1 Korintus 8:1 - Porjanjian Boharu Torjomahan Baso Dilakng Soari-ari

¹ Ni'in mongona'i dagikng bonatakng inyo diposombahan ko boko duato. Ado boko urakng bopandir, “Somuo kito ado pongotohuan.” Apo aman siku' urakng ado ‘pongotohuan husus’, ongko urakng nantai jadi buhau. Sobondarnyo kito gola' mongasihi urakng bukai. Nantaiam caronyo kito bulah urakng bukai monjadi lobih kuat socaro rohani.

1 Korintus 8:1 ပူးပေါင်းရင်းမြစ်များ

Kisah Boko Rasul 15:10

Jadi, aman nian kohonda' Allah, jangan molawatn Sio. Jangan momoso boko urakng bukai Yahudi oca' monaati somuo porintah ongko poraturan Allah inyo ditulis Musa dalapm buku Hukupm Torat. Hal nantai samo sama'an momoso sia' pakai' momikul bobatn inyo borat dipikul. Angki-bayatn kito huatan kito siku' pan co mampu molabuhan somuo poraturan nantai.

Kisah Boko Rasul 15:29

Ia'an, jangan momporajoan. Jangan momua'i pomakatn inyo diposombahan ko boko duato. Jangan momua'i dagikng bonatakng inyo mati dikoci'. Jangan momua'i darah. Aman kaitn monaati poraturan nantai, kaitn bulah koboi'an. Singgo ni'inam surat koi. Salapm ko somuo somadikan.”

Kisah Boko Rasul 21:25

Sodakan mongona'i boko urakng inyo bukainyo urakng Yahudi inyo udah pocayo agatn Yesus, koi udah bulah surat ko sia'. Dalapm surat nantai, koi monjolasan koputusan koi mongona'i boko porintah inyo mono gola' ditaati sia'. Ia'an, jangan bomporajoan. Jangan momua'i pomakatn inyo diposombahan ko boko duato. Jangan momua'i dagikng bonatakng inyo mati dikoci'. Jangan momua'i darah.”

Roma 11:25

Boko somadikan! Oca' kaitn kinyo bopikir kaitn udah mongotohu'i boko la'apo pan, jadi aku honda' momadahannyo ko kaitn mongona'i hajat Allah ni'in inyo komai kinyo dikotohu'i monsio: Sobagi'an banso Israel udah monjadi korikng hati, kinyo honda' pocayo agatn Yesus. Apo, koadaan ni'in bayo sampai jumlah monsio doi' banso bukai udah datakng ko Allah, ia'an nantai jumlah inyo udah ditontuan-Nyo.

Roma 12:16

Hidupcam dalapm kosatuan. Jangan buhau apo bokawalcam agatn boko urakng inyo dianggap co pontikng. Jangannam bopikir kaitn udah mongotohu'i la'apo pan.

Roma 14:10

Jadi, jangannam kolai mohakipi somadikan kolai! Jangannam kolai mohanyam somadikan kolai! Obai, nononyo kito somuo gola' mohadap tahta Allah. Sio tajahan monontuan sopo inyo bondar ongko sopo inyo salah.

Roma 14:14

Obai aku bosatu agatn Tuhatn Yesus, jadi aku tohu obai conyiant ado la'apo pan inyo pomali. Aku yakitn mongona'i nantai. Apo, aman ado urakng inyo bopikir obai ado sosuatu inyo campah, memang bagi io hal nantai pomali.

Roma 14:19

Obai nantai, kito gola' bousaha oca' porbuatan kito mombulah somuo kito hidup agatn damai. Kito gola' bousaha monulukng urakng bukai pakai' lobih kuat pocayo ko Yesus.

Roma 14:22

Kopocaya'an kolai mongona'i poraturan ubo nantai ia'an urusan kolai siku' agatn Allah. Diborokaticam urakng inyo molabuhan lapo inyo io pikir bondar, ongko co monyalahan dirinyo siku'.

Roma 14:3

Urakng inyo bopua' la'apo pan, jangannam io mohanyam urakng inyo bayo bopua' pomakatn inyo totontu nantai. Urakng inyo bayo bopua' pomakatn inyo totontu nantai, jangan io monyalahan urakng inyo bopua' la'apo pan, obai Allah udah monorima' urakng nantai.

Roma 15:14

Boko somadikanku, aku kotakng yakitn obai kaitn kotakan boi' ongko mongotohu'i somuo inyo dipontikan. Jadi, kaitn ulih momadahi siku'-monyiku'.

1 Korintus 1:5

Masudku, obai kaitn di dalapm Sio, jadi Sio momborokati kaitn dalapm somuo hal. Ia'an, kaitn monjadi mongkitn mampu mongoroti somuo macapm pongotohuan. Kaitn jam monjadi mongkitn mampu momandiran somuo hal nantai ko urakng bukai.

1 Korintus 10:15

Aku bopandir ko kaitn obai aku tohu kaitn boko urakng pintar-corodi'. Jadi, kaitn siku' ulih momutusan aman pomandiranku ni'in bondar cado.

