1 Korintus 1:18 - Porjanjian Boharu Torjomahan Baso Dilakng Soari-ari

¹⁸ Ado boko urakng inyo paca'an bonaso. Sia' bopikir obai borito mongona'i Kristus mati di kayu salib nantai sosuatu inyo co nyiant rotinyo. Apo pakai' kito inyo disolamant'an, kabar mongona'i Kristus mati di kayu salib monunju'an kuaso Allah.

1 Korintus 1:18 ပူးပေါင်းရင်းမြစ်များ

Kisah Boko Rasul 13:41

‘Pontiatan boboi', kaitn inyo mohayam pomandiran-Ku! Kaitn paca'an mooso hiratn obai joman ni'in Aku paca'an molabuhan sosuatu inyo bulah kaitn kotakan ajab sonsaro. Biar pan ado urakng inyo momadahan ko kaitn mongona'i hukupan nantai, kaitn ija' bopikir hukupan nantai kinyo paca'an tojadi. Apo hukupan nantai paca'an tojadi. Kaitn paca'an bonaso.’ Jadi, boko somadikan, poniant'an boboi' oca' hukupan nantai kinyo tojadi ko kaitn jam.”

Kisah Boko Rasul 17:18

Ongko boboropo urakng Yunani inyo pintar-corodi' nantai mula'i botikakng agatn io. Ado inyo doi' kolompok Epikuros. Ado jam doi' kolompok Stoa. Sobagi'an sia' bopandir mongona'i Paulus. Kato sia', “Pomandiran urakng budu nantai kinyo mansu' akal.” Apo inyo bukai bopandir, “Ruponyo io bopandir mongona'i boko duato inyo bolupm kito konal.” Sia' momandiran nantai obai Paulus momboritoan Kabar Boi' mongona'i Yesus huatan sama'an apo boko urakng ulih bobali' hidup doi' komatian.

Kisah Boko Rasul 17:32

Timpu boko urakng nantai mondinga' Paulus bopandir obai ado Urakng inyo kalo bobali' hidup doi' komatian, ado di antaro sia' inyo boulu'an Paulus. Apo inyo bukai bopandir, “Hobu'-luso cam, koi mondinga'an kolai bopandir agi' mongona'i hal ni'in.”

Kisah Boko Rasul 2:47

kapikng momuji Allah. Somuo urakng sonang agatn sia'. Kolompok urakng inyo pocayo nantai botambah banya' obai sotiap ari ado boko urakng inyo disolamant'an Tuhatn.

Roma 1:16

Aku co malu momboritoan Kabar Boi' nantai obai Kabar Boi' ia'an kuaso Allah pakai' monyolamant'an somuo urakng inyo pocayo, potamo-tamo urakng Yahudi, apo jam urakng bukainyo Yahudi.

1 Korintus 1:21

Allah bulah koputusan ni'in sosuai agatn kopintar-corodi'an-Nyo. Ia'an, Sio mombulah oca' monsio kinyo ulih mongonal Sio molalu'i kopintar-corodi'an monsio. Jadi, agatn sonang hati Allah monyolamant'an urakng inyo pocayo agatn momakai caro inyo dianggap budu, ia'an pomboritoan kabar boi'.

1 Korintus 15:2

Aman kaitn totap somombondarannyo pocayo Kabar Boi' inyo udah aku boritoan ko kaitn, ongko kaitn paca'an disolamant'an. Apo aman kaitn co pocayo somuo Kabar Boi' nantai tomansu' mongona'i komatian Yesus huatan Yesus bobali' hidup doi' komatian, boroti co nyiant pasalnyo kaitn pocayo tontainyo.

1 Korintus 2:14

Apo boko urakng inyo bayo bopikir socaro dunia, sia' co honda' pocayo boko hal doi' Roh Allah. Sia' moanggap boko hal nantai kinyo boroti. Sia' co ulih mongoroti boko hal nantai obai boko hal nantai bayo ulih diporiso'i socaro rohani.

1 Korintus 2:2

Obai, aku jadi bulah koputusan bayo pakai' momboritoan mongona'i Yesus. Ia'an pan aku momboritoan obai Yesus ia'an Rajo Inyo Dijanjian Allah inyo disobut Kristus, huatan Sio mati di kayu salib. Aku co honda' momboritoan ko kaitn mongona'i boko hal inyo bukai.

1 Korintus 3:19

Obai Allah moanggap kopintar-corodi'an monsio kinyo ado rotinyo. Hal nantai udah totulis di dalapm Buku Suci: “Ado boko urakng inyo moanggap diri sia' pintar-corodi'. Apo Allah momakai pomikiran sia' siku' pakai' mongalahan sia'.”

1 Korintus 4:10

Sama'annyo koi budu obai koi molayati Kristus. Apo kaitn bokopintar-corodi'an obai kaitn pocayo ko Kristus. Koi lomah. Apo, kaitn kuat. Koi kinyo cucu' dihormati. Apo kaitn tohormat.

2 Korintus 10:4

Boko sonjato inyo koi pakai dalapm pojuakan koi bukainyo sonjato dunia ni'in. Sonjato koi ado kuaso doi' Allah inyo ulih mohancuran boko bentekng musuh koi.

2 Korintus 4:3

Mungkitn ado boko urakng inyo kinyo mongoroti Kabar Boi' inyo koi boritoan. Apo nantai ongkah boko urakng inyo paca'an bonaso,

1 Tesalonika 1:5

Obai watu koi momboritoan Kabar Boi' ko kaitn, koi kinyo bayo momakai boko pomandiran koi modas. Apo kuaso Roh Allah monulukng koi monyampaiannyo huatan koi kotakng yakitn aman Kabar Boi' nantai bondar. Kaitn mongotohu'i somuo nantai obai kaitn udah moniant caro hidup koi. Watu koi ado di antaro kaitn, koi molayati kaitn.

2 Tesalonika 2:10

Io momakai somuo macapm caro inyo jahat pakai' monyosat'an boko urakng huatan paca'an bohasil mongontumbuki sia' inyo paca'an bonaso. Sia' kinyo paca'an disolamant'an obai sia' co honda' pocayo Kabar Boi' inyo bondar mongona'i Yesus.

Ibrani 12:2

agatn mato totuju ko Yesus. Obai Sio ia'an sumber kopocaya'an kito. Doi' awal Sio momimpitn kito sampai ahirnyo kopocaya'an kito monjadi sompurna. Sio botahatn mondorita' di kayu salib ongko Sio kinyo tonturian caro komatian nantai momaluan obai Sio ongkah bopikir mongona'i sonang-nyaman inyo tajahan di torima' Sio nononyo. Watu ni'in Sio dudu' di tompat inyo tohormat di sopia' kanan tahta Allah.

Ibrani 4:12

Obai, Pomandiran Allah ia'an pomandiran inyo hidup huatan bokuaso, lobih tajapm doi' podakng bomato duo. Samo sama'an podakng inyo ulih monuhu' monyongkayoan boko posigalan huatan sunsutn, sama'an nian jam pomandiran Allah ulih monuhu' kotakng dalapm huatan monyongkayoan jiwa ongko roh. Pomandiran Allah ulih momoriso pikiran ongko hajat hati kito.