1 Petrus 2:24 - Porjanjian Boharu Torjomahan Baso Dilakng Soari-ari

²⁴ Kristus siku' pan udah monanggukng hukupan dosa kito watu Sio mati di kayu salib. Sio molabuhan nantai oca' kito jangan bulah dosa agi', oca' kito dapat hidup agatn caro inyo bondar di hadapan Allah. Obai boko luko Kristus, kaitn monjadi nyamanam.

1 Petrus 2:24 ပူးပေါင်းရင်းမြစ်များ

Matius 27:26

Lalu, Pilatus mombebasan Barabas obai porminta'an sia'. Apo Yesus dicambuk. Lalu Pilatus monyorahan Yesus ko boko projuritnyo pakai' dihukupm mati di kayu salib.

Matius 5:20

Dinga'anbo ni'in: Kaitn gola' hidup bujur bondar di hadapan Allah, lobih daripado boko guru agama Yahudi, huatan lobih daripado pomimpitn agama Yahudi doi' kolompok Farisi. Aman cado, kaitn kinyo paca'an mansu' ko dalapm Koraja'an Sorugo.”

Matius 8:17

Poristiwa nantai tojadi oca' pomandiran Allah monjadi nyata. Timpu joman komai Nabi Yesaya monulis pomandiran Allah nantai dinga' ni'innan bunyinyo: “Sio nanam monanggukng ajab sonsaro kito huatan monyamani ponyakit kito.”

Markus 15:15

Obai Pilatus honda' monyonangan urakng banya' nantai, jadi io molopasan Barabas obai porminta'an sia'. Apo Yesus dicambuk. Lalu Pilatus monyorahan Yesus ko boko projuritnyo oca' dihukupm mati di kayu salib.

Lukas 4:18

“Roh Tuhatn Allah ado di Aku, obai Sio momilih Aku pakai' monyampaian kabar boi' ko boko urakng jaro; Sio moutus Aku pakai' mongabaran

Yohanes 1:29

Kohobu'annyo, Yohanes moniant Yesus datakng ko io. Yohanes bopandir, “Tiat! Numbo, Ana' Domba inyo diutus Allah oca' mohapus dosa dunia.

Yohanes 19:1

Lalu, Pilatus mansu' ongko monyiuh oca' Yesus dihombat.

Kisah Boko Rasul 10:35

Apo Allah monorima' boko urakng doi' banso mono ja'. Allah paca'an monorima' boko urakng aman sia' mohormati Sio huatan molabuhan inyo bondar.

Kisah Boko Rasul 10:39

Yesus molabuhan polayatan-Nyo di soluruh doerah urakng Yahudi, tomansu' kota Yerusalem. Koi boko rasul-Nyo moniant agatn mato koi siku' somuo polayatan-Nyo nantai. Di kota Yerusalem nantai, boko urakng mombunuh Sio di kayu salib.

Kisah Boko Rasul 13:29

Apo sia' co tohu hal nantai. Lopas somuo posatn mongona'i Yesus udah digonapi, sia' monurutan Sio doi' kayu salib. Ongko sia' momasar bangkai-Nyo di dalapm gua batu.

Kisah Boko Rasul 5:30

Kaitn udah monula' Yesus huatan mohukupm mati Sio di kayu salib sama'an urakng jahat. Apo Allah inyo disombah angki-bayatn kito udah bulah Sio hidup agi' doi' komatian.

Roma 6:11

Kaitn gola' moniant diri kaitn sama'an nantai jam. Kaitn udah mati tohadap dosa huatan kaitn hidup pakai' monyonangan Allah obai kaitn ado hubukan agatn Kristus Yesus.

Roma 6:13

Jangan tundu' ko kuaso dosa huatan mombiaran dosa momakai boko anggota bukakng kaitn sama'an alat pakai' bulah kojahatan. Hidup kaitn inyo manah nantai udah mati. Watu ni'in, kaitn dionji'i hidup boharu. Jadi, tundu' ko kuaso Allah huatan mombiaran Sio momakai boko anggota bukakng kaitn sama'an alat pakai' bulah inyo bondar.

Roma 6:16

Kaitn tontu tohu ni'in: aman kaitn monyorahan diri kaitn ko siku' urakng huatan monaati io, boroti kaitn ia'an hulutn urakng nantai. Kaitn ulih monjadi hulutn dosa ongko akibatnyo kaitn paca'an mati socaro rohani. Damo kaitn ulih monaati Allah agatn akibatnyo kaitn paca'an bulah inyo bondar.

Roma 6:2

Samo sokali cado! Kito udah moninggalan caro hidup inyo manah, samo sama'an kito mati tohadap dosa. Jadi, jangannam kito ija' hidup agatn hala mombulah dosa!

Roma 6:22

Apo watu ni'in, kaitn udah bebas doi' kuaso dosa. Kaitn monjadi hulutn Allah. Kaitn ulih hidup borosih doi' dosa. Caro hidup nantai ado hasil, ia'an kaitn mondapat'an hidup inyo kokal.

Roma 6:7

Obai, dosa kinyo ulih monguaso'i urakng inyo udah mati.

Roma 7:6

Apo watu ni'in, kito dibebasan. Kito kinyo tokobat agi' ko Hukupm Torat obai caro hidup kito inyo manah nantai udah mati. Watu ni'in, kito hidup agatn caro inyo boharu. Kito molayati Allah bukainyo agatn caro hidup inyo monuruti Hukupm Torat inyo totulis apo agatn caro hidup inyo monuruti Roh Allah.

