1 Korintus 12:9 - Porjanjian Boharu Torjomahan Baso Dilakng Soari-ari

⁹ Ko urakng bukainyo agi', Roh Allah inyo samo nantai moonji'i komampuan pakai' pocayo ko Yesus agatn kotakng kuat. Ko urakng bukainyo agi', Roh Allah inyo samo nantai moonji'i komampuan pakai' monyamani.

1 Korintus 12:9 ပူးပေါင်းရင်းမြစ်များ

Matius 10:8

Nyamanicam urakng sakit. Pulahcam urakng mati bobali' hidup. Nyamanicam urakng inyo boponyakit kulit inyo bogola'i. Tundukngcam boko roh jahat. Kaitn udah monorima' borokat apo co bobayar. Ongko kaitn pan gola' moonji'i ko urakng bukai agatn co dibayar.

Matius 21:21

Timbas Yesus ko sia', “Dinga'anbo! Aman kaitn ulih pocayoam ongko co gangga'-gua'an, bulah mujisat sama'an la'apo inyo Aku labuhan ko kayu ara nantai. Apo bukainyo bayo nian ja'. Soumpamonyo kaitn monyiuh bukit ni'in, ‘Toangkat lalu tobuakng ko dalapm lout!’ Jadi hal nantai paca'an tojadi.

Markus 16:18

Aman sia' moncanggapm ular damo minum racutn, sia' kinyo paca'an dapat bonaso. Aman sia' molota'an jarinyo ko urakng sakit, lalu urakng nantai pan paca'an nyamanam.”

Markus 6:13

Sia' monundukng banya' roh jahat. Sia' pan momurusan banya' urakng sakit agatn minya' ongko monyamani sia'.

Lukas 10:9

Nyamani boko urakng inyo boponyakit di kota nantai. Pandiran ko boko urakng di santai, ‘Ni'innam watunyo Allah monjadi Rajo pakai' kaitn.’

Lukas 9:2

Lalu, Sio moutus sia' pakai' monyamani boko urakng ongko momboritoan kabar mongonaꞌi Koraja'an Allah.

Kisah Boko Rasul 10:38

Yesus mula'i polayatan-Nyo. Yesus boasal doi' kota Nazaret. Sio mula'i polayatan-Nyo di doerah Galilea. Allah moonji'i Roh-Nyo ko Yesus. Allah jam moonji'i kuaso ko Sio. Jadi, Yesus botula' ko mono-mono, molabuhan boko hal inyo boi', Sio monundukng boko roh jahat doi' urakng banya'. Sio ulih molabuhan somuo macapm mujisat obai Allah ado bosamo agatn Sio.

Kisah Boko Rasul 5:15

Boko rasul Yesus banya' bulah mujisat. Obai nantai am, banya' urakng mombaba' boko urakng boponyakit ko boko jalatn ongko sia' nantai diulit'an di tikar damo tompat tidu'. Sia' boharap pas Petrus lalu di siatn, palikng cado kombayakngnyo kona' sia', oca' sia' nyamanam.

1 Korintus 12:28

Allah momilih boko urakng dalapm kolompok urakng pocayo. Inyo potamo, boko rasul, ia'an boko urakng inyo dipilih pakai' momboritoan Kabar Boi'. Inyo koduo, boko nabi, ia'an boko urakng inyo monyampaian posatn doi' Allah. Inyo kotigo, boko urakng inyo dionji'i komampuan pakai' mongajar. Ongko, ado boko urakng inyo dionji'i komampuan pakai' bulah mujisat. Ado jam boko urakng inyo dionji'i komampuan pakai' monyamani, boko urakng inyo dionji'i komampuan pakai' monulukng urakng bukai, boko urakng inyo dionji'i komampuan pakai' momimpitn, ongko boko urakng inyo dionji'i komampuan pakai' bopandir dalapm boko baso roh.

1 Korintus 12:30

Kinyo somuo urakng inyo dionji'i komampuan pakai' monyamani. Kinyo somuo urakng inyo dionji'i komampuan pakai' bopandir dalapm boko baso roh. Kinyo somuo urakng inyo dionji'i komampuan pakai' monjolasan roti doi' pomandiran dalapm boko baso nantai.

1 Korintus 13:2

Soandainyo aku dionji'i komampuan husus pakai' monyampaian posatn-pontal doi' Allah, soandainyo aku mongoroti somuo hajat Allah inyo bolupm dipadahan ko urakng bukai, soandainyo aku mongotohu'i somuo hal, soandainyo aku pocayo agatn kotakng kuat singgatn aku ulih momindahan bukit ko tompat bukai, apo aman aku kinyo mongasihi urakng bukai, aku kinyo boguno.

2 Korintus 4:13

Samo sama'an inyo ado totulis, “Aku pocayo, jadi aku bopandir!” Na, koi pocayo jadi koi mongisahan mongona'i Yesus.

Efesus 2:8

Obai kaitn disolamant'an obai Allah monunju'an kasih karunia-Nyo ko kaitn huatan obai kaitn pocayo ko Kristus Yesus. Nantai bukainyo boko hal inyo kaitn usahaan, apo boko hal inyo Allah onju' ko kaitn.

Ibrani 11:33

Obai sia' pocayo, jadi sia' mongalahan boko koraja'an, sia' bulah inyo bondar, sia' mondapat borokat inyo dijanjian Allah. Ado doi' sia' inyo mongatupan nyao boko singa.