1 Korintus 4:9 - Porjanjian Boharu Torjomahan Baso Dilakng Soari-ari

⁹ Apo, monurut aku, Allah udah moonji'i koi boko rasul-Nyo kodudu'an inyo kotakng babah. Sio bulah koi monjadi samo sama'an boko urakng inyo dibaba' koluar pakai' dihukupm mati. Obai koi diporotian urakng disoluruh dunia, ia'an somuo monsio huatan somuo molekat.

1 Korintus 4:9 ပူးပေါင်းရင်းမြစ်များ

Kisah Boko Rasul 19:29

Banya' urakng bukai monjadi tolibat. Soluruh kota nantai monjadi kacau. Urakng banya' borindakng-ramai bonggidi'an momansu'i lapakan umum inyo bosar. Duo kawal Paulus ditangkap ongko dibaba' ko su'utn jam. Damo sia' Gayus ongko Aristarkhus. Sia' duo doi' Makedonia apo tuyut Paulus dalapm polayatannyo.

Kisah Boko Rasul 19:31

Malah boboropo pombosar propinsi Asia pan monyampaian posatn oca' io jangan mansu' ko tompat nantai. Boko pombosar nantai udah monjadi kawal Paulus doi' komai.

Roma 8:36

Ado inyo totulis dalapm Buku Suci: “Obai koi pocayo ko Duatn, jadi sotiap ari boko urakng honda' mombunuh koi. Koi samo sama'an boko domba inyo tajahan disombolih.”

1 Korintus 15:19

Soandainyo, kito yakitn huatan boharap ko Kristus pakai' kohidupan di dunia ni'in mo, kito nantai urakng inyo palikng uyuh doi' somuo monsio.

2 Korintus 11:23

Kata'an sia' mongatoan obai sia' molayati Kristus ai? Aku molayati Kristus agatn lobih boi'! (Aku gogilo momuji diri ubo ni'inan!) Aku bokorojo molayati lobih koras doi' pado sia'. Aku kotakng opat dimansu'an ko dalapm ponjara obai momboritoan mongona'i Kristus. Aku kotakng opat dipantu', opat jam hampir mati.

2 Korintus 6:9

Koi di anggap kinyo tokonal, apo koi dikonal urakng banya'. Koi opat komponyalan, apo koi totap hidup. Koi hala disiksa, apo koi co mati.

1 Tesalonika 3:3

Jadi kaitn co lomah somangant watu kaitn mohadapi ajab sonsaro. Kaitn siku' udah mongotohu'i obai ajab sonsaro nantai ia'an kohonda' Allah pakai' kito.

Ibrani 1:14

Apo boko molekat ia'an boko roh inyo molayati Allah. Sia' diutus pakai' monulukng boko urakng inyo tajahan monorima' kosolamant'an.

Ibrani 10:33

Sowatu-watu kaitn dihanyam huatan disiksa di hadapan urakng banya'. Kadakng pan kaitn jumpat mondorita' agatn urakng inyo dipoulahan sama'an nantai.

Ibrani 11:36

Ado boko urakng inyo pocayo inyo dihanyam, dicambuk, dikobat agatn rantai ongko inyo ditamoan ko dalapm ponjara.