1 Korintus 4:6 - Porjanjian Boharu Torjomahan Baso Dilakng Soari-ari

⁶ Boko somadikan, boko pomandiran inyo aku tulis ni'in bolaku pakai' diri aku siku' huatan Apolos. Tujuannyo oca' doi' toladatn koi, kaitn ulih bolajar roti ungkap'an ni'in: “Jangan mombosar-bosaran apo inyo totulis.” Agatn sama'an nian, kinyo ado di antaro kaitn inyo paca'an bopangkakng agatn moutamoan sikuꞌ urakng di atas urakng bukai.

1 Korintus 4:6 ပူးပေါင်းရင်းမြစ်များ

2 Korintus 11:4

Obai, kaitn siap monorima' urakng inyo datakng mombaba' ajaran inyo salah mongona'i Yesus. Nantai bukainyo doi' ajaran inyo bondar mongona'i Yesus inyo udah koi boritoan ko kaitn komai. Kaitn pan honda' monorima' roh inyo bukainyo doi' Roh Allah inyo udah kaitn torima' komai. Kaitn honda' pocayo ajaran inyo bukai doi' Kabar Boi' inyo udah kaitn pocayo komai.

2 Korintus 12:19

Somanahan ni'in, kaitn bopikir obai koi bousaha mombela diri tohadap kaitn. Apo, boko somadikan inyo ku kasihi, sobondarnyo ninam tujuan koi: (Koi mongatoan ni'in di hadapan Allah ongko sobagai urakng inyo hidup di dalapm Kristus.) Somuo inyo koi labuhan ia'an pakai' monulukng kaitn somongkitn kuat pocayo agatn Tuhatn.

2 Korintus 12:6

Umpamonyo aku totap honda' momuji diri, nantai kinyo boroti aku urakng inyo budu. Obai, aku ulih momuji diri mongona'i hal inyo bondar. Apo cuku molabuhan nantai oca' jangan ado urakng inyo bopikir aku kotakan hebat obai poniant'an nantai. Aku honda' oca' sia' bayo monilaiku bodasaran lapo inyo sia' tiat ku labuhan ongko lapo inyo sia' dinga' inyo ku pandiran. Kinyo lobih doi' nantai.

Kolose 2:18

Ado urakng inyo pompadah rondah hati huatan monyombah boko molekat. Jangan biaran urakng sama'an nantai bulah kaitn pocayo ajaran inyo salah, sampai kaitn co dapat borokat doi' Allah. Urakng sama'an nantai buhau agatn mongatoan io ado boko poniant'an doi' Allah. Apo sobondarnyo pikirannyo duniawi inyo bulah io buhau.

1 Tesalonika 1:5

Obai watu koi momboritoan Kabar Boi' ko kaitn, koi kinyo bayo momakai boko pomandiran koi modas. Apo kuaso Roh Allah monulukng koi monyampaiannyo huatan koi kotakng yakitn aman Kabar Boi' nantai bondar. Kaitn mongotohu'i somuo nantai obai kaitn udah moniant caro hidup koi. Watu koi ado di antaro kaitn, koi molayati kaitn.

Roma 12:3

Allah udah moonji'i kasih karunia-Nyo ko aku jadi aku bopandir ko kaitn somuo: jangan am kaitn moanggap diri kaitn lobih pontikng doi' inyo sobondarnyo. Honda'nyo kaitn monilai diri kaitn agatn rondah hati: masikng-masikng monilai dirinyo monurut komampuan inyo di onju' Allah ko io obai io pocayo ko Yesus.

2 Korintus 10:7

Kaitn gola' bopikir boboi' mongona'i lapo inyo kaitn kotohu'i. Aman ado urakng inyo yakitn mongotohu'i obai io nam umputn Kristus, urakng nian gola' mongotohu'i ni'in: Koi pan umputn Kristus jam samo sama'an io jam.

2 Korintus 4:15

Koi mohadapi somuo pondorita'an nantai pakai' koboi'an kaitn. Nantai tojadi oca' mongkitn banya' urakng moalapi koboi'an Allah. Jadi, lobih banya' urakng bosukur ko Allah. Agatn ubo nantai, Sio dimuliaan.

1 Korintus 8:1

Ni'in mongona'i dagikng bonatakng inyo diposombahan ko boko duato. Ado boko urakng bopandir, “Somuo kito ado pongotohuan.” Apo aman siku' urakng ado ‘pongotohuan husus’, ongko urakng nantai jadi buhau. Sobondarnyo kito gola' mongasihi urakng bukai. Nantaiam caronyo kito bulah urakng bukai monjadi lobih kuat socaro rohani.

1 Korintus 5:6

Co boi' kaitn mooso buhau obai porbuatan urakng nantai. Pasti kaitn udah tohu obai sodikit ragi paca'an bulah somuo adonan roti mongombakng. Samo sama'an nian jam, dosa siku' urakng ulih bulah banya' urakng molabuhan dosa.

