1 Petrus 1:3 - Porjanjian Boharu Torjomahan Baso Dilakng Soari-ari

³ Topujicam Allah, ia'an Bopai doi' Yesus Kristus, Tuhatn kito. Allah udah monunju'an koboi'an-Nyo inyo luar biaso ko kito agatn caro ni'in: Sio bulah Yesus Kristus hidup agi' doi' antaro urakng mati. Molalu'i nantai, Sio moonju' kohidupan boharu ko kito samo sama'an kito hoyu' lahir. Obai nantai, hal ni'in moonji'i kito pongharapan inyo kuat.

1 Petrus 1:3 ပူးပေါင်းရင်းမြစ်များ

Yohanes 1:13

Nantai kinyo tojadi socaro duniawi, samo sama'an boko urakng inyo dilahiran obai kohonda' damo hajat monsio. Sia' monjadi poana'an Allah obai Allah bulah somuo nantai memang tojadi.

Roma 12:12

Sonang-nyamancam obai kaitn yakitn boharap ko Tuhatn. Kaitn gola' botahatn mohadapi ajab sonsaro ongko hala bodoa.

Roma 15:13

Boko somadikan! Allah inyo moonji'i harapan ko kito. Aku bodoa obai kaitn pocayo ko Kristus, jadi Allah tajahan bulah kaitn kotakan sonang-nyamanam ongko hidup agatn sonang-asau. Aku bodoa pakai' nantai oca' kuaso Roh Allah bulah kaitn mongkitn boharap ko Sio.

Roma 4:25

Allah monyorahan Yesus oca' Sio mati di kayu salib pakai' monanggukng hukupan dosa kito. Allah mombulah Yesus bobali' hidup oca' kito ulih monjadi bondar di hadapan-Nyo.

Roma 5:10

Komai, kito molawatn Allah. Apo kito bobali' bohubukan boi' agatn Sio obai Ana'-Nyo mati pakai' kito. Obai Yesus udah molabuhan nantai, pasti Sio jam paca'an monyolamant'an kito inyo udah bobali' bohubukan boi' agatn Allah. Obai Yesus hidup, jadi kito paca'an mondapat'an hidup kokal jam.

Roma 8:11

Roh Allah udah bulah Yesus Kristus hidup agi' doi' komatian. Ongko nantaiam Roh inyo diapm di dalapm diri kaitn jam. Jadi, biar pan tubuh kaitn tajahan mati, Roh Allah tajahan bulah tubuh kaitn hidup agi'.

Roma 8:24

Doi' watu kito disolamant'an, kito yakitn moharap'an somuo inyo Allah janjian nantai. Conyiant urakng inyo ija' moharap'an la'apo pan inyo udah io onju'. Aman io udah monorima' nantai, jadi io co moharap'an nantai agi'.

1 Korintus 13:13

Jadi, dalapm koadaan sokarakng ni'in ado tigo hal inyo gola' totap kito labuhan, ia'an: torus pocayo, kinyo botongga' boharap huatan salikng mongasihi. Inyo kotakan pontikng doi' kotigo hal nantai ia'an salikng mongasihi.

1 Korintus 15:20

Apo sobondarnyo Allah udah bulah Kristus monjadi urakng potamo inyo dihidupan agi' doi' komatian.

2 Korintus 1:3

Topuji cam Allah, ia'an nantai Bopai doi' Yesus Kristus, Tuhatn kito. Sio nam Bopai inyo kotakan mongasihi. Sio nam Allah inyo hala monguat'an hati kito.

Galatia 6:16

Aku bodoa oca' Allah moonji'i sonang-asau ko somuo urakng inyo hidup sama'an nantai. Aku bodoa oca' Allah jam monunju'an koboi'an-Nyo ko kito. Kito ninam inyo monjadi umant Allah inyo bondar.

Efesus 1:17

Aku bodoa ko Allah Tuhatn kito Yesus Kristus, Allah Bopai inyo mulia, oca' Sio moonji'i Roh-Nyo ko kaitn inyo mombulah kaitn bohikmat huatan mongonal Sio kotakng dalapm agi'.

Efesus 1:3

Topujiam Allah, ia'an Bopai doi' Yesus Kristus, Tuhatn inyo bokuaso di pucu' kito. Allah udah moonji'i ko kito somuo borokat rohani doi' sorugo dalapm Kristus.

