1 Korintus 16:13 - Porjanjian Boharu Torjomahan Baso Dilakng Soari-ari

¹³ Jagocam diri kaitn! Huatan hala pocayo ko Yesus. Totap ja' borani huatan kuat pocayo ko Tuhatn.

1 Korintus 16:13 ပူးပေါင်းရင်းမြစ်များ

Matius 25:13

Ubo nian jam paca'an tojadi agatn boko urakng inyo kinyo siap watu Aku datakng agi'. Obai nantai, bojago-jagocam, obai kaitn co tohu ari damo japmnyo.”

Matius 26:41

Bojojago cam ongko bodoacam oca' kaitn totap pocayo watu dicubo'i. Memang hati kaitn honda' botahatn mohadapi coba'an, apo tobiat monsio kaitn lomah.”

Lukas 21:36

Jadi, kaitn gola' hala monjago diri. Bodoacam oca' kaitn totap pocayo ko Allah, watu kaitn mohadapi ajab sonsaro inyo co manah agi' tajahan tojadi. Lalu kaitn paca'an tenang watu Ana' Monsio bobali' ko dunia ni'in, moadili somuo urakng am.”

1 Korintus 14:20

Boko somadikan, jadicam sama'an boko bobia' dalapm hal kojahatan obai boko bobia' kinyo tohu porbuatan jahat. Apo jangan monjadi sama'an boko bobia' dalapm kaitn bopikir mongona'i boko komampuan husus doi' Roh Allah. Dalapm hal nantai, kaitn gola' bopikir agatn pintar-corodi' sama'an urakng tuho.

1 Korintus 15:58

Jadi, boko somadikan inyo aku kasihi, totap pocayo ko Yesus agatn yakitn. Jangan goyah. Bokorojocam agatn rajitn pakai' Tuhatn. Obai, kaitn tohu obai somuo inyo kaitn korojoan pakai' Tuhatn ado kountukannyo.

2 Korintus 1:24

Aku co bomasud obai koi honda' momoso lapo inyo gola' kaitn pocayo. Obai, koi tohu kaitn pocayo agatn kuat ko Kristus. Apo, inyo ku masud ia'an koi honda' bokorojo samo oca' bulah kaitn bondar-bondar sonang-nyaman.

Galatia 5:1

Kristus udah mombebasan kito oca' kito bondar-bondar bebas. Obai nantai am, jangan bobali' agi' samo sama'an hulutn inyo gola' momikul bobatn.

Efesus 3:16

Sio ia'an sumber somuo hal huatan kotakng mulia. Aku bodoa oca' Sio monulukng kaitn sosuai agatn sipat-Nyo nantai ia'an oca' Sio mombulah hati ongko jiwa kaitn kuat agatn kuaso doi' Roh-Nyo.

Efesus 6:10

Jadi, kohonda'nyo kaitn monjadi kuat agatn kokuatan inyo kaitn dapatan doi' kuaso Tuhatn, obai kaitn bosatu agatn Sio.

Filipi 1:27

Lapo ja' inyo tojadi ko aku, inyo pontikng ia'an kaitn hidup sosuai agatn Kabar Boi' mongona'i Kristus. Agatn ubo nian, aman aku ulih datakng botomu agatn kaitn damo cuku datakng ongko bayo mondinga' mongona'i kaitn, jadi aku tajahan tohu obai kaitn totap kuat pocayo. Aku tajahan tohu kaitn bosatu hati ongko bojuakng bosamo pakai' kopocaya'an inyo sosuai agatn Kabar Boi' nantai.

Filipi 4:1

Obai nantai, boko somadikan inyo ku kasihi, kaitn gola' totap kuat pocayo agatn Yesus. Aku togonangan kaitn somuo. Kaitn mombulahku sonang-nyamanam. Aku sonang obai kaitn ia'an hasil polayatanku samo sama'an mahkota inyo ku dapat.

Filipi 4:13

aku mampu mohadapi somuo koadaan obai Kristus moonji'i kokuatan ko aku.

