1 Petrus 2:9 - Porjanjian Boharu Torjomahan Baso Dilakng Soari-ari

⁹ Apo kaitn nam banso inyo dipilih Allah. Kaitn nam boko urakng inyo molayati Kristus, samo sama'an boko imam molayati rajo. Kaitn nam umant husus umputn Allah, boko urakng inyo ado hubukan agatn Allah siku'. Allah momilih kaitn oca' kaitn ulih momboritoan mongona'i somuo porbuatan bosar inyo Sio labuhan, ia'an Sio inyo moningkau kaitn koluar doi' kogolapan, lalu mansu' ko dalapm torakng-Nyo inyo luar biaso. Samo sama'an inyo totulis di dalapm Buku Suci,

1 Petrus 2:9 ပူးပေါင်းရင်းမြစ်များ

Wahyu 1:6

Sio bulah kito monjadi sobuah banso, boko imam inyo molayati Allah, Bopai-Nyo. Yesusnam inyo mulia ongko bokuaso somanah-manahnyo. Amin!

Wahyu 5:10

Duatn udah mombulah sia' monjadi Koraja'an Allah, huatan mombulah sia' monjadi boko imam inyo molayati Allah. Sia' paca'an momorintah sobagai rajo di bumi.”

2 Timotius 1:9

Allah udah monyolamant'an huatan momilih kito, oca' kito hidup husus pakai' Sio. Sio molabuhan nantai bukainyo obai kito udah bulah koboi'an. Apo obai nantai udah hajat huatan koboi'an-Nyo. Koboi'an nantai Sio onju' molalu'i Kristus Yesus sobolupm dunia ni'in dipulah.

1 Petrus 2:5

Kaitn pan samo sama'an boko batu inyo hidup, ia'an boko batu inyo digunoan pakai' bulah Rumah Allah inyo Rohani. Sio momilih kaitn pakai' monjadi samo sama'an boko imam inyo husus pakai' molayati Sio. Jadi, kaitn gola' mombaba' boko poonju' pakai' monyombah Allah, ia'an boko posombahan rohani inyo monyonangan hati Allah obai Yesus Kristus.

Titus 2:14

Yesus monyorahan diri sampai mati. Agatn caro nantai, Sio mombebasan kito doi' boko kojahatan. Sio jam bulah kito borosih doi' boko dosa kito oca' kito monjadi boko urakng umputn Sio siku', ia'an boko urakng inyo bondar-bondar totap hala bulah koboi'an.

Kisah Boko Rasul 26:18

Kolai paca'an monulukng sia' oca' mongoroti jadi sia' co hidup dalapm kopocaya'an inyo salah, apo bobali' pocayo inyo bondar. Kolai paca'an monulukng sia' oca' mongoroti jadi sia' kinyo hidup dibabah kuaso Iblis agi', apo bobali' ongko hidup di babah kuaso Allah. Agatn ubo nian, aman sia' pocayo agatn Aku, ongko boko dosa sia' paca'an diamputi. Sia' mondapat tompat di antaro umant Allah.’ Nanam pomandiran Yesus ko Aku.

Wahyu 20:6

Sonang-nyaman boko urakng inyo bobali' hidup agi' watu tahap potamo ni'in. Sia' nianam boko urakng inyo husus umputn Allah. Sia' kinyo paca'an moalapi komatian koduo kalinyo, ia'an mati somanah-manahnyo. Apo sia' paca'an monjadi boko imam inyo molayati Allah ongko Kristus. Sia' paca'an momorintah bosamo Sio somanah soribu tohutn nantai.

Matius 5:16

Porbuatan boi' kaitn samo sama'an torakng. Jadi, kaitn gola' bulah koboi'an di hadapan urakng oca' sia' ulih moniant nantai. Lalu sia' paca'an momuji Allah Bopai kaitn di sorugo.”

Kolose 1:13

Komai, kito di babah kuaso jahat. Apo Sio molopasan kito doi' nantai. Sio bulah kito monjadi anggota dalapm Koraja'an Ana'-Nyo inyo Sio kasihi.