1 Korintus 15:3

Aku udah monorima' Kabar Boi' ongko aku monyampaian nantai ko kaitn. Inyo kotakan pontikng doi' Kabar nantai ia'an boko kojadian ni'in: Kristus udah mati obai boko dosa kito. Hal nantai sama'an inyo ditulis dalapm Buku Suci.

2 Korintus 6:17

Obai nantai am, Tuhatn Allah bopandir, “Koluar cam doi' boko urakng inyo kinyo pocayo agatn Aku. Songkayoan diri kaitn doi' sia'. Jangan moncama' boko hal inyo campah. Aman kaitn molabuhan boko porintah-Ku nantai, jadi Aku tajahan monorima' kaitn.

Galatia 3:13

Sobondarnyo, kito somuo gola' dihukupm obai kito kinyo hala ulih monaati somuo porintah huatan poraturan Allah inyo ditulis Musa dalapm buku Hukupm Torat. Apo Kristus monyolamant'an kito doi' hukupan nantai. Sio inyo monanggukng hukupan nantai pakai' kito. Watu Sio mati di kayu salib. Obai ado totulis dalapm Buku Suci, “Urakng inyo dipaku di kayu salib ia'an urakng inyo dihukupm Allah.”

Efesus 5:9

Obai ni'inan, hasil doi' caro hidup dalapm torakng nantai: urakng nantai bulah koboi'an, bondar di hadapan Allah, huatan moikuti ajaran inyo bondar.

Filipi 1:11

Hidup kaitn tajahan molimpah agatn porbuatan inyo bondar-bondar boi' inyo ongkah ulih dihasilan Yesus Kristus. Jadi Allah tajahan dipuji ongko dimuliaan.

Kolose 2:14

Gambarannyo sama'an ni'in: Somuo dosa kito tocatat dalapm surat hutakng inyo molawatn huatan moancapm kito. Apo Allah mohancuran surat nantai watu Yesus dipaku di kayu salib.

Kolose 2:20

Kaitn udah dibebasan doi' kuaso boko roh dunia ni'in. Kaitn moanggap kohidupan inyo manah nantai udah mati, ubonyo kaitn mati bosamo-samo agatn Kristus. Jadi, jangan kaitn hidup sama'an urakng inyo dikuaso'i ulih boko poraturan di dunia ni'in!

Kolose 3:3

Obai, caro hidup kaitn inyo manah nantai udah mati. Kaitn dionji'i hidup inyo boharu. Kristus ia'an puku' hidup kaitn nantai. Ni'in, hidup kaitn nantai tobumbutn bosamo Kristus di dalapm Allah. Apo, watu Kristus bobali' agi' ko dunia ni'in, urakng bukai paca'an moniant hidup kaitn bosamo Sio dalapm komulia'an.

Ibrani 10:10

Obai, memang Yesus Kristus udah molabuhan kohonda' Allah. Ia'an, Sio momposombahan bukakng-tubuh-Nyo siku' sokali mo pakai' somanah-manahnyo. Sio molabuhan nantai oca' kito di borosihi doi' dosa kito.

Ibrani 10:5

Obai nantai am watu Kristus datakng ko dunia ni'in, Sio bopandir ko Allah, “Duatn kinyo mohonda'i kurbatn bonatakng ongko posombahan. Duatn kinyo sonang agatn posombahan inyo ditunu'i. Duatn kinyo sonang agatn kurbatn bonatakng inyo di onju' oca' dosa urakng diamputi. Apo Duatn udah moonju' bukakng-tubuh pakai'-Ku.

Ibrani 12:13

Totap bojalatn cam di jalatn inyo rato oca' kaki kaitn inyo timpakng jangan tokosilap, apo malah monjadi nyaman-boi'.

Ibrani 7:26

Nantai am Imam Agukng inyo kito pontikan. Sio suci, kinyo kalo bulah dosa damo kosalahan. Sio disongkayoan doi' boko urakng bodosa huatan diangkat ko tompat inyo kotakng tinggi di sorugo.

Ibrani 9:28

Sama'an nian jam, Kristus momposombahan diri-Nyo sokali mo pakai' monanggukng hukupan dosa urakng banya'. Sio paca'an datakng agi' inyo koduo kalinyo, bukainyo pakai' monanggukng dosa agi', apo pakai' monyolamant'an boko urakng inyo monantian kodatakan Sio.

Yakobus 5:16

Obai nianam, kaitn gola' hala moaku'i dosa agatn siku'-monyiku' huatan hala mondoa'an oca' kaitn dinyamani. Urakng inyo hidup bondar di hadapan Allah, doanyo kotakan bokuaso huatan boguno.

1 Yohanes 2:29

Kaitn tohuam obai Kristus hidup bondar di hadapan Allah. Jadi, kaitn pan tohu obai sotiap urakng inyo hidup bondar nian ia'an ana' Allah.

1 Yohanes 3:7

Boko poana'anku! Jangan pocayo agatn ajarannyo salah doi' sopo pan. Urakng inyo hidup bondar di hadapan Allah nianam urakng inyo bondar, samo sama'an Kristus ia'an bondar.

Wahyu 22:2

Di tongah-tongah jalatn kota nantai, ia'an di soborakng-nyoborakng sungai nantai, ado kayu sumber kohidupan. Kayu nantai bobuah duo bolas kali sotohutn, ia'an sokali sobulatn. Boko doutn doi' kayu nantai digunoan pakai' monyamani boko banso.