1 Petrus 2:11 - Porjanjian Boharu Torjomahan Baso Dilakng Soari-ari

¹¹ Boko somadikan inyo ku kasihi. Kaitn samo sama'an urakng asikng diapm somontaro mo di dunia ni'in. Jadi, aku bondar-bondar momuhun ko kaitn oca' jangan monuruti boko kohonda' bukakng-tubuh inyo jahat. Somuo kohonda' nantai boparakng molawatn hati kaitn.

1 Petrus 2:11 ပူးပေါင်းရင်းမြစ်များ

Galatia 5:24

Boko urakng inyo monjadi pongikut Kristus Yesus, sia' udah monyaliban somuo napsu ongko kohonda' diri inyo jahat.

1 Petrus 4:2

Kaitn molabuhan nantai oca' somanah kaitn ija' hidup di dunia ni'in, kaitn co monuruti kohonda' dunia, apo kaitn monuruti kohonda' Allah.

Ibrani 11:13

Somuo urakng inyo disobutan tontai totap pocayo ko Allah biar pan sia' mati sobolupm sia' mondapat boko hal inyo dijanjian-Nyo. Sia' totap yakitn obai moniant doi' jouh obai Allah tajahan monopat'i janji-Nyo. Sia' monorima' nantai agatn sonang hati sampai sia' moaku'i sia' ia'an urakng asikng ongko porantau di bumi.

Roma 8:13

Obai, aman kaitn hidup monuruti kohonda' monsio, kaitn tajahan mati bosongkayo doi' Allah. Apo agatn potulukan doi' Roh Allah, kaitn gola' moninggalan boko porbuatan kaitn inyo jahat nantai. Aman kaitn molabuhan nantai, jadi kaitn tajahan mondapat'an kohidupan inyo kokal.

Yakobus 4:1

Hibo kaitn hala bokolohi huatan hala botikakng agatn siku'-monyiku'? Nantai obai kaitn ado hawa napsu. Kaitn co honda' molabuhan boko hal inyo Allah kohonda'i. Jadi, sama'an ado poparakan dalapm diri kaitn.

2 Timotius 2:22

Timotius, padohan sonjumpat'an kolaku'an urakng muda' inyo jahat. Apo bousahacam oca' kolai bulah inyo bondar di hadapan Allah. Totap sotia ko Allah huatan kasihicam urakng bukai. Bousahacam oca' hidup damai agatn urakng bukai. Labuhancam somuo nantai bosamo agatn boko urakng inyo monyombah Tuhatn agatn hati inyo somombondarannyo.

2 Korintus 7:1

Boko somadikan inyo ku kasihi! Somuo janji Allah nantai pakai' kito. Obai nantai, marabo kito monjago bukakng-tubuh ongko roh kito oca' borosih doi' somuo hal inyo jahat. Agatn sama'an nantai, kito mongkitn hidup husus pakai' Allah kapikng kito gola' agatn Sio.

Roma 12:1

Obai somuonyo nantai, boko somadikan, ni'in aku kotakan muhun ko kaitn: Obai Allah monunju'an kasih-Nyo ko kaitn, jadi kaitn gola' monyorahan diri kaitn ko Sio samo sama'an kurbatn posombahan inyo hidup. Kaitn gola' hidup agatn caro inyo borosih doi' dosa ongko monyonangan Sio. Nianam caro inyo bondar pakai' monyombah Sio.

Efesus 4:1

Obai nantai, sama'an ni'inan nosihat doi' ku, ia'an aku inyo ditamoan ko dalapm ponjara obai aku molayati Tuhatn Yesus. Kaitn udah ditingkau monjadi umant Allah. Jadi, aku muhun oca' kaitn hidup agatn caro inyo cucu' pakai' boko urakng inyo ditingkau sama'an nantai.