1 Korintus 10:28

Apo aman ado urakng bukai inyo momadahan ko kaitn, “Pomakatn ni'in udah diposombahan ko boko duato.” Jangan am dipua'i pomakatn nantai biar pan kolai kinyo bosalah aman momua'inyo. Obai kolai gola' borotian kopontikan urakng nantai huatan saro hati kocit.

1 Korintus 14:20

Boko somadikan, jadicam sama'an boko bobia' dalapm hal kojahatan obai boko bobia' kinyo tohu porbuatan jahat. Apo jangan monjadi sama'an boko bobia' dalapm kaitn bopikir mongona'i boko komampuan husus doi' Roh Allah. Dalapm hal nantai, kaitn gola' bopikir agatn pintar-corodi' sama'an urakng tuho.

1 Korintus 15:34

Jadi, kaitn gola' bopikir agi' agatn boboi'. Jangan hala bulah dosa! Aku mongatoan nantai obai ado di antaro kaitn inyo kinyo bondar-bondar mongonal Allah. Aku honda' oca' kaitn mooso malu mongona'i nantai.

1 Korintus 4:10

Sama'annyo koi budu obai koi molayati Kristus. Apo kaitn bokopintar-corodi'an obai kaitn pocayo ko Kristus. Koi lomah. Apo, kaitn kuat. Koi kinyo cucu' dihormati. Apo kaitn tohormat.

1 Korintus 4:18

Ado boboropo urakng di antaro kaitn inyo mongiro obai aku co paca'an datakng agi'. Obai nantai, sia' monjadi buhau.

1 Korintus 4:6

Boko somadikan, boko pomandiran inyo aku tulis ni'in bolaku pakai' diri aku siku' huatan Apolos. Tujuannyo oca' doi' toladatn koi, kaitn ulih bolajar roti ungkap'an ni'in: “Jangan mombosar-bosaran apo inyo totulis.” Agatn sama'an nian, kinyo ado di antaro kaitn inyo paca'an bopangkakng agatn moutamoan sikuꞌ urakng di atas urakng bukai.

1 Korintus 5:2

Apo kaitn bopangkakng obai porbuatan urakng nantai! Soharusnyo kaitn salu', ongko mongoluaran io doi' antaro kaitn.

1 Korintus 5:6

Co boi' kaitn mooso buhau obai porbuatan urakng nantai. Pasti kaitn udah tohu obai sodikit ragi paca'an bulah somuo adonan roti mongombakng. Samo sama'an nian jam, dosa siku' urakng ulih bulah banya' urakng molabuhan dosa.

1 Korintus 8:2

Aman ado urakng inyo bopikir obai io ado ‘pongotohuan husus’, sobondarnyo urakng nantai bolupm mongotohu'i boko hal inyo soharusnyo io kotohu'i.

1 Korintus 8:4

Nah, mongona'i potakutan ni'in: Ulih cado kito bopua' dagikng bonatakng inyo diposombahan ko boko duato? Kito tohu, “co nyiant boko duato di dunia ni'in inyo bondar-bondar hidup.” Kito pan tohu, “Bayo ado siku' mo Allah inyo bondar. Co nyiant am inyo bukai.”

1 Korintus 8:7

Apo ado boko urakng inyo bolupm mongotohu'i somuo nantai. Komainyo nantai sia' udah biaso momposombahan dagikng bonatakng ko boko duato. Biar pan watu ni'in udah pocayo ko Yesus, sia' ija' bopikir aman bopua' dagikng nantai boroti monyombah duato. Sampai ni'in hati sia' kurakng yakitn jadi sia' mooso bosalah aman sia' bopua' dagikng nantai.

Efesus 4:16

doi' somuo anggota bukakng-tubuh inyo tosusutn rapi huatan bohubukan kuat agatn boko anggotanyo. Aman sotiap anggota bokorojo sosuai agatn komampuan husus inyo dionju'nyo, jadi Kristus mombulah soluruh bukakng-tubuh botumbuh dalapm kasih.

Kolose 2:18

Ado urakng inyo pompadah rondah hati huatan monyombah boko molekat. Jangan biaran urakng sama'an nantai bulah kaitn pocayo ajaran inyo salah, sampai kaitn co dapat borokat doi' Allah. Urakng sama'an nantai buhau agatn mongatoan io ado boko poniant'an doi' Allah. Apo sobondarnyo pikirannyo duniawi inyo bulah io buhau.

Wahyu 2:14

Apo, Aku moolikan kaitn obai boboropo hal ni'in: Ado boboropo urakng di antaro kaitn inyo tuyut ajaran salah samo sama'an ajaran Bileam joman komai. Bileam mongajar Balak pakai' bulah urakng Israel jatu' ko dalapm dosa, ia'an oca' sia' bopua' dagikng doi' bonatakng inyo diposombahan ko songiang-duato, ongko oca' sia' bulah dosa bomporajoan.

Wahyu 2:20

Apo, Aku moolikan kaitn mongona'i hal ni'in: Kaitn mombiaran botina' nantai, Izebel, monyosat'an umant-Ku. Io mongaku' dirinyo nabi, apo io udah monipu boko hulutn-Ku. Io mongajar oca' sia' bulah dosa bomporajoan, ongko oca' sia' makatn dagikng doi' bonatakng inyo diposombahan ko songiang-duato.