Kolose 1:23

Nantai paca'an tojadi aman kaitn totap pocayo ko Yesus agatn kuat. Jangan sampai kaitn tongga' pocayo. Kaitn gola' sotia huatan yakitn moharap'an obai Allah momonuhi somuo inyo Sio janjian dalapm Kabar Boi'. Memang kaitn udah mondinga' Kabar Boi' nantai. Kabar Boi' nantai udah diboritoan ko boko urakng di mono-mono. Aku ni'in, Paulus, udah monjadi polayatn inyo momboritoan Kabar Boi' nantai.

Kolose 4:12

Salapm doi' Epafras, inyo boasal doi' tompat kaitn jam. Io molayati Kristus Yesus. Io hala bodoa agatn somombondarannyo pakai' kaitn oca' kaitn totap kuat pocayo ko Yesus. Io bodoa oca' kaitn monjadi kotakng yakitn mongona'i somuo inyo dikohonda'i Allah.

Kolose 4:2

Bodoacam agatn somombondarannyo. Dalapm doa kaitn, gola' hala bososiap huatan bosukur ko Allah.

1 Tesalonika 3:8

Ni'inan koi hidup agatn sonang-nyaman obai kaitn ija' totap bodiritn kuat dalapm Tuhatn.

1 Tesalonika 5:6

Jadi, kito gola' bojago-jago huatan bososiap timpu Tuhatn datakng. Padohan hidup sama'an sia' inyo kinyo pocayo ko Yesus. Watu malapm, sia' ‘ado inyo tidu'’, ado jam inyo komabu'an sampai co bojago-jago huatan bososiap aman ado pongolit datakng.

2 Tesalonika 2:15

Obai nantai am, boko somadikan, totap pocayo agatn kuat ajaran inyo udah koi sampaian boi' molalu'i pomandiran damo pan molalu'i boko surat.

1 Timotius 6:12

Samo sama'an urakng bouyuh-jorih dalapm potandikan, kolai pan gola' bouyuh-jorih oca' kolai pagutn pocayo lalu mondapat'an hidup inyo somanah-manahnyo di sorugo. Pakai' hal nantaiam kolai udah ditingkau huatan udah mongatoan di hadapan urakng banya' obai kolai pocayo ko Yesus.

2 Timotius 2:1

Timotius, ana'ku, gunoan cam kokuatan doi' Kristus Yesus pakai' kolai lobih kuat pocayo ko Sio.

2 Timotius 4:5

Apo kolai gola' hala bopikir agatn jolas dalapm somuo hal. Botahatncam mohadapi ajab sonsaro. Boritoancam Kabar Boi' ko boko urakng inyo bolupm kalo mondinga'nyo. Labuhancam somuo tugas dalapm polayatan kolai.

2 Timotius 4:7

Aku udah bouyuh-jorih agatn boi', aku udah moahiri potandikan huatan aku totap sotia sampai ahir.

1 Petrus 4:7

Boko somadikan ahir dunia ni'in udah dampikam. Obai nantai, kaitn gola' kondalian diri kaitn, ongko hala siap oca' kaitn ulih bodoa.

1 Petrus 5:8

Apo kaitn gola' hala mongondalian diri kaitn, huatan hala bojojago. Rajo Sitatn nan musuh kaitn. Sitatn honda' mohancuran kopocaya'an kaitn. Sitatn nan samo sama'an singa inyo mondorah, bojalatn kolilikng-kolimbat bogoyap urakng inyo ulih ditolatnnyo.

Wahyu 16:15

Boko roh jahat mongumpulan sia' di sobuah tompat. Dalapm baso Ibrani tompat nantai disobut Harmagedon. Apo Tuhatn bopandir, “Pondinga'ancam! Aku datakng samo sama'an urakng pongolit. Sonang-nyamancam urakng inyo hala siap huatan borotian pakai'annyo, oca' io co bojalatn agatn kolanjakng lalu monjadi malu di muka' umum.”