Roma 7:23

Biar pan aku bopikir somuo hukupm nantai boi', aku kinyo mampu molabuhannyo, obai ado hukupm bukai dalapm diriku inyo molawatn poraturan Allah nantai, ia'an kuaso dosa. Kuaso dosa bokorojo dalapm boko anggota bukakngku sampai aku monjadi hulutn dosa.

Kisah Boko Rasul 15:29

Ia'an, jangan momporajoan. Jangan momua'i pomakatn inyo diposombahan ko boko duato. Jangan momua'i dagikng bonatakng inyo mati dikoci'. Jangan momua'i darah. Aman kaitn monaati poraturan nantai, kaitn bulah koboi'an. Singgo ni'inam surat koi. Salapm ko somuo somadikan.”

Lukas 21:34

“Jagocam diri kaitn. Jangan sampai ado boko hal di dunia ni'in inyo moncaci' pikiran kaitn, ubo mabu', porbuatan jahat inyo dilabuhan aman udah komabu'an, boko mosalah kohidupan ni'in. Aman pikiran kaitn samaꞌan nian, nononyo kaitn co siap timpu ari nantai datakng. Obai ari nantai tajahan datakng pakai' somuo urakng, conyiant inyo tohu, samo samaꞌan joyat ntobukan mongujut bonatakng.

1 Petrus 1:17

Allah mohakipi somuo urakng sosuai agatn porbuatan sia' siku'-monyiku'. Sio kinyo momihak boko urakng totontu. Jadi, aman kaitn monyobut Sionam Bopai kaitn, jadi kaitn gola' hidup mohormati Sio, somanah kaitn monumpakng sobagai urakng asikng di dunia ni'in.

2 Korintus 6:1

Sobagai urakng inyo bokorojo samo agatn Allah, jadi koi muhun ko kaitn: Jangannam bulah koboi'an Allah nantai monjadi sia-sia.

2 Korintus 5:20

Koi ni'in ia'an boko utusan Kristus. Molalu'i koi Allah siku' tontu-sama'an inyo moningkau urakng. Jadi, atas damo Kristus, koi momuhun, “Bodamaicam agi' agatn Allah.”

Kisah Boko Rasul 15:20

Apo, soharusnyo kito monulis surat ko sia'. Kito momadahan ko sia' oca' jangan momporajoan. Jangan momua'i pomakatn inyo diposombahan ko boko duato. Jangan momua'i isi lou' inyo mati dikoci'. Jangan momua'i darah.

1 Petrus 1:1

Surat ni'in doi' aku, rasul Petrus, inyo diutus Yesus Kristus. Surat ni'in pakai' boko urakng inyo dipilih Allah inyo tongahan morantau di doerah Pontus, Galatia, Kapadokia, Asia Kocit huatan Bitinia.

Efesus 2:19

Obai nantai, kaitn bukainyo urakng asikng agi'. Kaitn bukainyo urakng inyo jouh doi' Allah. Apo kaitn monjadi satu umant bosamo agatn boko urakng bukainyo inyo husus umputn Allah. Kaitn monjadi boko anggota koluarga Allah.

Ibrani 6:9

Apo, boko somadikan inyo tokasih, biar pan koi bopandir mongona'i hukupan sama'an nantai, koi yakitn obai kaitn udah monorima' boko hal inyo lobih boi' sampai kaitn paca'an disolamant'an.

1 Petrus 4:12

Boko somadikan inyo tokasih! Kaitn moalapi pondorita'an pakai' mouji iman kaitn bobondar pocayo agatn Yesus kata'an cadoai. Jadi, jangan kaitn hiratn ubonyo ado sosuatu inyo luar biaso tojadi agatn kaitn.

2 Petrus 3:1

Boko somadikan inyo ku kasihi, ni'in udah surat inyo koduo, inyo ku tulis ko kaitn. Di dalapm koduo surat nantai, aku bousaha monyadaran kaitn pakai' bopikir agatn caro inyo bondar.