1 Korintus 9:1 - Porjanjian Boharu Torjomahan Baso Dilakng Soari-ari

¹ Allah udah mombebasan aku. Malahan aku udah moniant Yesus, Tuhatn kito. Aku bondar-bondar rasul inyo diutus Tuhatn. Malahan, kaitn pan ia'an hasil pokoroja'an inyo ku labuhan bagi Tuhatn.

1 Korintus 9:1 ပူးပေါင်းရင်းမြစ်များ

Kisah Boko Rasul 9:17

Jadi, Ananias botula' ko rumah Yudas nantai. Sopondatakngnyo di rumah Yudas, io mansu' ongko monomu'i Saulus. Io molota'an jarinyo ko Saulus kapikng bopandir, “Saulus, Somadikanku, Tuhatn Yesus moutus aku ko kolai. Sio niannam inyo kolai tiat dalapm pojalatan kolai ko si'itn. Sio moutus aku oca' kolai ulih moniant agi' huatan oca' kolai diponuhi Roh Allah.”

1 Timotius 2:7

Nianam Kabar Boi' inyo gola' aku boritoan. Nantaiam alasannyo aku diutus monjadi rasul pakai' momboritoannyo. Pomandiran aku ni'in bondar. Aku co bulah tumbukan. Aku dipilih pakai' mongajar boko urakng inyo bukainyo urakng Yahudi oca' sia' tohu la'apo inyo bondar mongona'i Yesus.

1 Korintus 3:6

Kaitn jomaat Korintus sama'an halnyo lakau umputn Allah. Aku samo sama'an urakng inyo monanam kabar boi' ko kaitn, sodakan Apolos samo sama'an urakng inyo monyirapm. Urakng inyo monanam huatan urakng inyo monyirapm kinyo pontikng. Inyo pontikng ia'an Allah, obai Sio inyo mombulah kaitn botumbuh. Obai nantai, koi duo samo-samo bokorojo pakai' Sio. Koi paca'an monorima' upah sosuai agatn pokoroja'an koi siku'-monyiku'.

Kisah Boko Rasul 23:11

Pas malapm nantai Tuhatn Yesus bodiritn di sopia' Paulus ongko bopandir ko io, “Jangan gola'. Kolai udah borani momboritoan mongona'i Aku di Yerusalem. Nononyo kolai gola' borani jam momboritoan mongona'i Aku di Roma.”

Kisah Boko Rasul 9:3

Jadi Saulus botula' ko kota Damsyik nantai. Pas io udah dampikng kota nantai, sopongirap ado cohayo doi' sorugo. Cohayo nantai momanjah sokolilikngnyo.

1 Korintus 9:19

Sobondarnyo aku kinyo hulutn sopo pan. Apo aku bulah diriku monjadi hulutn somuo urakng. Aku molabuhan nantai oca' monulukng lobih banya' urakng sampai sia' pocayo ko Yesus.

2 Timotius 1:11

Aku diutus pakai' monjadi rasul-Nyo inyo momboritoan Kabar Boi' nantai lalu mongajar urakng mongona'i Sio.

Galatia 5:1

Kristus udah mombebasan kito oca' kito bondar-bondar bebas. Obai nantai am, jangan bobali' agi' samo sama'an hulutn inyo gola' momikul bobatn.

2 Korintus 6:1

Sobagai urakng inyo bokorojo samo agatn Allah, jadi koi muhun ko kaitn: Jangannam bulah koboi'an Allah nantai monjadi sia-sia.

Roma 1:1

Surat ni'in doi' aku, Paulus, urakng inyo molayati Kristus Yesus. Aku ditingkau pakai' monjadi rasul, huatan dihususan pakai' momboritoan Kabar Boi' doi' Allah.

Galatia 1:1

Ko inyo tohormat boko kolompok urakng inyo pocayo agatn Yesus di propinsi Galatia: Surat ni'in doi' aku, Paulus, huatan pan doi' somuo urakng pocayo inyo ado bosamo agatn aku. Aku monjadi rasul bukainyo obai dipilih monsio, pan kinyo diutus ulih monsio. Aku dipilih huatan diutus ulih Rajo Inyo Dijanjian Allah, pakai' momboritoan Kabar Boi' ulih Allah Bopai. Aku pan diutus ulih Allah Bopai inyo bulah Yesus bobali' hidup doi' komatian.

