JEREMIA 8:19 - Biblia Ilagho Jiboie Kwa Wandu Wose

¹⁹ Sikirenyi kililo cha wandu wapo mzinyi, kufuma wulacha ghwaro ii chia, hata wushapa ghwaro ii chia “Welee, BWANA waaisigha Jerusalemu putu? Huwo mzuri wa Jerusalemu ndeuko?” BWANA watumbulia, “Kwaki wanivaviragha ngolo na iro fwana rawo rewachwa; na iyo milimu yawo ya kighenyi?”

JEREMIA 8:19 ပူးပေါင်းရင်းမြစ်များ

ZABURI 135:21

BWANA ukaso Sioni, Uo ukaiagha Jerusalemu. BWANA ndekaso!

ZABURI 137:1

Dereserieghe kidombo mbai na mbai ya meda ya Babuloni; iji derekumbukieghe Sioni aho, dikalila.

ZABURI 146:10

BWANA, ni mzuri uchabonya nguma kwa kala na kala; Mlungu wako ee Sioni, uchabonya nguma ngelo rose. BWANA ndekaso!

ZABURI 149:2

Israeli ndeboilo ni Muumbi wake; wandu wa Sioni ndewimzumie Mzuri wawo.

ZABURI 31:6

Oho kwadazamilwa ni wandu witasagha milimu ya duu, ela ini nadakurumiria oho.

ISAYA 1:4

To! E mbari ya kaung'a, wandu wilemerwagha ni wuwiwi; mavalo gha wabonyi kiwiwi wana wibonyagha laghe-laghe. Wamsighie BWANA, wammenyere Mlungu, Mweli wa Israeli, watane nao na kuwuya nyuma putu.

ISAYA 12:6

Kemenyi na kubora kwa kuboilwa inyo wandu wose mkaiagha Sioni, kwa kukaia uo uko aghadi konyu ni m'baa, Mlungu Mweli wa Israeli.”

ISAYA 13:5

Wafuma isanga ja kula, noko cha kutua kwa ndoenyi; BWANA waawuyacha na maswagha ghake, na kwa machu ghake uchatotesha ndoenyi kose.

ISAYA 33:22

Angu BWANA nuo mtanyi odu, BWANA nuo udibonyeragha nguma; BWANA nuo mzuri odu, nao uchadikira.

ISAYA 39:3

Niko mlodi Isaya ukamchea Mzuri Hezekia ukamzera, “Awandu wafumie hao, nawo waghorie wada?” Hezekia ukaghamba, “Weenichea kufuma isanga ja kula ja Babuloni.”

ISAYA 52:1

Wuka! Wuka kukurushe ndighi rako ee Jerusalemu; rwaa nguwo rako righokie ee Jerusalemu muzi ghwa wueli. Mndungi useshamishiro angu useelie jingi ndechaangia kwako sena anduangi.

JEREMIA 10:15

Nderiwadie fwaida ingi, ni kazi ra tee; ngelo yawo etanywa, richatoteshwa.

JEREMIA 14:19

BWANA, loli koomlegha Juda putu? Koozamilwa putu ni wandu wa Jerusalemu? Kwaki kwadikaba huwu hata disedimagha diboo? Deresuwirieghe kupata sere, ela ndediwonie wucha ghungi deresuwirieghe ngelo eboa iche, ela dikaapata mashaka.

JEREMIA 14:9

Kwaki kwakaia sa mundu washinika, karakara na ing'oni jisedimagha kukira? Na sena ee BWANA, koko aghadi kodu nesi dadawangwa kwa irina jako; kusakedisigha.’”

JEREMIA 2:5

BWANA waghamba welee, “Ni ikosaki weke ndeyo wijiwonie kwapo, hata jikawibonya wighende kula nani; wikatasa milimu ya kisha, nawo weni wikawuya wandu wa kisha?

JEREMIA 27:10

Angu waawuyamfunyira wulodi ghwa tee; mchawona mkidwalwa noko kula na isanga jenyu, nani nichammbinga noko mpate kutota.

