1 Petrus 1:25 - Porjanjian Boharu Torjomahan Baso Dilakng Soari-ari

²⁵ Apo, Pomandiran Tuhatn tahatn sampai somanah-manahnyo.” Boko somadikan, Pomandiran Tuhatn Allah nantai am Kabar Boi' inyo udah diboritoan ko kaitn.

1 Petrus 1:25 ပူးပေါင်းရင်းမြစ်များ

Matius 5:18

Dinga'anbo ni'in: Somanah ija' ado langit huatan bumi, co nyiant la'apo pan inyo paca'an dihilakan doi' Hukupm Torat, biar pan sobuti' hurup damo sobuti' titik, sampai somuonyo tojadi.

Lukas 16:17

Apo, boko Porintah Allah totap bolaku. Biar pan langit ongko bumi mungkitn ulih hilakng, apo Hukupm Torat kinyo paca'an mungkitn ado bagian kotakng kocit pan inyo tajahan balakng.

Yohanes 1:1

Mulonyo, sobolupm la'apo pan dipulah, ado Sio inyo disobut ‘Pandir Allah’. Pandir nantai bosamo agatn Allah. Pandir nantai jam samo agatn Allah.

Yohanes 1:14

Pandir Allah nantai udah monjadi siku' monsio. Sio diapm di antaro kito. Huatan kito udah moniant komulia'an-Nyo. Ia'an, komulia'an-Nyo sobagai Ana' tunggal doi' Allah Bopai. Sio monunju'an ko kito somuo koboi'an Allah huatan somuo inyo bondar mongona'i Allah.

1 Korintus 2:2

Obai, aku jadi bulah koputusan bayo pakai' momboritoan mongona'i Yesus. Ia'an pan aku momboritoan obai Yesus ia'an Rajo Inyo Dijanjian Allah inyo disobut Kristus, huatan Sio mati di kayu salib. Aku co honda' momboritoan ko kaitn mongona'i boko hal inyo bukai.

Efesus 2:17

Kristus udah datakng momboritoan obai boko urakng ulih bodamai agi' agatn Allah. Sio momboritoan nantai ko kaitn boko urakng bukainyo Yahudi inyo jouh doi' Allah ongko ko sia'boko urakng Yahudi inyo dampikng.

Efesus 3:8

Di antaro soluruh umant Allah, aku inyo kotakng kinyo pontikng. Apo, Allah totap monunju'an kasih karunia-Nyo ko aku agatn caro ni'in. Sio moutus ku momboritoan ko boko urakng bukainyo urakng Yahudi mongona'i somuo borokat inyo Kristus onju'. Kito kinyo ulih mombayakan somuo borokat inyo kotakng luar biaso nantai.

Ibrani 6:5

kalo monorima' Pomandiran Allah inyo boi', kalo moalapi kuaso Allah doi' joman inyo tajahan datakng,

1 Petrus 1:12

Allah momadahannyo ko sia' obai polayatan sia' nantai bukainyo pakai' sia' siku', apo pakai' kaitn. Ia'an, watu ni'in Kabar Boi' mongona'i kosolamant'an nantai udah diboritoan ko kaitn. Nantai tojadi obai Roh Allah inyo diutus doi' sorugo monyoroto'i boko urakng nantai pakai' momboritoan Kabar Boi' nantai. Boko molekat pan honda' mongotohu'i mongona'i Kabar Kosolamant'an nantai.

1 Petrus 1:23

Obai, kaitn dionji'i kohidupan boharu ibaratnyo kaitn lahir agi'. Kaitn dilahiran agi' bukainyo obai monsio inyo ulih mati apo obai kaitn pocayo agatn Pomandiran Allah mongona'i Kristus. Pomandiran Allah nantai hidup ongko botahatn sampai somanah-manahnyo.

1 Petrus 2:2

Aman kaitn bobondar udah moalapi obai Tuhatn nantai boi', jadi kaitn gola' ado kohonda' bolajar lobih dalapm mongona'i ajaran inyo bondar, ia'an Pomandiran Allah. Samo sama'an bobia' inyo hoyu' lahir honda'an susu inyo murni. Agatn ubo nian, kaitn tajahan tumbuh di dalapm Kristus ongko disolamant'an.

2 Petrus 1:19

Obai nantai, koi monjadi lobih yakitn agi' obai pomandiran boko nabi mongona'i Kristus bondar. Soboi'nyo kaitn pan gola' mondinga'an pomandiran boko nabi. Pomandiran nantai paca'an mombimbikng kaitn ko jalatn inyo bondar samo sama'an cohayo pompolitoan di tompat inyo potakng, sampai matoari moncara' ongko bintakng timur, ia'an Kristus, bosinar dalapm hati kaitn.

1 Yohanes 1:1

Dalapm surat ni'in, koi monyampaian ko kaitn mongona'i Sio inyo disobut Pomandiran Allah inyo moonji'i hidup. Sio ado doi' mulonyo. Koi udah mondinga' Sio. Koi udah moniant Sio agatn mato koi siku'. Koi moniant Sio ongko koi udah moncanggapm Sio agatn jari koi siku'.

1 Yohanes 1:3

Koi momboritoan ko kaitn mongona'i somuo inyo koi tiat huatan inyo koi dinga', oca' kaitn paca'an bosatu hati agatn koi. Kosatuan inyo koi pulah ia'an koi bosatu agatn Allah Bopai huatan agatn Ana'-Nyo, Yesus Kristus.

Wahyu 14:6

Lopas nian aku moniant siku' urakng molekat bukai inyo trobakng tinggi di langit. Molekat nantai mombaba' Kabar Boi' inyo bolaku pakai' somanah-manahnyo. Io momboritoan Kabar Boi' nantai ko somuo urakng inyo bodiapm di bumi, ia'an boko urakng doi' sotiap banso, sotiap suku, sotiap baso, sotiap negara.