1 Petrus 2:5 - Porjanjian Boharu Torjomahan Baso Dilakng Soari-ari

⁵ Kaitn pan samo sama'an boko batu inyo hidup, ia'an boko batu inyo digunoan pakai' bulah Rumah Allah inyo Rohani. Sio momilih kaitn pakai' monjadi samo sama'an boko imam inyo husus pakai' molayati Sio. Jadi, kaitn gola' mombaba' boko poonju' pakai' monyombah Allah, ia'an boko posombahan rohani inyo monyonangan hati Allah obai Yesus Kristus.

1 Petrus 2:5 ပူးပေါင်းရင်းမြစ်များ

Roma 12:1

Obai somuonyo nantai, boko somadikan, ni'in aku kotakan muhun ko kaitn: Obai Allah monunju'an kasih-Nyo ko kaitn, jadi kaitn gola' monyorahan diri kaitn ko Sio samo sama'an kurbatn posombahan inyo hidup. Kaitn gola' hidup agatn caro inyo borosih doi' dosa ongko monyonangan Sio. Nianam caro inyo bondar pakai' monyombah Sio.

Roma 15:16

ia'an nantai Sio moutus aku monjadi urakng inyo molayati Kristus Yesus di antaro boko banso bukainyo banso Yahudi. Aku samo sama'an imam inyo moonju' posombahan ko Allah. Obai, aku momboritoan Kabar Boi' doi' Allah ko sia' oca' sia' ulih ditorima' Allah obai Roh Allah bulah sia' monjadi borosih doi' dosa.

1 Korintus 3:16

Inyo gola' kaitn kotohu'i kaitn samo sama'an Rumah Allah huatan Roh Allah bodiapm di antaro kaitn somuo.

1 Korintus 6:19

Co tohu bai kaitn aman bukakng-tubuh kaitn masikng-masikng samo sama'an rumah pakai' Roh Allah. Huatan Roh Allah udah moonji'i Roh-Nyo pakai' bodiapm dalapm kaitn. Rotinyo kaitn bukai umputn kaitn siku' agi'.

2 Korintus 6:16

Co mungkitn Rumah Allah bohubukan agatn berhala. Allah hala ada'an di antaro kito. Jadi, kito samo sama'an Rumah umputn Allah inyo hidup. Samo sama'an pandir Allah inyo ditulis di Buku Suci, “Aku tajahan diapm di antaro sia'. Aku tajahan hidup bosamo-samo agatn sia'. Aku tajahan monjadi Allah sia'. Sia' tajahan monjadi umant-Ku.”

Galatia 6:10

Obai nantai, huncapm kito bulah koboi'an sotiap kali ado kosompatan. Huncapm kito bulah koboi'an ko somuo urakng, hususnyo ko sosamo urakng inyo pocayo agatn Yesus.

Filipi 1:11

Hidup kaitn tajahan molimpah agatn porbuatan inyo bondar-bondar boi' inyo ongkah ulih dihasilan Yesus Kristus. Jadi Allah tajahan dipuji ongko dimuliaan.

Filipi 2:17

Apo, aku tajahan totap sonang-nyamanam aman aku dibunuh. Obai, kaitn pocayo ko Kristus ongko hidup molayati-Nyo. Kaitn monjadi samo sama'an kurbatn posombahan ko Allah. Aman aku dibunuh, rotinyo darahku ditumpahan di pucu' posombahan kaitn nantai. Jadi, aku sonang-nyamanam ongko aku tuyut sonang-nyamanam jam agatn kaitn.

Filipi 4:18

Ni'in, aku udah ado somuo inyo ku pontikan, malahan lobih doi' nantai, obai aku udah monorima' doi' Epafroditus somuo inyo kaitn kiripan. Allah sonang agatn poonju' kaitn nantai inyo samo sama'an posombahan inyo bou harupm damo kurbatn bonatakng inyo Sio torima' agatn sonang hati.

Kolose 3:17

Nanam, somuo inyo kaitn labuhan, somuo inyo kaitn pandiran, kaitn gola' molabuhan somuonyo nantai agatn kuaso Yesus, Tuhatn kito. Labuhancam somuonyo kapikng bosukur ko Allah Bopai kito molalu'i Yesus sobagai porontaro.

Ibrani 3:6

Apo Kristus sotia sobagai Ana' inyo bokuaso agatn rumah Allah, ia'an kito. Kito ia'an rumah-Nyo aman kito totap kuat pocayo ko Yesus huatan yakitn moharap'an agatn somuo hal inyo paca'an dionju' Sio ko kito nononyo. Somuo hal nantai mombulah hati kito rindakng.

1 Petrus 2:9

Apo kaitn nam banso inyo dipilih Allah. Kaitn nam boko urakng inyo molayati Kristus, samo sama'an boko imam molayati rajo. Kaitn nam umant husus umputn Allah, boko urakng inyo ado hubukan agatn Allah siku'. Allah momilih kaitn oca' kaitn ulih momboritoan mongona'i somuo porbuatan bosar inyo Sio labuhan, ia'an Sio inyo moningkau kaitn koluar doi' kogolapan, lalu mansu' ko dalapm torakng-Nyo inyo luar biaso. Samo sama'an inyo totulis di dalapm Buku Suci,

1 Petrus 4:11

Aman ado urakng inyo dionji'i komampuan pakai' bopandir, io gola' bopandir monyampaian Pomandiran Allah. Aman ado urakng inyo dionji'i komampuan pakai' molayati urakng bukai, io gola' molayati agatn kokuatan inyo Allah onju' ko io. Pakaicam somuo komampuan kaitn oca' urakng bukai momuliaan Allah obai Yesus Kristus inyo bulah somuo nantai dapat tojadi. Sionam inyo mulia ongko bokuaso somanah-manahnyo. Amin!

1 Petrus 4:17

Ni'in, udah tuntukam watu Allah mohakipi somuo urakng. Sio mula'i agatn kito, ia'an boko urakng husus umputn Sio siku'. Aman ubo nantai, lapo inyo tajahan tojadi ko boko urakng inyo co pocayo Kabar Boi' doi' Allah? Pasti sia' pan paca'an dihukupm.

Wahyu 1:6

Sio bulah kito monjadi sobuah banso, boko imam inyo molayati Allah, Bopai-Nyo. Yesusnam inyo mulia ongko bokuaso somanah-manahnyo. Amin!

Wahyu 20:6

Sonang-nyaman boko urakng inyo bobali' hidup agi' watu tahap potamo ni'in. Sia' nianam boko urakng inyo husus umputn Allah. Sia' kinyo paca'an moalapi komatian koduo kalinyo, ia'an mati somanah-manahnyo. Apo sia' paca'an monjadi boko imam inyo molayati Allah ongko Kristus. Sia' paca'an momorintah bosamo Sio somanah soribu tohutn nantai.

Wahyu 3:12

Boko urakng inyo monang, Aku paca'an bulah sia' monjadi boko tihakng dalapm Rumah Allah-Ku. Sia' paca'an bodiapm di su'utan soumur hidupnyo. Aku pan paca'an monulis damo Allah-Ku dibukakng sia', damo kota Allah-Ku, ia'an nantai kota Yerusalem boharu inyo turutn doi' sorugo doi' Allah-Ku. Aku pan paca'an monulis damo-Ku inyo boharu di bukakng sia'.

Wahyu 5:10

Duatn udah mombulah sia' monjadi Koraja'an Allah, huatan mombulah sia' monjadi boko imam inyo molayati Allah. Sia' paca'an momorintah sobagai rajo di bumi.”