1 Korintus 6:11 - Porjanjian Boharu Torjomahan Baso Dilakng Soari-ari

¹¹ Ija' komainyo ado boko urakng di antaro kaitn inyo hidup sama'an nian. Apo kaitn udah diborosihi doi' boko dosa. Kaitn udah monjadi umant husus umputn Allah. Kaitn udah dianggap bondar di hadapan Allah. Somuo nian tojadi obai kuaso Tuhatn Yesus Kristus huatan kuaso Roh Allah kito.

1 Korintus 6:11 ပူးပေါင်းရင်းမြစ်များ

1 Korintus 1:30

Jadi, kaitn ado hubukan dokat agatn Kristus Yesus obai porbuatan Allah, bukainyo obai porbuatan kaitn. Yesus monjadi kopintar-corodi'an Allah bagi kito. Molalu'i Yesus, kito monjadi bondar di hadapan Allah. Kito pan monjadi umant husus pakai' umputn Sio. Sio monanggukng hukupan dosa kito pakai' monobus kito.

Kisah Boko Rasul 22:16

Jadi ni'in, jangan monanti agi'. Bodiritn huatan bosodiacam pakai' dibaptis. Bodoacam ko Tuhatn Yesus oca' boko dosa kolai diamputi.’

Roma 8:30

Ubo nantaiam, Allah moningkau sia' inyo udah dipilih Sio doi' komai. Sia' nantai inyo Sio tingkau, Sio pan bulah sia' monjadi bondar di pohadapan-Nyo. Sia' nantai inyo monjadi bondar, Sio pan moonji'i kohidupan inyo mulia.

1 Petrus 1:2

Allah, Bopai kito, momilih kaitn sosuai agatn roncana-Nyo. Roh Allah mombulah kaitn monjadi borosih doi' dosa oca' kaitn monaati Yesus Kristus. Allah molabuhan nantai jam oca' kaitn ulih monorima' hasil doi' darah Yesus Kristus inyo dicurahan ko kaitn watu Sio mati di kayu salib. Aku bodoa oca' Allah monunju'an koboi'an ongko moonji'i sonang-asau ko kaitn agatn bolimpah.

Ibrani 10:22

Obai nantai, mara kito datakng dampikng ko Allah agatn hati inyo boi' ongko bondar-bondar kuat pocayo. Obai, hati kito udah diborosihi doi' pikiran jahat, ongko bukakng-tubuh kito udah diborosihi agatn ara'i inyo murni.

Efesus 5:26

oca' sia' monjadi borosih doi' dosa sia'. Sio momakai ara'i huatan Pomandiran Allah pakai' mombulah sia' borosih.

Efesus 5:8

Memang komainyo kaitn bodiapm di dalapm kogolapan. Apo watu ni'in kaitn udah mansu' ko dalapm torakng obai kaitn mongonal Tuhatn Yesus. Jadi, kaitn gola' hidup agatn caro inyo sosuai pakai' boko urakng inyo hidup di dalapm torakng.

Kisah Boko Rasul 26:18

Kolai paca'an monulukng sia' oca' mongoroti jadi sia' co hidup dalapm kopocaya'an inyo salah, apo bobali' pocayo inyo bondar. Kolai paca'an monulukng sia' oca' mongoroti jadi sia' kinyo hidup dibabah kuaso Iblis agi', apo bobali' ongko hidup di babah kuaso Allah. Agatn ubo nian, aman sia' pocayo agatn Aku, ongko boko dosa sia' paca'an diamputi. Sia' mondapat tompat di antaro umant Allah.’ Nanam pomandiran Yesus ko Aku.

Roma 8:33

Kito umant pilihan Allah inyo udah Sio pulah monjadi bondar di hadapan-Nyo. Jadi, conyiant ado urakng inyo ulih monyalahan kito.

Roma 5:1

Watu ni'in, kito udah monjadi bondar obai kito pocayo ko Yesus. Jadi, kito ado damai agatn Allah. Nantai tojadi obai apo inyo Tuhatn Yesus Kristus labuhan pakai' kito.

