1 Korintus 2:8 - Porjanjian Boharu Torjomahan Baso Dilakng Soari-ari

⁸ Boko pomimpitn di dunia ni'in kinyo mongorotikopintar-corodi'an Allah nantai. Sokironyo sia' mongoroti mongona'i nantai, pasti sia' kinyo mohukupm mati di kayu salib Tuhatn Yesus inyo mulia.

1 Korintus 2:8 ပူးပေါင်းရင်းမြစ်များ

Matius 11:25

Timpu nantai Yesus bodoa, “Bopai, Duatn umputn somuo dunia ni'in. Aku bosukur obai Duatn kinyo moombakan somuo nantai doi' urakng pintar-corodi', apo Duatn monyatoan somuonyo nantai ko masrakat kocit.

Matius 13:22

Tanah inyo bisi rado momant nantai monggambaran boko urakng mondinga'an Pomandiran Allah, apo manah komanahannyo, sia' kuatir mongona'i kohidupan di dunia ni'in. Sia' ditipu obai kodampuan lobih pontikng. Somuo hal nantai mohambat sia' sampai co hidup sosuai agatn Pomandiran Allah.

Lukas 23:34

Lalu Yesus bodoa, “Bopai, amputi sia' inyo monyobab'an Aku sampai dihukupm mati di kayu salib! Sia' co tohu la'apo inyo sia' pulah.” Lalu, boko projurit monguti' pakai'an Yesus. Sia' boundi pakai' monontuan sopo inyo tajahan mondapat'an pakai'an-Nyo.

Yohanes 16:3

Sia' paca'an molabuhan boko nantai obai sia' kinyo mongonal Bopai boi' pan agatn Aku.

Yohanes 7:48

Conyiant ado siku' urakng pan di antaro boko pomimpitn damo urakng Farisi inyo pocayo ko Sio.

Yohanes 8:19

Jadi, sia' bopandir ko Sio, “Di mono kironyo Bopai Duatn?” Timbas Yesus, “Kaitn co mongonal Aku damo Bopai-Ku. Soandainyo, kaitn bobondar mongonal Aku, pasti kaitn mongonal Bopai-Ku jam.”

Kisah Boko Rasul 13:27

Joman komai, boko nabi udah monulis mongona'i Rajo Inyo Dijanjian Allah. Watu ni'in, sotiap Ari Sabat, boko buku nabi nantai dibacoan di boko rumah sombayakng. Apo boko urakng Yerusalem kinyo mongoroti pomandiran boko nabi nantai. Sia' kinyo mongotohu'i Yesus nantai Rajo Inyo Dijanjian Allah. Boko pomimpitn agama sia' pan kinyo tohu. Sia' molawatn Yesus. Sia' samo sokali conyiant alasan pakai' mohukupm Yesus. Apo sia' totap monyosahan Gubernur Pilatus oca' Yesus dihukupm mati. Somuo porbuatan sia' nantai bulah pomandiran boko nabi doi' joman komai monjadi bondar-bondar tojadi.

Kisah Boko Rasul 7:2

Stefanus monimbasi, “Pombopaian boko poadikng-poanci'an dinga'anku bo! Bopai kito komai, Abrahapm bodiapm di doerah Mesopotamia, apo watu sio ija' di doerah Mesopotamia nantai, Allah inyo Maho Bosar udah moniant'an diri-Nyo ko sio.

1 Korintus 1:20

Jadi, boko urakng inyo pandai sobondarnyo sia' kinyo ado kopintar-corodi'annyo. Boko guru inyo mongajar Hukupm Torat, sobondarnyo pan sia' kinyo ado kopintar-corodi'annyo. Huatan jam, boko urakng inyo monjadi boko guru pongotohuan, sobondarnyo sia' kinyo ado kopintar-corodi'annyo. Obai Allah udah mombulah kopintar-corodi'an monsio monjadi budu.

1 Korintus 2:6

Apo di antaro boko urakng inyo bondar-bondar pocayo ko Yesus, koi memang mongajar mongona'i kopintar-corodi'an. Apo kopintar-corodi'an bukainyo doi' kopintar-corodi'an monsio di dunia ni'in, bukainyo doi' kopintar-corodi'an boko pomimpitn di dunia ni'in. Sia' paca'an dibonasoan.

2 Korintus 3:14

Pikiran sia' udah totutup. Sampai ari ni'in pan, sama'an nian jam. Jadi, timpu urakng Israel mombaco Pojanjian Manah di Hukupm Torat nantai, ubo ado koitn ponutup mato-muho inyo mombulah pikiran sia' buntu'. Sia' co mongoroti sobondarnyo tujuan Hukupm Torat nantai, obai urakng bayo mongoroti aman io di dalapm Kristus.

Efesus 1:17

Aku bodoa ko Allah Tuhatn kito Yesus Kristus, Allah Bopai inyo mulia, oca' Sio moonji'i Roh-Nyo ko kaitn inyo mombulah kaitn bohikmat huatan mongonal Sio kotakng dalapm agi'.

Efesus 4:18

Sia' kinyo dapat mongoroti mongona'i Allah obai sia' tinggal di dalapm potakng, jouh doi' kohidupan inyo dionju' Allah. Obai, sia' kinyo mongonal Allah, huatan obai sia' korikng hati.

1 Timotius 1:13

Padohal, komai aku ninam urakng inyo mohayam Sio. Aku mondorako'i somuo urakng inyo pocayo ko Sio. Boko porbuatanku nantai kotakan jahat. Apo Yesus monunju'an kasih-Nyo ko aku. Sio molabuhan nantai obai aku bolupm pocayo ko Sio. Aku bolupm mongotohu'i boko porbuatanku nantai kotakan jahat.

Yakobus 2:1

Boko somadikan, kaitn udah pocayo ko Yesus Kristus, Tuhatn inyo luar biaso. Obai nianam jangan moniant mato-muho.