1 Korintus 6:9 - Porjanjian Boharu Torjomahan Baso Dilakng Soari-ari

⁹ Kaitn gola' tohu boko urakng inyo co hidup bujur bondar di hadapan Allah, sia' co paca'an bodapat bagian dalapm Koraja'an Allah! Kaitn gola' sobondarannyo yakitn boko hal ni'in. Boko urakng inyo pombontina', boko urakng inyo monyombah lompatukng, boko urakng inyo bomporajoan, boko urakng inyo bokohonda'an agatn sosamo jonis,

1 Korintus 6:9 ပူးပေါင်းရင်းမြစ်များ

Matius 19:29

Ado urakng udah moninggalan rumahnyo, somadikan lolaki ongko botina', bopainyo, indainyo, poana'annyo, ongko lakaunyo. Somuo urakng inyo udah moninggalan somuo nantai obai pocayo ko Aku, sia' paca'an mondapat'an agi' doi' Allah soratus kali lipat. Sia' pan paca'an mondapat'an hidup somanah-manahnyo.

Matius 25:34

Lalu, sobagai Rajo, Sio paca'an bopandir ko boko urakng di sopia' kanannyo, ‘Maracam, kaitn inyo diborokati ulih Bopai-Ku! Mansu'cam ko dalapm Koraja'an inyo disodiaan pakai' kaitn tangga'i dunia dipulah.

Lukas 21:8

Yesus bopandir, “Boboi'cam! Jangan sampai kaitn dikotumbuki mongonaꞌi watu Aku bobali'. Banyaꞌ urakng paca'an datakng inyo mongaku' ubonyo io nantai Aku. Sia' paca'an bopandir, ‘Aku ni'inam Rajo Inyo Dijanjian Allah! Watu ni'in udah ahir joman!’ Jangan sampai kaitn pocayo ongko monjadi pongikut sia'.

Kisah Boko Rasul 20:32

Ni'inan, aku monyorahan kaitn ko Allah. Mudahan Allah molinduki kaitn. Totap ja' pocayo ko Kabar Boi' mongona'i koboi'an Allah. Mudahan Allah huatan Kabar Boi' nantai hala bulah hati kaitn pocayo ko Yesus mongkitn kuat. Obai Allah bokuaso moonji'i tuah inyo udah disodiaan husus bayo pakai' umant kokidah-Nyo.

Kisah Boko Rasul 24:25

Paulus pan monjolasan mongona'i boko hal ni'in: Urakng inyo pocayo gola' molabuhan porbuatan inyo bondar di hadapan Allah. Urakng inyo pocayo pan gola' mongondalian diri. Paulus pan monjolasan obai suatu ari nononyo somuo urakng paca'an dihakipi. Watu Feliks mondinga' mongona'i caro hidup sama'an nantai, io kotakan gola' bondar. Ongko io bopandir, “Jadiam! Botula' cam. Nononyo aman ado watu, aku moningkau kolai agi'.”

Roma 1:18

Apo doi' sorugo Allah monunju'an ponggodi-Nyo pakai' somuo urakng inyo bodosa huatan bulah kojahatan. Obai, kojahatan nantai mohalaki monsio mongonal ajaran inyo bondar.

1 Korintus 15:33

Jangan biaran urakng bukai hala bulah kaitn salah bopikir! Ingant cam porbaso inyo mongatoan: “Pogaulan inyo buru' morusa' kolaku'an inyo boi'.”

1 Korintus 15:50

Boko somadikan, ni'in inyo pontikng pakai' dikotohu'i: Bukakng-tubuh kito ni'in, ia'an dagikng huatan darah, kinyo ulih mansu' Koraja'an Allah nononyo. Bukakng-tubuh kito ni'in dapat mati. Jadi, bukakng-tubuh sama'an ni'in kinyo dapat hidup somanah-manahnyo.

1 Korintus 3:16

Inyo gola' kaitn kotohu'i kaitn samo sama'an Rumah Allah huatan Roh Allah bodiapm di antaro kaitn somuo.

1 Korintus 5:1

Aku mondinga' borito obai ado urakng di antaro kaitn inyo bomporajoan. Io pan molabuhan dosa bomporajoan inyo kotakng kotor bondar, ia'an momporajoan agatn indai tirinyo! Boko urakng inyo bolupm mongonal Allah pan co sampai bomporajoan agatn indai tiri sia'.

1 Korintus 5:10

Aku kinyo bomasud monyiuh kaitn monjouhi boko urakng inyo hidup agatn caro dunia inyo bolupm pocayo ko Yesus. Memang ado sia' inyo bomporajoan. Ado jam inyo kaha'. Ado jam inyo morampas. Ado jam inyo monyombah lompatukng. Co mungkitn kaitn monjouhan diri doi' somuo urakng nantai. Aman honda' monjouhan diri doi' somuo urakng bodosa, boroti kaitn gola' koluar doi' dunia ni'in.

