1 Korintus 15:3 - Porjanjian Boharu Torjomahan Baso Dilakng Soari-ari

³ Aku udah monorima' Kabar Boi' ongko aku monyampaian nantai ko kaitn. Inyo kotakan pontikng doi' Kabar nantai ia'an boko kojadian ni'in: Kristus udah mati obai boko dosa kito. Hal nantai sama'an inyo ditulis dalapm Buku Suci.

1 Korintus 15:3 ပူးပေါင်းရင်းမြစ်များ

Matius 26:24

Udah totulis dalapm Buku Suci mongona'i Ana' Monsio inyo paca'an dijual ko boko urakng inyo molawatn Sio. Sosuai agatn tulisan nantai, hal nantai paca'an tojadi ko Sio. Apo Allah paca'an mohukupm urakng inyo molabuhan nantai. Lobih boi' pakai' urakng nantai aman io kinyo kalo dilahiran samo sokali!”

Matius 26:28

Obai, ninam darah-Ku inyo paca'an ditumpahan pakai' urakng banya' watu Aku mati. Nantai paca'an tojadi oca' boko urakng ulih diamputi doi' boko dosa sia'. Nianam Pojanjian Allah inyo disahan agatn darah-Ku.

Lukas 24:25

Lalu Yesus bopandir ko sia' duo, “Oh, kaitn kotakng manah hoyu' mongoroti. Hati kaitn kotakng manah hoyu' pocayo somuo inyo udah dipandiran boko nabi komai mongonaꞌi Rajo Inyo Dijanjian Allah!

Yohanes 1:29

Kohobu'annyo, Yohanes moniant Yesus datakng ko io. Yohanes bopandir, “Tiat! Numbo, Ana' Domba inyo diutus Allah oca' mohapus dosa dunia.

Kisah Boko Rasul 17:2

Sama'an biaso, Paulus botula' ko rumah sombayakng nantai holu'ai. Di santai, io mongajar doi' Buku Suci. Somanah tigo minggu bojojurut, sotiap Ari Sabat Paulus agatn sia' bopandir mombahas Buku Suci di santai.

Kisah Boko Rasul 3:18

Apo agatn caro nantai, Allah monopat'i pomandiran-Nyo inyo udah disampaian ko boko nabi watu joman komai. Boko nabi nantai udah monulis obai Rajo Inyo Dijanjian Allah nantai gola' ajab sonsaro sampai mati.

Kisah Boko Rasul 8:32

Bagian Buku Suci inyo dibaco pojabat nantai dinga' ni'innan: “Sio dibaba' pakai' dibunuh samo ubo siku' domba dibaba' pakai' disombolih. Apo Sio nantai co mongatoan la'apo pan samo ubo siku' domba kinyo bosaro timpu urakng mongguntikng bulunyo.

Roma 3:25

Sio mombayar agatn darah-Nyo siku' timpu Sio mati di kayu salib. Sio monjadi kurbatn oca' dosa urakng ulih diamputi, ia'an aman sia' pocayo ko Sio. Allah monyorahan Yesus sama'an nantai pakai' monunju'an obai Sio adil huatan mohukupm dosa. Komai, Allah sabar agatn monsio. Sio bolupm mohukupm somuo dosa sia'.

Roma 4:25

Allah monyorahan Yesus oca' Sio mati di kayu salib pakai' monanggukng hukupan dosa kito. Allah mombulah Yesus bobali' hidup oca' kito ulih monjadi bondar di hadapan-Nyo.

1 Korintus 11:2

Aku momuji kaitn obai kaitn hala moingant aku. Aku pan momuji kaitn obai kaitn hala monuruti boko ajaran inyo komai udah ku sampaian ko kaitn.

1 Korintus 11:23

Apo aman kaitn bokumpul, rayaancam Porjamuan Tuhatn agatn caro inyo udah ku sampaian ko kaitn. Tuhatn siku' udah moajaran nantai ko aku. Ia'an: Sobolupm Yesus disorahan ko boko musuh-Nyo, timpu malapm inyo samo nantai Sio bokumpul agatn boko murid-Nyo. Yesus monguti' roti

2 Korintus 5:21

Kristus kinyo bodosa, apo Allah bulah Sio monanggukng hukupan dosa kito. Allah molabuhan nantai oca' di dalapm Kristus, kito ulih monjadi bondar di hadapan Allah.

