1 Korintus 6:20 - Porjanjian Boharu Torjomahan Baso Dilakng Soari-ari

²⁰ Allah udah momboli kaitn huatan mombayarnyo lunas. Obai nantai, gunoan cam bukakng-tubuh kaitn pakai' moninggian Allah.

1 Korintus 6:20 ပူးပေါင်းရင်းမြစ်များ

1 Korintus 7:23

Sio udah momboli kaitn huatan mombayar lunas rogonyo. Obai nantai, jangan kaitn monjadi hulutn monsio.

1 Petrus 2:9

Apo kaitn nam banso inyo dipilih Allah. Kaitn nam boko urakng inyo molayati Kristus, samo sama'an boko imam molayati rajo. Kaitn nam umant husus umputn Allah, boko urakng inyo ado hubukan agatn Allah siku'. Allah momilih kaitn oca' kaitn ulih momboritoan mongona'i somuo porbuatan bosar inyo Sio labuhan, ia'an Sio inyo moningkau kaitn koluar doi' kogolapan, lalu mansu' ko dalapm torakng-Nyo inyo luar biaso. Samo sama'an inyo totulis di dalapm Buku Suci,

Roma 12:1

Obai somuonyo nantai, boko somadikan, ni'in aku kotakan muhun ko kaitn: Obai Allah monunju'an kasih-Nyo ko kaitn, jadi kaitn gola' monyorahan diri kaitn ko Sio samo sama'an kurbatn posombahan inyo hidup. Kaitn gola' hidup agatn caro inyo borosih doi' dosa ongko monyonangan Sio. Nianam caro inyo bondar pakai' monyombah Sio.

1 Petrus 1:18

Kaitn udah ditobus-Nyo oca' kaitn dibebasan doi' caro hidup inyo sia-sia, ia'an caro hidup inyo angki-bayatn kaitn ajaran ko kaitn. Tobusan nantai dibayar bukainyo agatn barakng inyo mudah rusa' sama'an pira' damo omas.

Filipi 1:20

Aku kotakng honda' ongko moharap'an obai aku co bulah boko-lapo inyo bulah ku monjadi malu di hadapan Tuhatn. Apo aku boharap aku tajahan monjadi borani watu ni'in samo sama'an aku hala borani sobolupmnyo. Agatn ubo nantai, aman aku mati damo hidup, Kristus tajahan dimuliaan agatn lapo ja' inyo tojadi ko bukakng-tubuhku.

Kisah Boko Rasul 20:28

Kaitn gola' monjago diri kaitn huatan urakng bukai inyo udah pocayo agatn Yesus oca' totap pocayo. Allah udah monobus monsio doi' hukupan dosa agatn darah-Nyo sikuꞌ. Jadi, sia' udah monjadi umant Allah siku'. Kaitn udah dipilih Roh Allah pakai' momimpitn sia' nantai. Obai nantai, kaitn gola' monjago sia' samo sama'an gombala monjago kabatn dombanyo.

Ibrani 9:12

Kristus udah mansu' ko dalapm Ruakan Maho Suci di dalapm potungguan nantai sokali pakai' somanah-manahnyo. Sio kinyo mombaba' darah kambikng sabukan damo darah ana' sapi, apo Sio mansu' agatn mombaba' darah-Nyo siku'. Agatn sama'an nantai, Sio udah mombebasan kito doi' hukupan dosa kito pakai' somanah-manahnyo.

Galatia 3:13

Sobondarnyo, kito somuo gola' dihukupm obai kito kinyo hala ulih monaati somuo porintah huatan poraturan Allah inyo ditulis Musa dalapm buku Hukupm Torat. Apo Kristus monyolamant'an kito doi' hukupan nantai. Sio inyo monanggukng hukupan nantai pakai' kito. Watu Sio mati di kayu salib. Obai ado totulis dalapm Buku Suci, “Urakng inyo dipaku di kayu salib ia'an urakng inyo dihukupm Allah.”

1 Korintus 10:31

Apo aku momandiran ni'in: Aman kaitn makatn, damo minum, damo molabuhan la'apo pan, labuhancam somuonyo oca' urakng bukai momuji Allah.

Wahyu 5:9

Sia' monyanyian nyanyian boharu pakai' momuji Ana' Domba nantai. Kato sia', “Duatn inyo cucu' monorima' gulukan buku nian lalu molopasan boko segelnyo. Obai, Duatn udah disombolih; Agatn darah Duatn siku', Duatn udah mombayar hukupan dosa boko urakng doi' sotiap suku, sotiap baso, sotiap banso, sotiap negara. Duatn molabuhan nantai pakai' bulah sia' monjadi umant umputn Allah.

Matius 5:16

Porbuatan boi' kaitn samo sama'an torakng. Jadi, kaitn gola' bulah koboi'an di hadapan urakng oca' sia' ulih moniant nantai. Lalu sia' paca'an momuji Allah Bopai kaitn di sorugo.”

2 Petrus 2:1

Apo, pado joman komai ado boko nabi palsu jam di antaro boko urakng inyo pocayo ko Allah. Samo sama'an nantai, di antaro kaitn paca'an ado boko guru palsu. Sia' paca'an monipu urakng agatn boko ajaran salah inyo mombonasoan urakng. Malah sia' paca'an monyangkal Tuhatn Yesus inyo bokuaso atas sia', padohal Sio inyo udah monobus oca' sia' dapat dibebasan doi' hukupan dosa sia'. Obai porbuatan sia' siku' nantai, jadi sia' paca'an copat bonaso.

Roma 6:19

(Aku tohu kaitn ija' manah mongoroti boko hal rohani. Jadi, aku momakai contoh ni'in mongona'i hulutn oca' kaitn lobih mudah mongoroti.) Komai kaitn monyorahan diri kaitn monjadi hulutn dosa. Boko anggota bukakng kaitn digunoan pakai' bulah boko hal inyo kotor huatan jahat. Apo watu ni'in kaitn gola' monyorahan diri kaitn monjadi hulutn Allah oca' boko anggota bukakng-tubuh kaitn ulih digunoan pakai' bulah boko hal inyo bondar huatan borosih doi' dosa.