WALAWI 12:8 - Biblia Ilagho Jiboie Kwa Wandu Wose

⁸ Iji usedimagha kupata mwana wa ng'ondi, uchareda vana viwi va mbughi angu va maringo; imu kwa wundu ghwa kizongona chekora, na imu ichakaia kizongona kwa wundu ghwa kaung'a; na mkohani uchabonya mapatano kwa wundu ghwa uo muka, nao uchaeleshwa.”

WALAWI 12:8 ပူးပေါင်းရင်းမြစ်များ

WALAWI 1:14

“Ikakaia ifunyo jake kwa BWANA ni kizongona chekora cha nyonyi, uchareda chana cha mbughi angu iringo.

WALAWI 12:7

Na mkohani uchaifunya imbiri ya BWANA, upate kubonya mapatano kwa uo muka, nao uchaeleshwa kufuma kwa uko kufumwa ni bagha kwake. Ihi niyo Sharia kwa muka uo ose uchaakufungua mwana wa womi angu wa waka.

WALAWI 13:1

BWANA ukawizera Musa na Haruni,

WALAWI 14:21

“Ela ikakaia uo mundu ooka mkiwa usedimagha kupata ivo vilambo, uchareda mwana wa ng'ondi wa womi kwa wundu ghwa kizongona cha makosa chesughuswa, mkohani upate kubonya wupatanisho kwa wundu ghwake. Sena uchareda kilo imweri ya mufu ghudendere na mavuda kwa wundu ghwa kizongona cha viro, na ifungu ja kadadu ja lita ya mavuda,

WALAWI 14:22

angu maringo seji uchaadima, ghikaie kizongona na kwa wundu ghwa kaung'a na kizongona chekora.

WALAWI 15:14

Ituku ja wunyanya, uchareda tagho iwi ra mbughi angu maringo mnyangonyi ghwa Hema ekwania, na kurineka mkohani.

WALAWI 15:15

Mkohani uchafunya imu ikaie kizongona kwa wundu ghwa kaung'a na imu kwa wundu ghwa kizongona chekora, nao uchabonya mapatano kwa wundu ghwa uo mundu imbiri ya BWANA kwa wundu ghwa uko kufumwa ni wufia kwake.

WALAWI 15:29

Ituku ja wunyanya, uchawada tagho iwi ra mbughi angu maringo, na kurireda kwa mkohani aho mnyangonyi ghwa Hema ekwania;

WALAWI 4:26

Na mavuda ghake ghose uchaghikora aighu ya madhabahu, sa iji koni orebonyereghe kwa vizongona va mapatano. Uchabonya wupatanisho kwa wundu ghwake, nao uchafuilwa wughoma.

WALAWI 5:11

“Na ikakaia ndedimagha kupata mbughi iwi angu maringo awi, niko uchafunya kilo imweri ya mufu ghudendere kwa wundu ghwa iyo kaung'a uibonyere, usedunge mavuda ghangi angu vilungo; kwa kukaia ni ifunyo kwa wundu ghwa kaung'a.

WALAWI 5:7

“Ela ikakaia ndedimagha kupata mwana wa ng'ondi uchareda kwa BWANA vana viwi va mbughi angu maringo awi kukaia kizongona kwa wundu ghwa kaung'a yake; imu ikaie kizongona kwa wundu ghwa kaung'a, na imu kwa wundu ghwa kizongona chekora.

MATHAYO 21:12

Nao Jesu ukangia Hekalunyi, ukawiwinga cha shighadi wandu werekoghe wikiuza na kughua vilambo andenyi ya Hekalu; ukaribingilisha meza ra awo werekoghe wikivunja pesa, na vifumbi va awo werekoghe wikiuza maringo.

2 WAKORINTHO 8:9

Inyo mwaichi mvono ghwa Bwana odu Jesu Kristo, seji hata ngera orekoghe na mali, ela orewurieghe mkiwa kwa wundu ghonyu, eri kwa ugho wukiwa ghwake, mpate kukaia na mali.