2 Tesalonika 2:13

Apo, boko somadikan, Tuhatn mongasihi kaitn. Koi bosukur ko Allah obai kaitn. Cucu' koi bosukur obai Allah momilih kaitn. Doi' mulonyo, Allah momilih kaitn oca' kaitn disolamant'an. Koi momboritoan Kabar Boi' inyo bondar ko kaitn. Ongko kaitn pocayo borito nantai. Roh Allah jam hala bulah kaitn mongkitn suci. Nianam caro kaitn ditingkau ongko disolamant'an oca' kaitn bodapat bagian doi' kohormatan Yesus Kristus, Tuhatn kito.

Kisah Boko Rasul 13:39

Jadi, somuo urakng inyo pocayo agatn Yesus, dipohitukan bondar di hadapan Allah.

Wahyu 1:5

Ongko doi' Yesus Kristus, inyo monyatoan kobondaran Allah agatn sotia. Hoyu' Sio nam urakng inyo hidup agi' doi' komatian. Sionam Rajo inyo bokuaso doi' somuo rajo di dunia. Topuji am Yesus inyo mongasihi kito. Sio mombebasan kito doi' dosa kito, obai Sio mombayar agatn darah-Nyo siku' timpu Sio mati di kayu salib.

Galatia 3:11

Jadi, urakng dianggap bondar di hadapan Allah bukainyo agatn caro monaati Hukupm Torat. Hal nantai udah jolas obai di dalapm Buku Suci ado pomandiran bukai agi' inyo totulis: “Boko urakng inyo pocayo ko Allah paca'an dianggap bondar di hadapan Allah. Sia' paca'an mondapat'an hidup inyo sobondarnyo.”

Wahyu 7:14

Aku bopandir ko io, “Aku cuku tohu, habakng. Duatn mongotohu'inyo.” Jadi io bopandir ko aku, “Sia' ni'inam boko urakng inyo koluar doi' masa ajab sonsaro inyo bosar. Sia' udah bulah jubah sia' monjadi putih, monopasinyo agatn darah Ana' Domba.

Galatia 2:16

Sokomai koi bopikir sama'an nantai jam. Apo ni'in koi udah mongotohu'i obai co nyiant urakng dipohitukan bondar di hadapan Allah obai sia' monaati Hukupm Torat. Urakng dipohitukan bondar di hadapan Allah bayo obai sia' pocayo agatn Yesus. Nanam alasan koi udah pocayo agatn Kristus Yesus. Koi dipohitukan bondar di hadapan Allah obai koi pocayo agatn Kristus, bukainyo obai koi monaati Hukupm Torat. Hal nantai udah totulis dalapm Buku Suci, “Jadi co nyiant siku' urakng pan inyo dipohitukan bondar dihadapan Allah” agatn caro monaati Hukupm Torat.

1 Korintus 12:2

Ingant watu kaitn ija' bolupm konal agatn Allah. Kaitn dipongaruhi pakai' monyombah boko duato inyo co ulih bopandirobai boko duato nantai kinyo bobondar hidup.

Ibrani 2:11

Yesus momborosihi monsio doi' dosa. Sio inyo momborosihi ongko sia' inyo diborosihi, Bopai sia' siku'. Nantai am alasannyo Yesus kinyo malu monyobut sia' boko somadikan-Nyo.

Galatia 3:24

Jadi, Allah moonji'i Hukupm Torat pakai' monjago kito sampai Kristus datakng, ia'an Yesus, Rajo Inyo Dijanjian Allah. Nantai tojadi oca' kito monjadi bondar di hadapan Allah obai kito pocayo ko Yesus.

Roma 5:9

Ni'inan kito udah dibondaran molalu'i komatian Kristus; obai nantai am kito pasti paca'an disolamant'an jam doi' ponggodi Allah molalu'i Kristus.

