1 Korintus 3:5 - Porjanjian Boharu Torjomahan Baso Dilakng Soari-ari

⁵ Porotiancam! Apobai Apolos pontikng? cado! Apobai Paulus pontikng? cado jam! Koi duo cumo polayatn dibabah kuaso Tuhatn pakai' monulukng kaitn pocayo ko Sio. Koi ongkah molabuhan pokoroja'an inyo Tuhatn onju' ko koi siku'-monyiku'.

1 Korintus 3:5 ပူးပေါင်းရင်းမြစ်များ

2 Korintus 6:4

Apo, dalapm somuo la'apo pan inyo koi pulah, koi monunju'an obai koi ninam boko urakng inyo molayati Allah. Ia'an nantai, koi hala sabar mohadapi bomacapm pondorita'an.

2 Korintus 6:1

Sobagai urakng inyo bokorojo samo agatn Allah, jadi koi muhun ko kaitn: Jangannam bulah koboi'an Allah nantai monjadi sia-sia.

1 Petrus 4:10

Allah udah monunju'an koboi'an-Nyo ko kaitn agatn moonji'i somuo kaitn komampuan husus inyo bobeda-beda. Jadi, gunoancam komampuan husus doi' Allah nantai agatn caro inyo boi', ia'an kaitn gola' monggunoan komampuan husus doi' Allah nantai oca' hala molayati urakng pocayo inyo bukai.

2 Korintus 3:6

Sio inyo bulah koi sanggup dalapm molayati pomboritoan mongona'i Pojanjian Boharu inyo Sio pulah pakai' monsio. Pojanjian Boharu nantai kinyo mongona'i monuruti boko porintah inyo ditulis, apo mongona'i monuruti Roh Allah. Obai, boko porintah inyo ditulis di Hukupm Torat nantai mombaba' komatian. Apo, Roh Allah mombaba' kohidupan.

2 Korintus 11:23

Kata'an sia' mongatoan obai sia' molayati Kristus ai? Aku molayati Kristus agatn lobih boi'! (Aku gogilo momuji diri ubo ni'inan!) Aku bokorojo molayati lobih koras doi' pado sia'. Aku kotakng opat dimansu'an ko dalapm ponjara obai momboritoan mongona'i Kristus. Aku kotakng opat dipantu', opat jam hampir mati.

2 Korintus 4:7

Kabar Boi' mongona'i Kristus inyo kotakan borogo nantai koi baba' dalapm diri koi inyo kinyo borogo, inyo dipulah doi' tanah. Agatn ubo nantai oca' nyata obai kuaso inyo luar biaso nantai boasal doi' Allah, bukainyo doi' diri koi siku'.

2 Korintus 4:5

Obai bukainyo diri koi siku' inyo koi boritoan. Apo, koi momboritoan mongona'i Yesus Kristus sobagai Tuhatn. Sio inyo moutus koi pakai' monjadi polayatn kaitn.

2 Korintus 3:3

Sia' dapat mongotohu'i obai somadikan samo sama'an surat Kristus, inyo di tulis molalu'i polayatan koi. Surat nantai ditulis bukainyo agatn tintah apo agatn Roh Allah inyo hidup, bukainyo jam di batu tulis apo di hati monsio.

1 Korintus 3:10

Obai koboi'an Allah ko aku, Sio mombulah aku monjadi samo sama'an sikuꞌ tukakng bangunan inyo pandai. Aku inyo molota'an pondasi bangunan nantai, sodakan watu ni'in ado urakng bukai inyo mombangun di pucu' pondasi nantai. Apo sotiap urakng nantai gola' gogamant agatn caro io mombangun.

1 Korintus 12:28

Allah momilih boko urakng dalapm kolompok urakng pocayo. Inyo potamo, boko rasul, ia'an boko urakng inyo dipilih pakai' momboritoan Kabar Boi'. Inyo koduo, boko nabi, ia'an boko urakng inyo monyampaian posatn doi' Allah. Inyo kotigo, boko urakng inyo dionji'i komampuan pakai' mongajar. Ongko, ado boko urakng inyo dionji'i komampuan pakai' bulah mujisat. Ado jam boko urakng inyo dionji'i komampuan pakai' monyamani, boko urakng inyo dionji'i komampuan pakai' monulukng urakng bukai, boko urakng inyo dionji'i komampuan pakai' momimpitn, ongko boko urakng inyo dionji'i komampuan pakai' bopandir dalapm boko baso roh.