Galatia 1:12

Obai aku co monorima' borito nantai doi' monsio. Co nyiant urakng inyo moajari aku mongona'i borito nantai. Yesus Kristus siku', inyo monyatoan Kabar Boi' nantai ko aku.

Galatia 1:4

Yesus monyorahan diri-Nyo huatan mati di kayu salib. Agatn porbuatan nantai, Sio monyolamant'an kito doi' hukupan boko dosa kito. Sio molabuhan nantai pakai' monyolamant'an kito doi' kojahatan inyo ado di joman ni'in jam. Somuo nantai tojadi sosuai agatn kohonda' Allah.

Galatia 3:13

Sobondarnyo, kito somuo gola' dihukupm obai kito kinyo hala ulih monaati somuo porintah huatan poraturan Allah inyo ditulis Musa dalapm buku Hukupm Torat. Apo Kristus monyolamant'an kito doi' hukupan nantai. Sio inyo monanggukng hukupan nantai pakai' kito. Watu Sio mati di kayu salib. Obai ado totulis dalapm Buku Suci, “Urakng inyo dipaku di kayu salib ia'an urakng inyo dihukupm Allah.”

Efesus 1:7

Watu Ana'-Nyo mati di kayu salib, Sio mombayar agatn darah-Nyo pakai' mombebasan kito doi' hukupan dosa. Jadi, molalu'i Ana'-Nyo, Allah moamputi dosa kito. Allah molabuhan somuonyo nantai obai kasih karunia-Nyo inyo kotakng bosar.

Efesus 5:2

Kaitn gola' mongasihi urakng bukai samo sama'an Kristus udah mongasihi kaitn ia'an Sio monyorahan diri-Nyo monjadi kurbatn posombahan pakai' monanggukng hukupan dosa kito. Sio monjadi posombahan harupm inyo monyonangan Allah.

Ibrani 5:1

Sotiap imam agukng dipilih doi' monsio. Io diangkat monjadi porontaro pakai' monsio dalapm hubukan sia' agatn Allah. Imam agukng monguti' posombahan boko urakng lalu moonju'nyo ko Allah, tomansu' boko kurbatn bonatakng inyo diposombahan oca' boko dosa sia' diamputi.

Ibrani 5:3

Obai nantai, io gola' momposombahan kurbatn bonatakng, bukainyo ongkah oca' boko dosa urakng bukai diamputi apo oca' boko dosa io siku' pan diamputi jam.

1 Petrus 1:11

Roh Kristus ado di dalapm sia'. Roh Kristus nantai momadahannyo ko sia' mongona'i pondorita'an inyo tajahan Kristus hadapi, apo lopas nian Sio tajahan dimuliaan. Jadi, boko nabi nantai monoliti ubo apo huatan sombilo kosolamant'an nantai paca'an tojadi.

1 Petrus 2:24

Kristus siku' pan udah monanggukng hukupan dosa kito watu Sio mati di kayu salib. Sio molabuhan nantai oca' kito jangan bulah dosa agi', oca' kito dapat hidup agatn caro inyo bondar di hadapan Allah. Obai boko luko Kristus, kaitn monjadi nyamanam.

1 Petrus 3:18

Obai, Kristus udah mati sokali pakai' somuo dosa kito. Sio kinyo bodosa, apo Sio mati pakai' boko urakng inyo bodosa oca' Sio mombimbikng kito ko Allah. Sio inyo udah dibunuh dalapm koadaan-Nyo sobagai monsio, apo Roh Allah mombulah Sio hidup agi'.

1 Yohanes 2:2

Yesus mati oca' boko dosa kito diamputi. Bukainyo bayo pakai' dosa kito ja'am, apo pakai' dosa somuo urakng di dunia ni'in.

Wahyu 1:5

Ongko doi' Yesus Kristus, inyo monyatoan kobondaran Allah agatn sotia. Hoyu' Sio nam urakng inyo hidup agi' doi' komatian. Sionam Rajo inyo bokuaso doi' somuo rajo di dunia. Topuji am Yesus inyo mongasihi kito. Sio mombebasan kito doi' dosa kito, obai Sio mombayar agatn darah-Nyo siku' timpu Sio mati di kayu salib.