JEREMIA 9:10 - Biblia Ilagho Jiboie Kwa Wandu Wose

¹⁰ Ngaghamba, “Nichaililia mighondi kwa kudikwa ni mbori, na kwa wundu ghwa malisho gha kireti nichalila; kwa kukaia ghamerie kunoneka mndungi usedimagha kuida aho; hata ng'ombe nderiwuesikirika rikidoka, nyonyi ra mbeonyi na nyamandu wori rose rameria kughenda.”

JEREMIA 9:10 ပူးပေါင်းရင်းမြစ်များ

ISAYA 41:15

Ola nicham'bonya mkaie sa chombo kiwishi chekuwida, chiko na maghegho ghikalie; mchaikaba mighondi na kuifasha-fasha, na mighondi mitini mchaisaghisa sa makanda.

ISAYA 49:19

“Kwa loli isanga jako jerenoneloghe, na kuwuya iduu, ela idana ndejichaawikata awo wichagha; na awo werekusaghisireghe, wichakaia kula.

JEREMIA 12:10

Wabonyi nguma wengi wa kighenyi wamerie mbuwa yapo ya mizabibu, wikaiwadia na maghu ghawo, na kujibonya isanga japo jiboie jiwuye kireti kiduu.

JEREMIA 12:11

Wamerie kujibonya isanga jikaie iduu, jawurie iduu hata jianililia isanga jose jeewuya kireti, ela ndekuwadie mndungi wawuyajiririkanya ngolonyi kwake anduangi.

JEREMIA 12:4

Isanga na nyasi ra mbuwenyi rikaia riomie hata lii? Nyamandu ra isakenyi na nyonyi ramerie kutota, kwa wundu ghwa wuwiwi ghwa awo wandu wiko andenyi yaro; wandu waghambie, “Mlungu ndedimagha kuwona agho dawuyabonya.”

JEREMIA 14:6

Furo rakaia kimusi mighondinyi isewadie nyasi, riasoda-soda kwa kusowa mbeo sa mizozo, meso ghawo ghasera kira kwa kukaia mlamba ghwa nyasi ndeghuko.

JEREMIA 2:15

Wiamdokia sa shimba, wadoka nandighi; Wajibonyere isanga jake jikawuya kireti, na mizi yake yasighilo putu ikawuya maghacho.

JEREMIA 2:6

Ndewicheeghora, ‘Uja BWANA udijosere kufuma isanga ja Misri lee oko hao, uo oredighenjereghe kireti isanga ja teri na makorongo; andenyi ya isanga jiomie ja kira kibaa, isanga jiseidwagha hata kukailwa ni mndungi?’

JEREMIA 23:10

Isanga jeechulwa ni wandu wisowie wuloli na BWANA; kwa wundu ghwa iyo njowe, isanga jaawuyalila, na malisho gha kireti gheeoma. Mighendo yawo ni ya wuwiwi, na wudimi ghwawo si ghwa hachi anduangi.

JEREMIA 50:3

“Angu mbari imu ya wandu kufuma kaskazinyi yacha aighu ya Babuloni, nayo ichabonya isanga jake jisigho iduu. Wandu na nyamandu richafuma aho, na mndungi ndechaakaia aho anduangi.”

JEREMIA 7:29

“Lilenyi, muare maridia ghenyu, mghikumbe noko ee wandu wa Jerusalemu; kemenyi ngemi aighu mighondinyi, kwa kukaia ini BWANA nawileghie na kuwisigha wandu wiwusiragha machu ghapo.

JEREMIA 8:18

Wasi ghwapo ndeghudimagha kuhoreshwa, ngolo yapo yakaia mkongo andenyi kwapo.

KILILO CHA JEREMIA 1:16

“Kwa wundu ugho naawuyalila; ndekuwadie mndungi onihoresha hata onikumba ngolo. M'maiza wanisima; wandu wapo ndewiwadie kindo chingi chasigharika.

KILILO CHA JEREMIA 2:11

Meso ghapo ghasera kira kwa kulila; roho yapo eko na kuwawa kubaa. Wasi ghwanisirisha ndighi kwa wundu ghwa kutoteshwa kwa wandu wapo. Wanake na awo wiongagha wiadumbuka achienyi ra muzi.

KILILO CHA JEREMIA 5:18

kwa wundu ghwa Mghondi ghwa Sioni kusighwa mduu, na mizozo kusela-sela aighu ya kunoneka kwaro.

EZEKIELI 14:15

Ngalekeria nyamandu ra isakenyi rimare isangenyi, na kujinona hata jikaie iduu na mndungi usedime kuidiria aho kwa wundu ghwa wungi ghwa nyamandu,

EZEKIELI 27:2

“Idana oho mwana wa mdamu, woka kulilia Tiro,

EZEKIELI 29:11

Mdamu ungi ndechaawadia aho, hata nyamandu ndeichaawadia aho; jichakaia iduu kwa miaka mirongo ina.

EZEKIELI 33:28

Nichajibonya ijo isanga jisigho iduu putu, na iro ndighi wandu werekukasagha naro richasia; na mighondi ya Israeli ichasighwa miduu putu hata usoweke mundu oida aho.

EZEKIELI 6:6

Andu uko kose muko, mizi yenyu ichasighwa miduu, na andu konyu kotasira mighondinyi kuchanonwa, eri madhabahu renyu ripate kunonwa na kusaghiswa; na milimu yenyu kuchikanywa na kunonwa; madhabahu renyu refukiria marumba richachikanywa, na vilambo muvibonyere viinjo putu.

HOSEA 4:3

Kwa wundu ugho isanga jaoma, na wandu wose wiko andenyi yaro wichatota; nyamandu na nyonyi na samaki richafwa.”

JOELI 1:13

Ronyi nguwo ra magunia mlile ee Wakohani; inyo mdumikagha madhabahunyi, lilenyi ahoeni. Choonyi mlale mrwae nguwo ra magunia inyo mdumikagha imbiri ya Mlungu wapo! Kwa kukaia mafunyo gha viro na gha kunywa, ghasoweka Hekalunyi kwa Mlungu onyu.

JOELI 1:19

Nakukemia oho ee BWANA, kwa kukaia malisho ghose na midi eeoma putu; seji eekorwa.

AMOSI 5:1

Sikirenyi ulu lumbo lolila inyo wandu wa Israeli:

AMOSI 5:16

Kwa huwo BWANA, uo Mlungu Uwadie-Ndighi-Rose waghamba huwu: “Kuchakaia na kililo achienyi mbaa, na andu kose chienyi wandu wichakaia wikighamba, Weei ngai, Weei ngai! Wichawiwanga walimi wiche ifonyi; na kuwilipa awo wiko mafundi ghelila wichelila;

MIKA 2:4

Ngelo iyo ikavika, wandu wichatumia lughano lukaie mfwano ghwa wasi, nawo wichabora lumbo ulu lofwa ngolo kwa agho mughiwonie wikighamba, ‘Dameria kunonwa putu, BWANA wamerie kuwusa isanga jedu, na kujineka wandu wididwae wunyika.’”

MIKA 3:12

Kwa huwo Sioni ichalimwa sa mbuwa, na Jerusalemu ichawuya kitungasi, na mghondi ghwa Hekalu ghuwuye msidu.