1 Korintus 9:17

Soumpamonyo aku momboritoan Kabar Boi' obai kohonda'ku siku', pasti aku bodapat upah. Apo sobondarnyo Allah inyo moutusku huatan mompocayoan tugas pakai' momboritoan Kabar Boi' nantai ko aku.

Yohanes 3:27

Timbas Yohanes, “Conyiant siku' urakng pan inyo ulih monguti' la'apo pan aman Allah kinyo moonju'nyo.

Matius 25:15

Sio mompocayoan duit nantai sosuai agatn pongulihan sia'. Sio moonju' lima' ribu pingkai' duit ko siku' hulutn. Sio moonju' duo ribu pingkai' duit ko siku' urakng hulutn inyo bukai. Sio moonju' soribu pingkai' duit ko polayatn inyo bukai agi'. Lalu io botula'.

Kolose 1:25

Allah mompocayoan aku agatn tugas molayati boko urakng inyo pocayo. Sio monyiuh aku pakai' monyampaian ko kaitn socaro longkap boko Pomandiran doi' Sio,

Efesus 3:7

Allah monunju'an kasih karunia-Nyo, ko aku agatn moutus aku momboritoan Kabar Boi' nantai. Kuaso-Nyo bokorojo dalapm diriku sampai aku ulih molayati Sio.

Kisah Boko Rasul 18:24

Pontongahan Paulus di propinsi Galatia huatan Frigia, ado urakng inyo mongajar mongona'i Yesus di kota Efesus di propinsi Asia. Urakng nantai bodamo Apolos. Io nantai urakng Yahudi inyo boasal doi' Aleksandria ibu kota di nogori Mesir. Io pintar bopandir. Io pan udah banya' mompolajari Buku Suci.

Kisah Boko Rasul 19:1

Timpu Apolos ija' ado di kota Korintus di propinsi Akhaya, Paulus udah mondataki boboropo doerah bukai di propinsi Galatia huatan Frigia. Io bojalatn torus sampai di Efesus di propinsi Asia. Di santai io botomu agatn boboropo urakng inyo pocayo.

Roma 15:16

ia'an nantai Sio moutus aku monjadi urakng inyo molayati Kristus Yesus di antaro boko banso bukainyo banso Yahudi. Aku samo sama'an imam inyo moonju' posombahan ko Allah. Obai, aku momboritoan Kabar Boi' doi' Allah ko sia' oca' sia' ulih ditorima' Allah obai Roh Allah bulah sia' monjadi borosih doi' dosa.

1 Korintus 16:12

Mongona'i somadikan kito, Apolos. Aku sobondarannyo monyosahan io oca' io tuyut bosamo agatn boko somadikan bukai pakai' monjongu' kaitn. Apo io bolupm honda' botula' sokarakng. Nono, aman io ado kosompatan, io paca'an datakng ko kaitn.

2 Korintus 4:1

Allah monunju'an kasih sayang-Nyo dalapm polayatan ni'in ko koi. Obai nantai, koi co putus asa.

2 Korintus 5:18

Somuonyo nantai dilabuhan Allah. Molalu'i Kristus, Allah udah bulah kito bodamai agi' agatn diri-Nyo. Allah jam moutus koi pakai' monulukng urakng bukai oca' sia' ulih bodamai agi' agatn Sio.

Kolose 1:23

Nantai paca'an tojadi aman kaitn totap pocayo ko Yesus agatn kuat. Jangan sampai kaitn tongga' pocayo. Kaitn gola' sotia huatan yakitn moharap'an obai Allah momonuhi somuo inyo Sio janjian dalapm Kabar Boi'. Memang kaitn udah mondinga' Kabar Boi' nantai. Kabar Boi' nantai udah diboritoan ko boko urakng di mono-mono. Aku ni'in, Paulus, udah monjadi polayatn inyo momboritoan Kabar Boi' nantai.

1 Timotius 1:12

Aku bosukur ko Kristus Yesus, Tuhatn inyo bokuaso. Sio hala moonji'i kokuatan ko aku pakai' molayati Sio. Aku bosukur obai Sio moanggap aku sotia. Jadi Sio momilih aku pakai' momboritoan Kabar Boi' mongona'i Sio.