bukai, huatan aman sia' hidup agatn caro inyo suci huatan ulih monjago dirinyo.

1 Timotius 5:10

Botina' balu nantai gola' dikonal sobagai urakng inyo hala bulah koboi'an. Contohnyo: io mombosaran poana'annyo agatn caro boi', io gola' agatn coraca'an bosodia moonji'i koluntukan, io gola' rondah hati molayati boko urakng pocayo huatan mombasu'i kaki sia', io gala' monulukng urakng inyo moalapi kosusahan. Io gola' moutamoan boko porbuatan boi' sama'an nantai dalapm kohidupannyo.

1 Timotius 5:5

Siku' botina' balu inyo bondar-bondar gola' ditulukng doi' jomaat ia'an botina' balu inyo hidup sonsiku'an, co nyiant koluarga pakai' monulukng io. Io boharap ko Allah. Io bodoa siakng-malapm mominto potulukan doi' Allah.

Ibrani 11:11

Obai Abrahapm pocayo, jadi io mampu mondapat koturutan biar pan io kotakng tuho am. Sama'an nian jam bininyo, Sara, manang. Apo, Abrahapm totap yakitn Allah tajahan monopat'i janji-Nyo.

1 Petrus 1:3

Topujicam Allah, ia'an Bopai doi' Yesus Kristus, Tuhatn kito. Allah udah monunju'an koboi'an-Nyo inyo luar biaso ko kito agatn caro ni'in: Sio bulah Yesus Kristus hidup agi' doi' antaro urakng mati. Molalu'i nantai, Sio moonju' kohidupan boharu ko kito samo sama'an kito hoyu' lahir. Obai nantai, hal ni'in moonji'i kito pongharapan inyo kuat.