Efesus 1:7

Watu Ana'-Nyo mati di kayu salib, Sio mombayar agatn darah-Nyo pakai' mombebasan kito doi' hukupan dosa. Jadi, molalu'i Ana'-Nyo, Allah moamputi dosa kito. Allah molabuhan somuonyo nantai obai kasih karunia-Nyo inyo kotakng bosar.

Efesus 2:4

Apo Allah kotakng bobolas kasihan Sio kotakng mongasihi kito.

Efesus 3:20

Topujiam Allah! Sio sanggup molabuhan banya' hal, lobih banya' doi' inyo ulih kito minto damo bayakan. Obai, kuaso-Nyo bokorojo di dalapm diri kito.

Kolose 1:23

Nantai paca'an tojadi aman kaitn totap pocayo ko Yesus agatn kuat. Jangan sampai kaitn tongga' pocayo. Kaitn gola' sotia huatan yakitn moharap'an obai Allah momonuhi somuo inyo Sio janjian dalapm Kabar Boi'. Memang kaitn udah mondinga' Kabar Boi' nantai. Kabar Boi' nantai udah diboritoan ko boko urakng di mono-mono. Aku ni'in, Paulus, udah monjadi polayatn inyo momboritoan Kabar Boi' nantai.

Kolose 1:27

Allah honda' momadahan ko sia' obai roncana-Nyo kotakan boi' pakai' boko banso inyo bukainyo banso Yahudi. Ni'innam roncana-Nyo: Kristus ulih hidup di dalapm diri kaitn urakng inyo bukainyo urakng Yahudi. Rotinyo, kaitn ulih yakitn moharap'an obai kaitn paca'an monorima' kohormatan doi' Allah.

1 Tesalonika 1:3

Koi bosukur ko Allah Bopai kito obai koi moingant caro hidup kaitn. Ia'an, obai kaitn pocayo ko Yesus huatan udah moniant'an dalapm porbuatan kaitn inyo nyata. Kaitn mongasihi urakng bukai agatn somombondarannyo monulukng sia'. Ongko kaitn totap kuat ongkah boharap ko Yesus Kristus, Tuhatn kito.

1 Tesalonika 4:13

Boko somadikan, koi kotakng honda' oca' kaitn mongotohu'i mongona'i la'apo inyo paca'an tojadi ko boko urakng inyo pocayo lopas sia' mati. Koi co honda' kaitn bulikng samo sama'an boko urakng inyo kinyo pocayo ko Yesus. Sia' co nyiant pongharapan obai boko urakng inyo mati paca'an bobali' hidup.

2 Tesalonika 2:16

Allah Bopai huatan Yesus Kristus, Tuhatn kito, mongasihi kito. Sio monguat'an hati kito somanah-manahnyo. Sio jam bulah kito kotakng yakitn obai Sio paca'an momonuhi somuo janji inyo boi' pakai' kito. Koi bodoa oca' Allah Bopai huatan Yesus Kristus, Tuhatn kito

1 Timotius 1:14

Apo Tuhatn kito kotakan momborokati aku agatn caro bulah aku monjadi pocayo agatn Sio huatan ulih mongasihi.

Titus 2:13

kapikng kito monantian ari kodatakan Allah inyo Maho Kuaso ongko Ponyolamant kito, Yesus Kristus, ia'an ari inyo kito harapan agatn rindakng-rigah,

Ibrani 3:6

Apo Kristus sotia sobagai Ana' inyo bokuaso agatn rumah Allah, ia'an kito. Kito ia'an rumah-Nyo aman kito totap kuat pocayo ko Yesus huatan yakitn moharap'an agatn somuo hal inyo paca'an dionju' Sio ko kito nononyo. Somuo hal nantai mombulah hati kito rindakng.

Yakobus 1:18

Sosuai agatn hajat Sio, Sio moonji'i kosompatan ko kito pakai' mondinga'an Kabar Boi' inyo bondar. Obai nantaiam kito pocayo, lalu kito monjadi boko poana'an Sio. Sio molabuhan nantai oca' kito monjadi boko urakng inyo doholu doi' antaro somuo inyo dipulah-Nyo. Samo sama'an boko buah inyo potamo doi' hasil hanyianinyo di onju' ko Allah obai husus umputn Sio.