1 Korintus 3:17

Nantai tompat kodiapan husus umputn Allah. Obai nantai, aman ado urakng inyo mombonasoan Rumah Allah nantai, Allah paca'an mombonasoan io. Kaitn somuo ia'an Rumah Allah nantai.

Kisah Boko Rasul 20:28

Kaitn gola' monjago diri kaitn huatan urakng bukai inyo udah pocayo agatn Yesus oca' totap pocayo. Allah udah monobus monsio doi' hukupan dosa agatn darah-Nyo sikuꞌ. Jadi, sia' udah monjadi umant Allah siku'. Kaitn udah dipilih Roh Allah pakai' momimpitn sia' nantai. Obai nantai, kaitn gola' monjago sia' samo sama'an gombala monjago kabatn dombanyo.

Filipi 3:14

Aku samo sama'an urakng dalapm polomba'an inyo bonggidi'an oca' mondapat'an hadiahnyo. Hadiahku ia'an Allah moningkauku pakai' hidup bosamo agatn Sio di sorugo. Nantai ulih tojadi ongkah obai Kristus Yesus.

Matius 4:16

Banso inyo hidup dalapm potakng, udah moniant Torakng inyo bosar huatan torakng udah timbul pakai' sia' inyo hidup dalapm bayakng-bayakng komatian.”

1 Petrus 1:2

Allah, Bopai kito, momilih kaitn sosuai agatn roncana-Nyo. Roh Allah mombulah kaitn monjadi borosih doi' dosa oca' kaitn monaati Yesus Kristus. Allah molabuhan nantai jam oca' kaitn ulih monorima' hasil doi' darah Yesus Kristus inyo dicurahan ko kaitn watu Sio mati di kayu salib. Aku bodoa oca' Allah monunju'an koboi'an ongko moonji'i sonang-asau ko kaitn agatn bolimpah.

Roma 9:24

ia'an kito inyo udah ditingkau Allah pakai' monjadi umat-Nyo, bukainyo bayo urakng doi' banso Yahudi, apo urakng doi' boko banso inyo bukai jam.

Kisah Boko Rasul 26:28

Ongko Agripa bopandir, “Jangan bopikir kolai ulih mongkongkanti'iku monjadi urakng Kristen dalapm watu socopat ni'in.”

1 Petrus 4:11

Aman ado urakng inyo dionji'i komampuan pakai' bopandir, io gola' bopandir monyampaian Pomandiran Allah. Aman ado urakng inyo dionji'i komampuan pakai' molayati urakng bukai, io gola' molayati agatn kokuatan inyo Allah onju' ko io. Pakaicam somuo komampuan kaitn oca' urakng bukai momuliaan Allah obai Yesus Kristus inyo bulah somuo nantai dapat tojadi. Sionam inyo mulia ongko bokuaso somanah-manahnyo. Amin!

Efesus 1:6

Sio molabuhan nantai oca' kito momuji kasih karunia-Nyo inyo Sio tunju'an ko kito, ia'an molalu'i la'apo inyo dilabuhan ulih Ana'-Nyo inyo dikasihi-Nyo.

Efesus 1:14

Roh inyo dionju'Nyo ko kito ia'an jaminan obai Sio paca'an hala moonji'i ko kito somuo inyo Sio janjian, sampai nononyo kito inyo monjadi umant umputn-Nyo dibebasan doi' dosa. Obai nantai, Allah patut dipuji obai Sio mulia.

Yohanes 17:19

Aku monyorahan bukakng-tubuh-Ku monjadi husus umputn Duatn ja'am, oi Bopai. Aku molabuhan nantai pakai' sia', oca' sia' pan ulih monjadi husus umputn Duatn agatn momakai ajaran inyo bondar.”

Efesus 3:21

Topujiam Sio obai Sio mulia! Kohonda'nyo Allah dipuji obai Kristus Yesus ongko di dalapm boko urakng inyo pocayo ko Sio. Kohonda'nyo Allah dipuji turutn-tomurutn sampai somanah-manahnyo. Amin!