1 Korintus 5:11

Apo ni'in aku monulis oca' kaitn co bokawal agatn urakng inyo mongaku' pocayo ko Yesus, apo io ija' bomporajoan, ija' kaha', ija' monyombah lompatukng, gala' bojahat urakng bukai, gala' komabu'an, huatan ija' morampas barakng urakng. Jangan sampai makatn pan bosamo urakng sama'an nian.

1 Korintus 6:10

boko urakng inyo mongolit, boko urakng inyo kaha', boko urakng inyo gala' mabu', boko urakng inyo gala' monjahai'an urakng bukai, boko urakng inyo morampas umputn urakng bukai. Somuo urakng sama'an nian pasti kinyo paca'an mondapat bagian dalapm Koraja'an Allah.

1 Korintus 6:18

Jadi, jangan sokali-kali bomporajoan. Somuo dosa inyo bukai tojadi di luar bukakng-tubuh urakng nian. Apo urakng inyo bomporajoan, bodosa tohadap bukakng-tubuhnyo siku'.

1 Korintus 6:19

Co tohu bai kaitn aman bukakng-tubuh kaitn masikng-masikng samo sama'an rumah pakai' Roh Allah. Huatan Roh Allah udah moonji'i Roh-Nyo pakai' bodiapm dalapm kaitn. Rotinyo kaitn bukai umputn kaitn siku' agi'.

1 Korintus 9:24

Pasti kaitn tohu obai dalapm potandikan bolapat'an bonggidi'an, somuo sia' tuyut bonggidi'an. Apo bayo siku' inyo bodapat hadiah. Samo sama'an nantai, kaitn gola' bousaha hidup agatn caro inyo monyonangan Allah oca' bodapat hadiah inyo Allah onju'.

2 Korintus 12:21

Aku bogonang watu ku datakng agi', Allahku paca'an bulah ku malu di hadapan kaitn. Aku paca'an monangis salu' obai banya' urakng di antaro kaitn ija' hidup dalapm dosa. Sia' bolupm moninggalan boko hal inyo kotor, boko hal kinyo sonunuh, bokohonda' kinyo patut.

Galatia 6:7

Jangan ngontumbuki diri siku'! Co nyiant urakng inyo ulih mompormainan Allah. Sotiap urakng paca'an mondapat'an sosuai agatn porbuatannyo.

Kolose 3:5

Obai nantai, kaitn gola' momastian caro hidup kaitn inyo manah nantai bondar-bondar udah mati. Jangan dikuaso'i boko kohonda' duniawi, sama'an: bomporajoan, boko kolaku'an inyo kinyo sonunuh, hawa napsu, kohonda' jahat, kaha' agatn duit. Kohonda' pakai' duit nantai samo ja'am agatn monyombah boko duato.

Ibrani 12:14

Bousahacam hidup damai agatn somuo urakng. Bousaha jam hidup borosih doi' dosa. Obai, urakng inyo kinyo borosih doi' dosa, kinyo tajahan ulih moniant Tuhatn.

Ibrani 12:16

Bojojago jam oca' jangan ado urakng di antaro kaitn inyo bodosa bomporajoan. Jangan ado inyo kinyo morogo'i borokat rohani doi' Allah sama'an inyo dilabuhan Esau ija' joman komai. Obai io ana' kojula'an io bohak mondapat borokat husus doi' bopainyo. Apo io monjual hak nantai bayo pakai' sopirikng pomakatn mo.

Ibrani 13:4

Somuo urakng gola' mohormati pokawitan. Sotiap laki-bini gola' sotia ko pasakannyo. Obai, Allah tajahan mohukupm urakng inyo bodosa bomporajoan huatan urakng inyo bomporajoan.

Yakobus 1:16

Boko somadikan inyo ku kasihi, jangan salah bopikir.

1 Yohanes 3:7

Boko poana'anku! Jangan pocayo agatn ajarannyo salah doi' sopo pan. Urakng inyo hidup bondar di hadapan Allah nianam urakng inyo bondar, samo sama'an Kristus ia'an bondar.

Wahyu 21:8

Apo boko urakng ponggola'an, boko urakng inyo kinyo pocayo, boko urakng inyo jahat, boko urakng pombunuh, boko urakng inyo bodosa pombotina', boko tukakng sihir, boko urakng inyo monyombah lompatukng, boko urakng tumbukan, somuo sia' paca'an ditikapan ko dalapm loutan api inyo tongahan bonyalo agatn bolerang. Nantai damonyo komatian koduo, ia'an mati pakai' somanah-manahnyo.”

Wahyu 22:15

Apo somuo urakng bukai paca'an tinggal di luar. Ia'an somuo urakng inyo jahat samo sama'an kudu', boko tukakng sihir, boko urakng inyo bodosa bomporajoan, boko urakng inyo mombunuh, boko urakng inyo monyombah lompatukng, boko urakng inyo gala' bulah kotumbukan huatan molabuhannyo.