1 Korintus 2:10 - Porjanjian Boharu Torjomahan Baso Dilakng Soari-ari

¹⁰ Apo Allah udah monyatoan roncana-Nyo nantai ko kito. Allah molabuhan nantai molalu'i Roh-Nyo inyo Sio onju' ko kito. Obai, Roh nantai mongotohu'i huatan ulih monorakan somuo hal, malahan boko hal mongona'i Allah inyo tobumbutn dalapm diri-Nyo.

1 Korintus 2:10 ပူးပေါင်းရင်းမြစ်များ

Yohanes 14:26

Apo nononyo Bopai paca'an moutus Roh-Nyo ko kaitn dalapm damo-Ku. Roh Allah nantai ia'an Ponulukng. Sionam inyo paca'an momadahi somuo la'apo pan ko kaitn. Sio jam paca'an moingant'an kaitn paca'an somuo inyo Aku udah pandiran ko kaitn.

Efesus 3:5

Pado joman komai, Allah kinyo momandiran roncana-Nyo nantai ko monsio. Apo watu ni'in, Sio momakai Roh-Nyo pakai' momadahannyo ko boko rasul ongko boko nabi inyo Sio pilih husus pakai' molayati Sio.

Lukas 10:21

Timpu nantai jam, Roh Allah bulah Yesus rindakng. Kato Yesus, “Bopai, Duatn Ponguaso langit ongko bumi. Ado urakng inyo pintar-corodi' ongko bopondidikan. Apo Aku bosukur obai Duatn kinyo monyatoan kobondaran ni'in ko sia'. Duatn monyatoan kobondaran ni'in ko urakng inyo kinyo pontikng ubo bobia' kocit. Oi, Bopai, caro nantai monyonangan hati Duatn!”

Efesus 3:3

Sio momboritoan ko aku roncana-Nyo inyo komai kinyo dikotohu'i monsio. Di pucu' Aku udah monulis socaro panda' ko kaitn mongona'i hal nantai.

Galatia 1:12

Obai aku co monorima' borito nantai doi' monsio. Co nyiant urakng inyo moajari aku mongona'i borito nantai. Yesus Kristus siku', inyo monyatoan Kabar Boi' nantai ko aku.

Matius 16:17

Kato Yesus ko io, “Simon ana' Yunus, kolai udah diborokati Allah Bopai-Ku inyo di sorugo. Obai kolai mondapat pongorotian mongona'i hal nantai doi' Sio, bukainyo doi' monsio.

Matius 13:11

Timbas Yesus, “Kaitn udah dionji'i pongorotian mongona'i Koraja'an Sorugo inyo bolupm dikotohu'i urakng bukai. Apo urakng banya' ni'in bolupm dionji'i pongorotian nantai.

Yohanes 16:13

Apo nononyo, timpu Roh Allah datakng, Sio paca'an moirikng kaitn oca' mongoroti somuo inyo bondar. Obai, Sio co paca'an mongatoan doi' diri-Nyo siku', apo Sio paca'an momadahan pomandiran inyo Sio dinga' doi' Bopai-Nyo. Sio pan paca'an momadahannyo ko kaitn boko hal inyo paca'an tojadi nononyo.

1 Petrus 1:12

Allah momadahannyo ko sia' obai polayatan sia' nantai bukainyo pakai' sia' siku', apo pakai' kaitn. Ia'an, watu ni'in Kabar Boi' mongona'i kosolamant'an nantai udah diboritoan ko kaitn. Nantai tojadi obai Roh Allah inyo diutus doi' sorugo monyoroto'i boko urakng nantai pakai' momboritoan Kabar Boi' nantai. Boko molekat pan honda' mongotohu'i mongona'i Kabar Kosolamant'an nantai.

1 Yohanes 2:27

Apo kaitn udah monorima' Roh Allah doi' Yesus Kristus. Roh Allah totap ado di kaitn. Obai nantai, kaitn kinyo pontikng diajari urakng bukai. Roh Allahmo moajari kaitn mongona'i boko la'apo pan. Ajaran-Nyo bondar, kinyo tumbukan. Jadi, sosuai agatn lapo inyo Sio ajaran ko kaitn komai, kohonda'nyo kaitn totap hidup bosatu agatn Kristus.

1 Korintus 2:11

Pontiat'ancam. Co nyiant urakng inyo mongoroti boko hal dalapm diri urakng bukai. Bayo roh urakng nantai ulih mongoroti boko hal dalapm diri urakng nantai. Samo jam agatn Allah. Co nyiant urakng mongoroti boko hal dalapm diri Allah. Bayo Roh Allah ulih mongoroti boko hal dalapm diri Allah.

1 Yohanes 2:20

Apo kaitn udah monorima' Roh Allah doi' Sio Inyo Kudus. Nantai obainyo kaitn somuo mongotohu'i inyo bondar.

1 Korintus 14:30

Apo, aman Allah monyatoan sosuatu ko urakng bukai inyo hadir, ongko urakng inyo tongahan bopandir gola' botongga'. Biaram urakng bukai nantai bopandir.

Lukas 2:26

Roh Allah udah momadahan ko Simeon komainyo obai io kinyo tajahan mati sobolupm moniant Rajo Inyo Dijanjian Allah.

Wahyu 1:1

Yesus Kristus monyatoan mongona'i boko kojadian inyo paca'an tojadi. Allah momboritoan ko Yesus pakai' monyatoannyo ko boko urakng inyo molayati Sio. Yesus Kristus moutus molekat-Nyo pakai' monyatoan ko Yohanes, hulutn-Nyo.

1 Timotius 4:1

Ingantcam Roh Allah udah mongatoan agatn togas obai paca'an ado boko urakng inyo paca'an co pocayo agi' ko Yesus. Sia' paca'an pocayo ko boko urakng inyo mongajar boko ajaran inyo salah. Boko ajaran nantai doi' boko roh jahat.

Wahyu 2:24

Apo ko boko urakng bukai di Tiatira, kaitn inyo co tuyut ajaran jahat nantai, kaitn inyo monula' ajaran nantai inyo disobut pongotohuan doi' Rajo Sitatn, ko kaitn Aku bopandir: Aku cuku paca'an monambahi bobatn bukainyo ko kolai.