1 Korintus 1:6 - Porjanjian Boharu Torjomahan Baso Dilakng Soari-ari

⁶ Somuo nantai tojadi obai pomandiran inyo diboritoan ko kaitn mongona'i Kristus bondar-bondar mansu' ko dalapm hati kaitn.

1 Korintus 1:6 ပူးပေါင်းရင်းမြစ်များ

Markus 16:20

Boko murid-Nyo botula' momboritoan Kabar Boi' ko soluruh dunia. Tuhatn Yesus bokorojo dalapm diri sia' oca' sia' ulih mombulah mujisat. Agatn sama'an nantai, Sio mombutian obai inyo diboritoan sia' bondar.

Kisah Boko Rasul 11:17

Watu kito udah pocayo ko Tuhatn Yesus Kristus, ongko Allah moonji'i Roh-Nyo ko kito. Ubo nian jam watu urakng inyo bukainyo Yahudi nantai pocayo, Allah jam moonji'i Roh-Nyo ko sia'. Aman Allah monorima' urakng bukai Yahudi sama'an nantai, co mungkitn aku ulih monula' sia'. Co mungkitn aku molawatn Allah!”

Kisah Boko Rasul 11:21

Tuhatn Allah kotakan monulukng sia' pakai' momboritoan Kabar Boi'. Obai nantai, banya' bondar urakng monjadi pocayo. Banya' urakng bukainyo Yahudi mula'i jumpat Tuhatn Yesus.

Kisah Boko Rasul 18:5

Lopas nian, Silas ongko Timotius datakng doi' propinsi Makedonia. Jadi, Paulus ulih momakai somuo watunyo pakai' momboritoan ko somuo urakng inyo boagama Yahudi. Paulus momboritoan agatn jolas obai Yesus nantai Rajo Inyo Dijanjian Allah.

Kisah Boko Rasul 20:21

Aku hala mongajar agatn torus torakng, boi' ko boko urakng Yahudi huatan ko boko urakng Yunani oca' sia' botongga' bulah dosa huatan hidup monyonangan hati Allah. Sia' gola' pocayo ko Yesus, Tuhatn inyo bokuaso pucu' kito.

Kisah Boko Rasul 20:24

Apo aku co poduli. Biar pan aku dibunuh, aku totap co poduli. Tuhatn Yesus udah moonji'i tugas ko aku pakai' momboritoan Kabar Boi' obai Allah udah monyatoan koboi'an-Nyo ko monsio. Aku gola' monyolosaian tugasku nantai. Nianam inyo pontikng, bukainyo hidup aku.

Kisah Boko Rasul 22:18

Dalapm poniant'an nantai Tuhatn bopandir ko aku, ‘Boko urakng Yahudi di si'itn kinyo paca'an pocayo pomandiran kolai mongona'i Aku. Jadi, kolai gola' hagar botula' doi' Yerusalem ni'in.’

Kisah Boko Rasul 23:11

Pas malapm nantai Tuhatn Yesus bodiritn di sopia' Paulus ongko bopandir ko io, “Jangan gola'. Kolai udah borani momboritoan mongona'i Aku di Yerusalem. Nononyo kolai gola' borani jam momboritoan mongona'i Aku di Roma.”

Kisah Boko Rasul 28:23

Ongko, sia' monontuan watu pakai' botomu agi' agatn Paulus. Pas ari nantai lobih banya' urakng datakng bokumpul di rumah tompat io monoluntukng. Doi' sunsukng tuntukng ko malapm Paulus monjolasan ko sia' mongona'i Koraja'an Allah. Io moingant'an sia' mongona'i boko hal inyo ditulis Musa huatan boko nabi watu joman komai. Agatn caro nantai, io bousaha moyakit'an sia' pakai' pocayo ko Yesus.

Roma 15:19

Sio pan momakai bomacapm mujisat ongko kuaso Roh Allah. Ubo nianam caronyo aku momboritoan soluruh Kabar Boi' mongona'i Kristus doi' kota Yerusalem sampai ko doerah Ilirikum.

