WUFUNUO 13:12 - Biblia Ilagho Jiboie Kwa Wandu Wose

¹² Nayo ikatumia nguma rose ra iyo nyamandu ya imbiri mesonyi kwake; na kuwibonya wandu wose wikaiagha ndoenyi wiitase iyo nyamandu ya imbiri erekoghe seji eebarwa lughuma na chonda chake chikaona.

WUFUNUO 13:12 ပူးပေါင်းရင်းမြစ်များ

2 WATHESALONIKE 2:4

uo utangalagha na kukujosa moni aighu ya kula kindo chiwangwagha mlungu, angu kilambo chetaswa, hata uvikie kusea kidombo andenyi ya Hekalu ya Mlungu, ukikughora uo moni kukaia Mlungu.

WUFUNUO 13:2

Iyo nyamandu nereiwonieghe, erekoghe sa inge, maghu ghake gherekoghe sa gha kibarabara, na momu ghwake ghorekoghe sa ghwa shimba; iyo choka ikaineka iyo nyamandu ndighi rake, kifumbi chake cha nguma, na nguma mbaa.

WUFUNUO 13:8

Na wandu wose wikaiagha ndoenyi wichaitasa; awo, imbiri wurumwengu ghuseumbilo, marina ghawo ghisereandikiloghe andenyi ya chuo cha irangi cha Mwana wa Ng'ondi uo orebwaghiloghe.

WUFUNUO 14:11

Na mosi ghwa ugho modo ghuwitiriragha, ghwajoka kwa kala na kala. Wandu awo witasagha iyo nyamandu, na iyo fwana yaro, na uo ose uko na alama ya irina jake, ndewina kuhora na dime hata na kio anduangi.”

WUFUNUO 14:9

Na malaika umu wa kadadu ukawinugha ukighamba kwa lwaka lubaa, “Ngera mndungi waitasa iyo nyamandu, na iyo fwana yake, na kupata alama chamunyi kwake, angu mkonunyi kwake,

WUFUNUO 16:2

Nao malaika wa imbiri ukaghenda, ukawada bakuli yake na kudia ndoenyi, na waja wandu werekoghe na alama ya ija nyamandu awo werekoghe wikiitasa fwana yake, wikabukwa ni vonda vizamie na ndighi.

WUFUNUO 17:8

Iyo nyamandu kuiwonie erekoghe, ela ndeiduagha; yalighisa kujoka kufuma kinenyi cha abuso, na kughenda kutotenyi. Na awo wandu wiko ndoenyi awa marina ghawo ghiseandikilo andenyi ya chuo cha irangi, kufuma kuzoya kwa wurumwengu, wikashinika kwa kuiwona iyo nyamandu; angu erekoghe, ikasoweka; nayo ikawuya ikawoneka moyo sena.

WUFUNUO 19:20

Iyo nyamandu ikawadwa chiaimweri na uja mlodi wa tee, uo orebonyereghe weke mwakilimbiti imbiri ya iyo nyamandu; kwa awo, orewikalieghe awo wandu werepatireghe ija alama ya iyo nyamandu, na awo wereghutasireghe ugho mlimu ghwake. Awa wawi, werekumbiloghe wimoo andenyi ya ndiwa ya modo ghuakagha kwa kibiriti.

WUFUNUO 20:4

Niko ngawona vifumbi va nguma, na awo wereviserieghe, ni awo werenekeloghe nguma retanya. Na wokoni nerewonieghe roho ra wandu weredumbuloghe vongo kwa wundu ghwa kumshuhudia Jesu, na kwa wundu ghwa ilagho ja Mlungu, awo wisereitasireghe iyo nyamandu hata mlimu ghwake; hata ndewerebonyeroghe alama ingi yake chamunyi kwawo, angu mikonunyi kwawo anduangi. Wikakaia moyo, na kubonya nguma andwamweri na Kristo miaka elfu.