1 Petrus 1:17 - Porjanjian Boharu Torjomahan Baso Dilakng Soari-ari

¹⁷ Allah mohakipi somuo urakng sosuai agatn porbuatan sia' siku'-monyiku'. Sio kinyo momihak boko urakng totontu. Jadi, aman kaitn monyobut Sionam Bopai kaitn, jadi kaitn gola' hidup mohormati Sio, somanah kaitn monumpakng sobagai urakng asikng di dunia ni'in.

1 Petrus 1:17 ပူးပေါင်းရင်းမြစ်များ

Matius 16:27

Obai Ana' Monsio paca'an datakng agi' agatn kuaso Allah Bopai-Nyo huatan diiriki boko molekat-Nyo. Timpu nantai, Sio paca'an mombalas sotiap urakng sosuai agatn porbuatannyo.

Matius 22:16

Jadi, sia' monyiuh boko murid sia' huatan boko urakng inyo mondukukng Rajo Herodes botula' ko Yesus. Boko urakng nantai bopandir ko Yesus, “Guru, koi tohu Duatn urakng inyo jujur. Duatn mongajar agatn jujur mongona'i caro hidup sosuai agatn porintah Allah. Duatn co bopihak ko boko urakng totontu. Obai nantai, Duatn co gola' agatn sopo pan.

Matius 6:9

Obai nantai, kohonda'nyo kaitn bodoa sama'an ni'in: ‘Bopai koi inyo ado di sorugo, suciam damo Duatn.

Roma 11:20

Memang nantai bondar. Apo ingant obai sia' dipatahan obai sia' kinyo pocayo ko Yesus. Allah monorima' kaitn obai kaitn pocayo. Jadi, jangannam buhau obai kaitn monggonti'i sia'. Apo gola'cam agatn Allah!

2 Korintus 1:2

Aku bodoa oca' Allah Bopai kito ongko Tuhatn Yesus Kristus hala monunju'an koboi'an ongko moonji'i sonang-asau ko kaitn.

2 Korintus 5:6

Obai nantai hati koi mooso kuat. Koi tohu obai somanahan koi ija' diapm di dalapm bukakng-tubuh koi ni'in, koi jouh doi' rumah inyo tajahan koi kodiapi bosamo Tuhatn.

2 Korintus 7:1

Boko somadikan inyo ku kasihi! Somuo janji Allah nantai pakai' kito. Obai nantai, marabo kito monjago bukakng-tubuh ongko roh kito oca' borosih doi' somuo hal inyo jahat. Agatn sama'an nantai, kito mongkitn hidup husus pakai' Allah kapikng kito gola' agatn Sio.

2 Korintus 7:11

Tiatbo somuo hasil doi' porasa'an salu' nantai inyo sosuai agatn kohonda' Allah! Watu ni'in kaitn lobih bobondar monuruti Tuhatn. Kaitn bousaha oca' kosalahan kaitn nantai disolosaian. Kaitn godi agatn dosa huatan lobih gola' agatn Allah. Kaitn rindu agatn aku. Kaitn lobih bosomangant bulah koboi'an. Kaitn mohukupm urakng inyo bosalah. Jadi, lopas jadi monorima' suratku nantai, kaitn mombutian obai kaitn mourus boko mosalah nantai agatn caro inyo bondar.

Galatia 2:6

Sokali agi' somadikan, aku udah monjolasan polayatan aku ko pomimpitn di Yerusalem. Biar pan sia' dianggap tohormat, aku co poduli agatn kodudu'an sia' nantai. Obai Allah pan co poduli aman boko urakng dianggap pontikng kata'an cado. Apo boko pomimpitn nantai sotuju agatn aku. Sia' kinyo momosoan la'apo pan ko Kabar Boi' inyo aku boritoan.

Efesus 1:17

Aku bodoa ko Allah Tuhatn kito Yesus Kristus, Allah Bopai inyo mulia, oca' Sio moonji'i Roh-Nyo ko kaitn inyo mombulah kaitn bohikmat huatan mongonal Sio kotakng dalapm agi'.

Efesus 3:14

Obai nantai aku tundu' monyungkapan di hadapan Allah Bopai.

Efesus 6:9

Ko boko habakng aku momadahan: kaitn pan gola' boi' hati ko boko hulutn kaitn. Jangan hala moancapm sia'. Ingantcam! Tuhatn di sorugo ia'an Tuhatn inyo bokuaso di pucu' sia' ongko kaitn. Sio kinyo momihak ko boko urakng totontu.

Filipi 2:12

Boko somadikanku inyo ku kasihi, kaitn hala monaati Allah. Jadi, totap gola' ongko mohormati Sio kapikng kaitn bousaha hidup agatn caro inyo cucu' pakai' boko urakng inyo udah disolamant'an. Kaitn gola' molabuhan nantai bukai aja' sama'an komai timpu aku bosamo agatn kaitn apo lobih agi' watu ni'in watu aku co bosamo agatn kaitn.

Kolose 3:25

Sio paca'an mohukupm sotiap urakng inyo bulah kosalahan. Sio kinyo poduli urakng nantai pontikng kata'an cado.

Ibrani 12:28

Jadi, mara am kito bosukur ko Allah, obai kito monjadi warga Korajaan-Nyo inyo kinyo toguncakng. Mara am kito monyombah Allah agatn caro inyo monyonangan Sio, ia'an agatn hormat ongko gola' agatn Sio.

Ibrani 4:1

Obai nantai, boko somadikan, kito gola' boboi'. Allah udah bojanji obai somuo urakng inyo pocayo ulih mansu' ko dalapmtompat torahat inyo Sio siap'an. Janji Allah nantai ija' bolaku pakai' kito watu joman ni'in. Apo, kaitn gola' boboi' oca' conyiant di antaro kaitn inyo culih mansu'.

1 Petrus 2:11

Boko somadikan inyo ku kasihi. Kaitn samo sama'an urakng asikng diapm somontaro mo di dunia ni'in. Jadi, aku bondar-bondar momuhun ko kaitn oca' jangan monuruti boko kohonda' bukakng-tubuh inyo jahat. Somuo kohonda' nantai boparakng molawatn hati kaitn.

1 Petrus 3:15

Apo dalapm hati kaitn hormaticam Kristus sobagai Tuhatn inyo bokuaso pakai' kaitn. Kaitn gola' hala siap monjolasan alasan kaitn boharap ko Kristus. Kaitn gola' monjolasan nantai ko sotiap urakng inyo botakutn mongona'i hal nantai.