1 Korintus 4:1 - Porjanjian Boharu Torjomahan Baso Dilakng Soari-ari

¹ Jadi, kaitn gola' borotian koi somuo agatn caro ni'in: Koi ninam boko polayatn Kristus. Koi ninam urakng inyo Allah pocayoam pakai' momboritoan roncana-Nyo inyo komai kinyo dikotohu'i monsio.

1 Korintus 4:1 ပူးပေါင်းရင်းမြစ်များ

Matius 13:11

Timbas Yesus, “Kaitn udah dionji'i pongorotian mongona'i Koraja'an Sorugo inyo bolupm dikotohu'i urakng bukai. Apo urakng banya' ni'in bolupm dionji'i pongorotian nantai.

Matius 24:45

“Sopo kironyo urakng inyo pintar-corodi' huatan sotia ko Aku? Sio samo sama'an siku' hulutn inyo sotia huatan pintar-corodi'. Habakngnyo moangkat io monjadi kopala' boko hulutn inyo bukai. Habakngnyo moonji'i tanggukng-jawab ko io pakai' bobagian pomakatn ko boko hulutn inyo bukai pado watunyo.

Markus 4:11

Jadi, Yesus monjolasan ko sia'. Kato-Nyo, “Kaitn udah dipadahi mongona'i Koraja'an Allah inyo bolupm dikotohu'i urakng bukai. Apo, ko boko urakng di luar, Aku mongajar bomacapm agatn momakai poumpamoan.

Lukas 12:42

Yesus monimbas, “Pongajaran-Ku nantai pakai' sotiap urakng inyo pintar corodi' ongko sotia agatn Aku. Io samo ubo hulutn inyo sotia ongko pintar-corodi'. Habakngnyo moangkatnyo monjadi kopala' boko hulutn bukainyo. Habakngnyo moonji'i tanggukng-jawab ko io pakai' moonji'i pomakatn ko boko hulutn bukainyo pas watunyo.

Lukas 8:10

Timbas Yesus, “Ko kaitn udah dionji'i komampuan pakai' mongoroti mongonaꞌi Koraja'an Allah inyo bolupm dikotohu'i urakng bukai. Apo ko boko urakng bukai, Aku mongajar agatn poumpamoan, oca' biar pan sia' borotian apo co bondar-bondar moniant, sia' mondingaꞌ apo sia' co mongoroti.

Roma 11:25

Boko somadikan! Oca' kaitn kinyo bopikir kaitn udah mongotohu'i boko la'apo pan, jadi aku honda' momadahannyo ko kaitn mongona'i hajat Allah ni'in inyo komai kinyo dikotohu'i monsio: Sobagi'an banso Israel udah monjadi korikng hati, kinyo honda' pocayo agatn Yesus. Apo, koadaan ni'in bayo sampai jumlah monsio doi' banso bukai udah datakng ko Allah, ia'an nantai jumlah inyo udah ditontuan-Nyo.

Roma 16:25

Topujicam Allah! Io inyo bokuaso bulah kaitn kuat pocayo sosuai agatn Kabar Boi' mongona'i Yesus Kristus inyo ku boritoan. Kabar Boi' nantai momadahan mongona'i hajat Allah pakai' somuo banso. Somanah boabad-abad, conyiant monsio inyo mongotohu'i hajat Allah nantai.

1 Korintus 2:7

Inyo koi ajaran nantai kopintar-corodi'an Allah. Sokomai, boko urakng kinyo tohu bondar mongona'i kopintar-corodi'an Allah nantai. Kopintar-corodi'an Allah nantai botapu'. Apo sobolupm Allah bulah dunia ni'in, Sio monyiap'an kopintar-corodi'an nantai. Sio molabuhan nantai, oca' kito pan monorima' komulia'an doi' Sio.

1 Korintus 3:5

Porotiancam! Apobai Apolos pontikng? cado! Apobai Paulus pontikng? cado jam! Koi duo cumo polayatn dibabah kuaso Tuhatn pakai' monulukng kaitn pocayo ko Sio. Koi ongkah molabuhan pokoroja'an inyo Tuhatn onju' ko koi siku'-monyiku'.

1 Korintus 4:13

Timpu boko urakng bopandir monjahai'an koi, koi totap bopandir boi' ko sia'. Sampai ni'in pan, koi monjadi sampah dunia, inyo dibuakan ja'am.

1 Korintus 4:2

Tugas utamo doi' polayatn Tuhatn ia'an sio gola' ulih dipocayo

2 Korintus 11:23

Kata'an sia' mongatoan obai sia' molayati Kristus ai? Aku molayati Kristus agatn lobih boi'! (Aku gogilo momuji diri ubo ni'inan!) Aku bokorojo molayati lobih koras doi' pado sia'. Aku kotakng opat dimansu'an ko dalapm ponjara obai momboritoan mongona'i Kristus. Aku kotakng opat dipantu', opat jam hampir mati.