Roma 3:24

Apo Allah udah monunju'an koboi'an-Nyo ko monsio. Sio mombulah caronyo oca' urakng ulih monjadi bondar di hadapan-Nyo, nyiant usaha doi' sia'. Kristus Yesus inyo mombayar pakai' mombebasan sia' doi' hukupan dosa.

1 Petrus 3:21

Hal nantai monggambaran baptisan inyo watu ni'in monyolamant'an kaitn. Baptisan ni'in bukainyo upacara pakai' mombulah bukakng kaitn borosih doi' kotoran. Baptisan ia'an upacara pakai' momuhun ko Allah oca' Sio mombulah hati kaitn borosih. Baptisan nantai monyolamant'an kaitn obai Yesus Kristus udah hidup agi' doi' komatian,

1 Petrus 1:22

Obai kaitn monaati kobondaran, kaitn udah monjadi suci di hadapan Allah. Jadi, kaitn dapat mongasihi somadikan kaitn inyo sosamo pocayo, agatn hati tulus. Obai nantai, kaitn gola' bobondar hala mongasihi agatn soponuh hati.

Galatia 3:8

Doi' komai, Allah ado hajat pakai' urakng bukainyo Yahudi. Aman sia' pocayo, jadi sia' dianggap bondar di hadapan Allah. Allah momboritoan Kabar Boi' nantai ko Abrahapm jouh-jouh ari sobolupmnyo. Kabar Boi' nantai totulis dalapm Buku Suci:, “Somuo banso paca'an diborokati molalu'i kolai.”

Roma 4:5

Apo nantai bukai caronyo Allah mombulah urakng inyo bodosa monjadi bondar di hadapan-Nyo. Monjadi bondar bukainyo sama'an upah apo sama'an hadiah. Sobab, Allah mombulah urakng monjadi bondar bukai obai porbuatannyo apo obai io pocayo.

Lukas 18:14

Ongko Yesus bopandir, “Dinga'anbo! Timpu pulakng ko rumah, ponagih pajak nantai inyo ditorima' Allah, bukainyo urakng Farisi nantai. Obai Allah tajahan ngombabahan somuo urakng inyo moninggian diri. Apo, Allah tajahan moninggian somuo urakng inyo ngombabahan diri.”

Yohanes 13:10

Kato Yesus ko io, “Urakng inyo udah mandi', bukakng-tubuhnyo borosiham. Io padohan mombasu'i bukakng-tubuhnyo agi', ongkah kakinyo am. Kaitn ni'in udah borosih, apo kinyo somuo kaitn!”

Yohanes 13:8

“Jangan, Tuhatn!” kato Petrus ko Sio, “Jangan sokali-kali Duatn mombasu'i kakiku!” Apo, Yesus monimbas, “Aman Aku co mombasu'i kaki kolai, rotinyo kolai kinyo ado hubukan agatn Aku.”

Ibrani 10:29

Jadi, urakng inyo kinyo morogo'i Ana' Allah cucu' dihukupm lobih borat agi'. Urakng nantai moremehan darah Yesus inyo mombulah io monjadi borosih doi' dosanyo, ia'an darah Yesus inyo monsahan pojanjian boharu doi' Allah. Urakng nantai mohayam Roh Allah inyo monunju'an kasih karunia.

1 Yohanes 2:12

Poana'anku! Aku monulisan ni'in ko kaitn obai dosa kaitn udah diamputi obai porbuatan Yesus Kristus.

Matius 20:4

Lalu katonyo ko sia', ‘Kaitn botula' jam bokorojo di kobutn anggurku. Aku paca'an mombayar kaitn agatn upah inyo cucu'.’ Jadi, sia' pan botula' bokorojo di kobutnnyo.

Yohanes 5:4

Obai, sowatu-watu ado molekat Tuhatn inyo turutn lalu monggolumbakan ara'i di kolapm nantai. Sopo ja' inyo lobih holu mansu' ko dalapm ara'i nantai lopas jadi digolumbaki, lalu urakng nantai nyamanam doi' ponyakit la'apo pan.]