1 Korintus 14:15 - Porjanjian Boharu Torjomahan Baso Dilakng Soari-ari

¹⁵ Jadi, gola' kito molabuhan ni'in: Kito gola' bodoa momakai roh kito. Apo kito pan gola' bodoa momakai akal budi kito. Kito gola' bonyanyi pujian momakai roh kito. Apo kito pan gola' bonyanyi pujian momakai akal budi kito.

1 Korintus 14:15 ပူးပေါင်းရင်းမြစ်များ

Kolose 3:16

Kohonda'nyo ajaran Kristus somombondarannyo mansu' ko dalapm hati kaitn huatan monguaso'i caro hidup kaitn siku'-monyiku'. Kaitn gola' samo mongajar, samo moingant'an agatn somuo kopintar-corodi'an. Nyanyiancam mazmur, puji-pujian, nyanyian mongona'i Allah. Bonyanyicam agatn bosukur ko Allah dalapm hati kaitn.

Efesus 6:18

Kaitn gola' hala waspada oca' sotiap watu kaitn ulih bodoa agatn dibimbikng Roh Allah. Pakaicam somuo macapm doa huatan pomuhunan ko Allah. Jangan botongga' bodoa pakai' somuo urakng inyo pocayo.

Yudas 1:20

Apo, kaitn, boko somadikan inyo ku kasihi, bousahacam oca' kaitn botambah kuat pocayo ko ajaran inyo bondar-bondar doi' Allah. Bodoa cam dalapm Roh Allah.

1 Korintus 14:19

Apo watu urakng pocayo bokumpul pakai' sombayakng, tujuanku pakai' mongajar urakng bukai. Jadi, aku lobih momilih pakai' momandiran lima' kato pandir inyo ulih dimongoroti daripado boribu-ribu kato pandir dalapm baso roh inyo kinyo dapat dimongoroti urakng bukai.

1 Korintus 10:19

La'apo masudku inyo sobondarnyo? Aku co bomasud aman boko duato bondar-bondar hidup. Aku pan co bomasud aman dagikng inyo diposombahan ko boko duato nantai kinyo lobih boroti daripado dagikng biaso.

Roma 3:5

Apo sama'an apo aman ado urakng inyo monggunoan pomikiran monsio, ongko bopandir sama'an ni'in, “Timpu kito jahat, hal nantai monunju'an obai Allah bondar. Jadi, aman Allah mohukupm kito, rotinyo Allah kinyo adil, pan?”

Roma 1:9

Allah ia'an sasiku obai aku hala moingant kaitn dalapm doaku. Sionam Allah inyo aku layati agatn soponuh hati pakai' momboritoan Kabar Boi' mongona'i Ana'-Nyo.

Filipi 1:18

Apo co apo-apo! Biar pan urakng ado tujuan lapo ja', doi' hati inyo bondar kata'an salah, inyo pontikng sia' momboritoan mongona'i Kristus. Obai sia' molabuhan nantai, jadi aku sonang-nyamanam. Aku tajahan totap sonang-nyamanam jam,

Roma 8:31

Aman kito bopikir mongona'i somuonyo nantai, la'apo inyo ulih kito pandiran? Aman Allah di pihak kito, conyiant ado la'apo pan inyo ulih mongalahan kito!

Kisah Boko Rasul 21:22

Jadi ni'inan kito gola' momutusan sosuatu pakai' mongomboi'i koadaan ni'in. Pasti sia' paca'an mondinga' obai kolai udah ado di si'itn.

1 Korintus 14:14

Aku momandiran nantai obai aman ado urakng inyo bopandir pakai baso roh, memang rohnyo inyo bodoa. Apo akal budinyo kinyo dipakai.

1 Korintus 14:26

Jadi ubo ni'in boko somadikan: Watu kaitn bokumpul pakai' sombayakng, ado inyo monyanyi lagu pujian, ado inyo moajaran sosuatu, ado inyo monyampaian sosuatu inyo Allah poniant'an ko io, ado inyo bopandir pakai baso roh, ado inyo monjolasan roti doi' pomandiran dalapm boko baso nantai. Somuo nantai gola' dilabuhan pakai' monguat'an urakng bukai.

Yakobus 5:13

Aman ado di antaro kaitn inyo sonsaro, io gola' bodoa minto potulukan Tuhatn. Aman ado di antaro kaitn inyo hidupnyo sonang, io gola' bonyanyi momuji Tuhatn.