2 Korintus 12:6

Umpamonyo aku totap honda' momuji diri, nantai kinyo boroti aku urakng inyo budu. Obai, aku ulih momuji diri mongona'i hal inyo bondar. Apo cuku molabuhan nantai oca' jangan ado urakng inyo bopikir aku kotakan hebat obai poniant'an nantai. Aku honda' oca' sia' bayo monilaiku bodasaran lapo inyo sia' tiat ku labuhan ongko lapo inyo sia' dinga' inyo ku pandiran. Kinyo lobih doi' nantai.

2 Korintus 4:5

Obai bukainyo diri koi siku' inyo koi boritoan. Apo, koi momboritoan mongona'i Yesus Kristus sobagai Tuhatn. Sio inyo moutus koi pakai' monjadi polayatn kaitn.

2 Korintus 6:4

Apo, dalapm somuo la'apo pan inyo koi pulah, koi monunju'an obai koi ninam boko urakng inyo molayati Allah. Ia'an nantai, koi hala sabar mohadapi bomacapm pondorita'an.

Efesus 1:9

Obai Allah udah momandiran ko kito roncana-Nyo, inyo komai kinyo dikotohu'i monsio. Doi' mulonyo, Allah udah monontuan obai roncana-Nyo paca'an dilabuhan molalu'i Kristus. Roncana-Nyo nantai sosuai agatn kohonda'-Nyo huatan monyonangan hati-Nyo.

Efesus 6:19

Bodoa jam pakai' ku, oca' sotiap watu aku bopandir, Allah moonji'i kato-kato ko aku. Bodoa jam oca' aku borani momboritoan Kabar Boi' mongona'i hajat Allah inyo komainyo kinyo dikotohu'i monsio.

Kolose 2:2

Aku bousaha oca' hati kaitn somuo dikuatan huatan kaitn bosatu dalapm kasih. Agatn ubo nian, kaitn mondapat'an somuo borokat huatan monjadi yakitn obai sobondarannyo mongoroti mongona'i Yesus. Kaitn pan paca'an mongotohu'i hajat Allah inyo komai kinyo dikotohu'i monsio. Ia'an, kaitn somuo ulih mongonal Kristus.

Kolose 4:3

Aku tongahan dalapm ponjara obai aku momboritoan Kabar Boi'. Jadi, bodoa jam pakai' koi oca' Allah moonji'i jalatn pakai' koi momboritoan Kabar Boi' mongona'i Kristus, ia'an hajat Allah inyo komai kinyo dikotohu'i monsio.

1 Timotius 3:16

Sobondarnyo la'apo inyo tosimpatn dalapm kopocaya'an kito kotakan luar biaso! Boko hal nantai monunju'an caro hidup inyo monyonangan Allah. Boko hal nantai ia'an: “Yesus moniant'an diri-Nyo dalapm rupo monsio. Roh Allah monyatoan obai inyo dilabuhan Yesus bondar. Yesus monyatoan diri-Nyo ko boko molekat. Boko urakng momboritoan mongona'i Yesus ko somuo banso. Boko urakng di soluruh dunia monjadi pocayo ko Yesus. Allah bulah Yesus noi' ko sorugo dalapm komulia'an.”

1 Timotius 3:6

Watu momilih urakng pakai' monjadi ponotua', jangan momilih urakng inyo hoyu' pocayo ko Yesus. Mungkitn urakng inyo hoyu' pocayo sama'an nantai buhau. Aman io buhau, Allah paca'an mohukupm io samo sama'an Rajo Sitatn obai io pan buhau.

1 Timotius 3:9

Boko diakon gola' hidup monuruti hati nurani inyo suci pakai' hala pocayo ko ajaran inyo bondar mongona'i Yesus inyo udah dinyatoan Allah ko kito.

Titus 1:7

Siku' urakng pongawas jomaat bokorojo moatur Rumah Allah. Obai niannam, io gola' hidup bujur bondar. Io culih buhau. Io culih copat godi damo urakng inyo pomabu'. Io culih gala' bokolohi damo gala' ngontumbuki urakng oca' mondapat'an untukng.

1 Petrus 4:10

Allah udah monunju'an koboi'an-Nyo ko kaitn agatn moonji'i somuo kaitn komampuan husus inyo bobeda-beda. Jadi, gunoancam komampuan husus doi' Allah nantai agatn caro inyo boi', ia'an kaitn gola' monggunoan komampuan husus doi' Allah nantai oca' hala molayati urakng pocayo inyo bukai.