1 Korintus 3:19

Obai Allah moanggap kopintar-corodi'an monsio kinyo ado rotinyo. Hal nantai udah totulis di dalapm Buku Suci: “Ado boko urakng inyo moanggap diri sia' pintar-corodi'. Apo Allah momakai pomikiran sia' siku' pakai' mongalahan sia'.”

2 Timotius 2:10

Jadi, aku botahatn mohadapi somuo macapm ajab sonsaro oca' boko urakng inyo dipilih Allah dapat kosolamant'an molalu'i Kristus Yesus huatan hidup tohormat somanah-manahnyo.

2 Korintus 10:15

Koi co momuji diri agatn polayatan inyo urakng bukai labuhan di luar batas inyo Allah tontuan pakai' koi. Apo, koi momuji mongona'i polayatan koi di antaro kaitn. Polayatan nantai ija' dalapm batas inyo Allah tontuan pakai' koi. Koi boharap obai kaitn mongkitn kuat pocayo ko Kristus. Ongko obai nantai, kaitn paca'an lobih mohormati koi.

2 Korintus 10:12

Ado boko urakng totontu inyo momuji diri sia' siku'. Soandainyo sia' memang hebat, koi co borani mongatoan diri koi samo hebat sama'an sia'. Apo sobondarnyo sia' budu. Obai, sia' ongkah mombandikan dirinyo agatn diri sia' siku'. Sia' momakai ponilaian sia' siku' monganggap dirinyo hebat.

1 Korintus 13:4

Urakng inyo mongasihi ia'an urakng inyo hala sabar huatan hala bulah koboi'an agatn urakng bukai. Urakng inyo mongasihi nantai ia'an urakng inyo kinyo tungi. Io kinyo bopangkakng diri huatan kinyo buhau.

1 Korintus 9:23

Aku hidup agatn somuo caro nantai oca' lobih banya' urakng monorima' Kabar Boi' nantai. Huatan oca' aku ulih monorima' somuo borokat inyo dijanjian dalapm Kabar Boi' nantai.

1 Korintus 5:2

Apo kaitn bopangkakng obai porbuatan urakng nantai! Soharusnyo kaitn salu', ongko mongoluaran io doi' antaro kaitn.

1 Korintus 3:21

Obai nantai, jangan hala bopangkakng sobagai urakng doi' kolompok aku, damo Apolos damo Petrus. Obai somuonyo umputn kaitn! Dunia umputn kaitn. Aman kaitn hidup damo mati, boko hal inyo tojadi ni'in damo nononyo, somuonyo umputn kaitn!

1 Korintus 1:31

Obai nantai, kito gola' molabuhan la'apo inyo totulis dalapm Buku Suci: “Aman ado urakng inyo bopangkakng, sobondarnyo io gola' bopangkakng mongona'i la'apo inyo dilabuhan Tuhatn.”

1 Korintus 1:19

Obai, ado pomandiran Allah dalapm Buku Suci inyo totulis, “Aku paca'an mombonasoan pintar-corodi' inyo ado pado boko urakng inyo pandai monurut monsio. Aku paca'an mongacauan pongorotian boko urakng pandai.”

1 Korintus 1:12

Masudku, ado di antaro kaitn inyo bopandir, “Aku urakng doi' kolompok Paulus.” Ado inyo bukai bopandir, “Aku urakng doi' kolompok Apolos.” Damo “Aku urakng doi' kolompok Petrus.” Ado inyo bukai agi' inyo bopandir, “Aku urakng doi' kolompok Kristus.”

Kisah Boko Rasul 18:24

Pontongahan Paulus di propinsi Galatia huatan Frigia, ado urakng inyo mongajar mongona'i Yesus di kota Efesus di propinsi Asia. Urakng nantai bodamo Apolos. Io nantai urakng Yahudi inyo boasal doi' Aleksandria ibu kota di nogori Mesir. Io pintar bopandir. Io pan udah banya' mompolajari Buku Suci.

Kisah Boko Rasul 19:1

Timpu Apolos ija' ado di kota Korintus di propinsi Akhaya, Paulus udah mondataki boboropo doerah bukai di propinsi Galatia huatan Frigia. Io bojalatn torus sampai di Efesus di propinsi Asia. Di santai io botomu agatn boboropo urakng inyo pocayo.

2 Korintus 12:20

Obai aku bogonang watu ku datakng nononyo, kolaku'an kaitn kinyo boi' sama'an inyo ku kohonda'i. Ubo nian jam, aku gola' monogur kaitn, tindakanku kinyo samo agatn kohonda' kaitn. Aku kuatir kaitn hala botikakng-bokolohi, tungi, ponggodian, molajuan kohonda' diri siku', monjahai'an urakng bukai, mohahadu, buhau, bulah kokacauan.