JEREMIA 31:6

Ngelo ichacha walindiri wichaawanga andenyi ya isanga ja mighondinyi ja Efraimu, ‘Wukenyi dijoke Sioni kwa BWANA Mlungu odu.’”

JEREMIA 32:30

Kwa kukaia wana wa Israeli na wana wa Juda ndewibonyere ilagho jingi icha, ela wuwiwi mduu imbiri kwapo kufuma wanake ghwawo; wana wa Israeli ndewibonyere ilagho jingi icha, ela kunivavira tu na kuniwusira machu kwa wundu ghwa mabonyo ghawo.

JEREMIA 7:19

Welee, ni ini wawuyanivavira? Wele ndawaawuyakuvavira na kukufusha waya wenii anguwada?

JEREMIA 8:20

Wandu watumbulia, “Ngelo ekuwida yaida, na sumesu yasia; nesi daduagha disekirwagha.”

JEREMIA 9:16

Nichawisasara aghadi ya mbari ra wandu wiseriichi, hata weke ndee wisererimanyireghe; nani nichawidumia majeshi hata wameria kutoteshwa.”

EZEKIELI 48:35

Kipimo cheghumara muzi ghose chia rose inya ni meta elfu ikenda, na irina ja ugho muzi kufuma ngelo iyo, ni BWANA-Oko-Aha.”

JOELI 2:32

Ela uo uchaalomba wutesia ghwa BWANA uchakia. Na seji BWANA ughambie, ‘Weko wamu andenyi ya Jerusalemu wichaafufufunuka, awo niwisaghue wichakaia moyo.’”

JOELI 3:21

Nichalipa awo wibwaghilo, hata sichaawifuya wughoma. Kwa kukaia ini BWANA nadakaia Sioni.”

OBADIA 1:17

“Ela kuchakaia na wandu wifufunukagha aighu ya Mghondi ghwa Sioni, na aho kuchakaia andu kwa wueli. Wandu wa Jakobo wichawusa isanga jiko mali yawo cheni.

MIKA 4:9

Idana kuliliaki nandighi huwu? Kwaki kujagha wasi sa muka ukumbagha lufu lova? Ni angu kusewadie mzuri? Mnjama wako oofwa?

ZEFANIA 3:15

BWANA wamerie kuinja ikabo jenyu, wamerie kuwiwinga wamaiza wenyu wose; BWANA, uo mzuri wa Israeli oko andwamweri nenyo, ndemuwuyaaobua mawiwi ghangi sena anduangi.

ZEKARIA 2:9

BWANA moni uchalwa nenyo, nenyo mchasokwa vilambo ni awo morewibonyereghe wadumiki wenyu.” Niko mchaamanya kukaia BWANA Uwadie-Ndighi-Rose wanidumie.

MABONYO GHA WADUMI 14:15

“Wele nga wandu, kwaki m'bonyagha huwu? Nechi isi de wadamu karakara na inyo; nesi daamredia Ilagho Jiboie, mpate kufuma na kurisigha iri maza ra duu, mumghalukie Mlungu uko moyo, uo oreumbieghe mlungunyi na ndoenyi, na bahari, na vose viko andenyi yaro.

WUKUMBUSO 31:17

Ituku ijo, nichajokwa ni machu aighu yawo, nani nichawisigha na kughaluka noko nisewiwone; nawo wichatoteshwa. Ngelo iyo, wichapatwa ni mawiwi mengi na kusumbuka, hata wivikie kumanya kukaia waapatwa ni agha mawiwi angu ini Mlungu wawo sikwanye nawo.

WUFUNUO 2:1

“Uo malaika wa ikanisa ja Efeso kumuandikie huwu: ‘Agha ni malagho gha uo uwadiagha nyerinyeri mfungade kwa mkonu ghwake ghwa kiwomi, uselagha aghadi ya vinara va taa va dhahabu mfungade.