2 Korintus 12:12

Timpu aku bosamo agatn kaitn, aku mombutiannyo ko kaitn obai aku ninam rasul inyo bondar. Agatn sabar aku molabuhan somuo macapm mujisat, boko porbuatan luar biaso inyo monunju'an kuaso Tuhatn.

Galatia 3:5

Allah moonju' Roh-Nyo ko kaitn. Sio molabuhan banya' mujisat di antaro kaitn. Allah molabuhan nantai obai kaitn monaati somuo porintah huatan poraturan Allah inyo ditulis Musa dalapm buku Hukupm Torat? Samo sokali cado! Allah molabuhan nantai obai kaitn pocayo Kabar Boi' mongona'i Yesus inyo ku boritoan ko kaitn.

2 Tesalonika 1:10

Hukupan nantai paca'an tojadi timpu Yesus datakng agi'. Watu Sio datakng agi' somuo urakng inyo pocayo ko Sio momuji huatan hiratn agatn Sio. Sio paca'an dipuji obai Sio bulah sia' monjadi borosih doi' dosa. Kaitn tomansu' kolompok urakng nantai obai kaitn udah pocayo somuo inyo koi sampaian ko kaitn.

1 Timotius 2:6

Yesus monyorahan diri sampai mati pakai' monanggukng hukupan dosa somuo urakng. Hal ni'in dibutian pas watu inyo ditontuan Allah.

2 Timotius 1:8

Jadi, jangan malu momboritoan mongona'i Tuhatn kito. Jangan malu mongona'i aku inyo dimansu'an ko dalapm ponjara obai molayati Sio. Apo, agatn kokuatan doi' Allah, tuyutcam ajab sonsaro obai pomboritoan Kabar Boi' nantai.

Wahyu 1:2

Dalapm buku ni'in Yohanes monulis mongona'i Pomandiran Allah huatan mongona'i boko hal inyo Yesus Kristus nyatoan ko io, ia'an boko la'apo inyo Yohanes tiat dalapm poniant'an nantai.

Wahyu 1:9

Aku, Yohanes, somadikan kaitn inyo sonasib agatn kaitn, inyo bosamo ajab sonsaro agatn warga Koraja'an Allah, huatan bosamo botahatn mohadapi ajab sonsaro kapikng monantian Yesus. Aku udah momboritoan Pomandiran doi' Allah ongko boko hal inyo Yesus padahan ko aku. Obai nantaiam, aku dibuakan ko sobuah pulau inyo bodamoan Patmos.

Wahyu 12:11

Boko somadikan kito udah mongalahannyo agatn darah Ana' Domba nantai, huatan agatn borito inyo bondar doi' Allah inyo sia' boritoan. Sia' sanggup mongurbatan diri sia' sampai mati.

Wahyu 12:17

Ongko, nago nantai monjadi kotakng godi ko botina' nantai. Io botula' boparakng molawatn koturutannyo inyo bukai, ia'an sia' inyo monaati boko porintah Allah huatan pocayo agatn kuat ko somuo inyo Yesus pandiran.

Wahyu 19:10

Aku lansukng tokorobah tokosungkapm di pohadapan kaki io pakai' monyombah io. Apo io bopandir ko aku, “Jangan monyombah aku! Aku bayo hulutn inyo molayati Allah, samo sama'an kolai huatan boko somadikan kolai, ia'an boko urakng inyo pocayo ko somuo inyo Yesus ajaran. Sombah Allah aja'am. Obai somuo inyo Yesus ajaran nianam pomandiran doi' Roh Allah.”

Wahyu 6:9

Lopas nian, Ana' Domba nantai mombuka' segel kolima'. Watu nantai, aku moniant banya' jiwa di babah mesbahAllah. Boko jiwa nantai ia'an boko urakng inyo udah dibunuh obai sia' momboritoan Pomandiran doi' Allah huatan obai sia' bosasi mongona'i Yesus.