1 Korintus 12:3 - Porjanjian Boharu Torjomahan Baso Dilakng Soari-ari

³ Obai nantai, aku gola' mongajar kaitn mongona'i ubo apo caro Roh Allah bokorojo dalapm hidup urakng inyo pocayo. Aman ado urakng inyo bondar-bondar dikuaso'i Roh Allah, pasti urakng nantai kinyo paca'an bopandir, “Yesus cucu'mo dihukupm!” Sobali'nyo, aman ado urakng inyo bopandir, “Yesus nantai Tuhatn inyo bokuaso!” pasti urakng nantai bondar-bondar dikuaso'i Roh Allah.

1 Korintus 12:3 ပူးပေါင်းရင်းမြစ်များ

Matius 22:43

“Aman ubo nian,” kato Yesus, “Hibo Roh Allah bulah Daud moningkau ‘Kristus’ sobagai ‘Tuhatn’? Ni'innam pomandiran Daud:

Markus 9:39

Apo Yesus bopandir, “Jangan kaitn morarakng urakng sama'an io. Obai, doi' somuo urakng inyo mombulah mujisat momakai damo-Ku, conyiant siku' pan inyo ulih lansukng bobali' mohanyam Aku.

Yohanes 13:13

Kaitn moningkau Aku, ‘Guru’ huatan ‘Tuhatn’. Nantai bondar, obai Aku memang Guru huatan Tuhatn.

Yohanes 13:14

Biar pan Aku ni'in Guru huatan Tuhatn kaitn, Aku udah molayati kaitn agatn mombasu'i kaki kaitn. Jadi, kaitn pan gola' mombasu'i kaki siku'-monyiku'.

Yohanes 15:26

Aku paca'an moutus Ponulukng ko kaitn, ia'an Roh inyo boasal doi' Allah. Roh Allah nantai inyo monunju'an somuo inyo bondar. Sio paca'an bosasi mongona'i Aku.

Kisah Boko Rasul 8:37

Filipus bopandir, “Aman Habakng somombondarnyo pocayo ko Yesus, Habakng ulih dibaptis.” Kato pojabat nantai, “Aku pocayo Yesus nantai Rajo Inyo Dijanjian Allah. Yesus nantai Ana' Allah.”]

Roma 10:9

Obai, aman kolai mongaku' agatn mulut obai “Yesus nam Tuhatn” inyo bokuaso ongko pocayo dalapm hati kolai obai Allah mombulah Sio hidup agi' doi' komatian, jadi kolai tajahan disolamant'an.

Roma 9:3

obai banya' urakng Yahudi co honda' pocayo ko Kristus. Malahan aku rela tokutu', topisah doi' Kristus soandainyo hal nantai mombulah sia' monjadi solamant. Obai sia' nam boko somadikanku siku', sosamo banso Israel.

1 Korintus 16:22

Biaram somuo urakng inyo kinyo mongasihi Tuhatn Yesus monorima' hukupan! Datakngcam, Tuhatn!

1 Korintus 8:6

Apo pakai' kito, bayo ado siku' mo Allah, ia'an Allah Bopai kito. Sio inyo monjadian somuo hal. Kito hidup pakai' monyombah Sio. Pakai' kito, bayo ado siku' Tuhatn, ia'an Yesus Kristus. Somuo hal dipulah molalu'i Yesus Kristus. Kito bodapat hidup inyo sobondarannyo obai Yesus Kristus.

2 Korintus 11:4

Obai, kaitn siap monorima' urakng inyo datakng mombaba' ajaran inyo salah mongona'i Yesus. Nantai bukainyo doi' ajaran inyo bondar mongona'i Yesus inyo udah koi boritoan ko kaitn komai. Kaitn pan honda' monorima' roh inyo bukainyo doi' Roh Allah inyo udah kaitn torima' komai. Kaitn honda' pocayo ajaran inyo bukai doi' Kabar Boi' inyo udah kaitn pocayo komai.

2 Korintus 3:5

Aku co bomasud obai koi ado komampuan siku' inyo bulah koi sanggup molabuhan polayatan ni'in. Apo, koi sanggup obai kuaso Allah.

Galatia 3:13

Sobondarnyo, kito somuo gola' dihukupm obai kito kinyo hala ulih monaati somuo porintah huatan poraturan Allah inyo ditulis Musa dalapm buku Hukupm Torat. Apo Kristus monyolamant'an kito doi' hukupan nantai. Sio inyo monanggukng hukupan nantai pakai' kito. Watu Sio mati di kayu salib. Obai ado totulis dalapm Buku Suci, “Urakng inyo dipaku di kayu salib ia'an urakng inyo dihukupm Allah.”

Wahyu 1:10

Watu ari Tuhatn, aku dikuaso'i ulih Roh Allah. Timpu nantai, aku mondinga' saro inyo kotakan borakng samo sama'an bunyi trompet.