1 Tesalonika 2:6

Koi pan co kalo bogoyap pujian doi' monsio boi' doi' kaitn honda' pan doi' urakng bukai. Koi ado hak pakai' monuntut la'apo inyo koi pontikan doi' kaitn obai koi ni'in rasul Kristus.

2 Korintus 11:5

Kaitn moanggap sia' nantai boko rasul inyo luar biaso. Apo, monurutku, sia' co lobih hebat doi' aku.

1 Korintus 1:1

Surat ni'in ko jomaat Allah di Korintus. Kaitn monjadi borosih socaro rohani molalu'i Kristus Yesus. Allah momilih kaitn pakai' monjadi umant inyo husus pakai' umputn Sio. Kaitn monjadi umant Allah bosamo somuo urakng di mono aja' inyo pocayo ko Tuhatn kito, Yesus Kristus. Sio ia'an Tuhatn inyo bokuaso atas sia' huatan Tuhatn inyo bokuaso atas kito. Surat ni'in doi' aku, Paulus. Aku ditingkau pakai' monjadi rasul Kristus Yesus obai nantai kohonda' Allah. Salapm jam doi' Sostenes, somadikan soiman kito.

Roma 11:13

Ni'in, aku bopandir ko kaitn boko banso bukainyo banso Yahudi. Obai aku ninam rasul inyo molayati boko urakng bukainyo urakng Yahudi, jadi aku momuji polayatanku nantai.

Roma 1:5

Allah jam monunju'an koboi'an-Nyo ko aku. Ia'an Yesus momilih aku pakai' monjadi rasul inyo mowakili Sio. Sio moonji'i tugas ko aku pakai' mombimbikng boko urakng doi' somuo banso oca' sia' pocayo huatan taat ko Sio.

Kisah Boko Rasul 14:14

Apo Barnabas ongko Paulus mondinga' hal nantai. Jadi, watu nantai jam sia' duo mombirat-birat pakai'an sia'. Niannam tando obai sia' duo sangant kinyo honda' urakng bopikir sia' nantai boko duato. Ongko sia' bonggidi'an ko tongah-tongah urakng banya'. Sia' mondorah,

Kisah Boko Rasul 14:4

Jadi, pondudu' kota nantai topisah monjadi duo kolompok. Ado inyo bopihak ko boko urakng Yahudi inyo kinyo pocayo, huatan ado inyo bopihak ko Rasul Paulus ongko Barnabas.

Kisah Boko Rasul 13:2

Timpu, sia' bokumpul pakai' bopuaso huatan bodoa. Watu nantai, Roh Allah bopandir ko sia', “Aku momilih Barnabas ongko Saulus molabuhan polayatan husus pakai' molayati boko urakng di doerah bukai. Jadi, tugasan sia' duo pakai' molabuhan polayatan nantai.”

Kisah Boko Rasul 9:15

Apo Tuhatn bopandir ko io, “Botula'cam, obai Aku udah momilih io. Io paca'an monjadi hulutn-Ku. Io paca'an momboritoan mongona'i Aku ko boko urakng inyo kinyo Yahudi. Io pan paca'an momboritoan ko boko rajo sia'. Io paca'an momboritoan ko boko urakng Yahudi jam.

Kisah Boko Rasul 9:5

Saulus botakutn, “Sopo Duatn, Tuhatn?” Saro nantai monimbas, “Aku ni'innam Yesus, inyo kolai dorako'i!

1 Korintus 10:29

Kohonda'ku cado saro hati kocit kolai, apo saro hati kocit urakng nantai. Mongkitn ado doi' kaitn inyo botakutn, “Hibo kobebasaku gola' dibatasi ulih saro hati kocit urakng bukai?

1 Korintus 10:30

Aman Aku bopua' pomakatn nantai agatn oso bosukur ko Allah, hibo urakng bukai monyalahan aku obai aku bopua' pomakatn nantai?”

1 Korintus 11:16

Aman ado urakng inyo honda' bopandir molawatn kobiasa'an ni'in, gola' diingant'an, koi co nyiant kobiasa'an inyo songkayo doi' nantai. Somuo kumpulan urakng pocayo monuruti kobiasa'an nantai.

2 Korintus 10:7

Kaitn gola' bopikir boboi' mongona'i lapo inyo kaitn kotohu'i. Aman ado urakng inyo yakitn mongotohu'i obai io nam umputn Kristus, urakng nian gola' mongotohu'i ni'in: Koi pan umputn Kristus jam samo sama'an io jam.