1 Petrus 1:13

Obai somuo nantai, kaitn gola' bosiap-siap dalapm akal budi kaitn huatan hala mongondalian diri oca' monyonangan Tuhatn. Nononyo, Yesus Kristus tajahan datakng agi' monyatoan diri-Nyo. Timpu nantai, kaitn tajahan disolamant'an. Jadi, kaitn gola' bobondar boharap agatn koboi'an Allah nantai.

1 Petrus 1:21

Ia'an, kaitn dapat monjadi pocayo ko Allah obai porbuatan Kristus nantai. Allah udah bulah Sio hidup agi' doi' antaro urakng mati lalu mombulah Sio monjadi mulia. Agatn ubo nantai, kaitn pocayo huatan boharap ko Allah.

1 Petrus 1:23

Obai, kaitn dionji'i kohidupan boharu ibaratnyo kaitn lahir agi'. Kaitn dilahiran agi' bukainyo obai monsio inyo ulih mati apo obai kaitn pocayo agatn Pomandiran Allah mongona'i Kristus. Pomandiran Allah nantai hidup ongko botahatn sampai somanah-manahnyo.

1 Petrus 2:2

Aman kaitn bobondar udah moalapi obai Tuhatn nantai boi', jadi kaitn gola' ado kohonda' bolajar lobih dalapm mongona'i ajaran inyo bondar, ia'an Pomandiran Allah. Samo sama'an bobia' inyo hoyu' lahir honda'an susu inyo murni. Agatn ubo nian, kaitn tajahan tumbuh di dalapm Kristus ongko disolamant'an.

1 Petrus 3:15

Apo dalapm hati kaitn hormaticam Kristus sobagai Tuhatn inyo bokuaso pakai' kaitn. Kaitn gola' hala siap monjolasan alasan kaitn boharap ko Kristus. Kaitn gola' monjolasan nantai ko sotiap urakng inyo botakutn mongona'i hal nantai.

1 Petrus 3:21

Hal nantai monggambaran baptisan inyo watu ni'in monyolamant'an kaitn. Baptisan ni'in bukainyo upacara pakai' mombulah bukakng kaitn borosih doi' kotoran. Baptisan ia'an upacara pakai' momuhun ko Allah oca' Sio mombulah hati kaitn borosih. Baptisan nantai monyolamant'an kaitn obai Yesus Kristus udah hidup agi' doi' komatian,

1 Petrus 3:5

Caro hidup nantai samo agatn caro hidup boko botina' doi' joman komai inyo monyombah Allah, ia'an boko botina' inyo boharap ko Allah. Sia' bulah diri sia' boi' agatn caro mohormati laki sia' sobagai kopala' koluarga.

1 Yohanes 2:29

Kaitn tohuam obai Kristus hidup bondar di hadapan Allah. Jadi, kaitn pan tohu obai sotiap urakng inyo hidup bondar nian ia'an ana' Allah.

1 Yohanes 3:3

Somuo urakng inyo yakitn moharapan obai Sio paca'an mombulah nantai tojadi, sia' monjago diri oca' co bulah dosa samo sama'an Sio co bulah dosa.

1 Yohanes 3:9

Urakng inyo monjadi ana' Allah, culih hala bulah dosa. Obai, tobiat Allah siku' ado di dalapmnyo. Allah nam Bopainyo, jadi io culih hala bulah dosa.

1 Yohanes 4:7

Boko somadikanku inyo tokasih, marabo kito hala mongasihi. Obai, kasih boasal doi' Allah. Urakng inyo mongasihi siku'-monyiku' nianam ana' Allah, huatan io mongonal Allah.

1 Yohanes 5:1

Urakng inyo pocayo obai Yesus nam Kristus, Rajo Inyo Dijanjian Allah, urakng nantai am ana' Allah. Urakng inyo mongasihi Allah Bopai, mongasihi poana'an Allah jam.

1 Yohanes 5:18

Kito tohu obai somuo urakng inyo monjadi poana'an Allah, sia' co hidup dalapm dosa. Sia' dilinduki Ana' Allah, ia'an Yesus Kristus. Rajo Sitatn kinyo ulih bulah la'apo pan agatn sia'.

1 Yohanes 5:4

obai somuo ana' Allah ulih mongalahan kojahatan di dunia ni'in. Kito ulih molabuhan nantai obai kito pocayo ko Yesus Kristus.