JEREMIA 2:11 - Biblia Ilagho Jiboie Kwa Wandu Wose

¹¹ Mbari ingi jingi yaghalue milungu yaro, hata ngera si milungu ingi? Ela wandu wapo waindanishire wubaa ghawo kwa kilambo chisewirediagha fwaida ingi.

JEREMIA 2:11 ပူးပေါင်းရင်းမြစ်များ

1 WAZURI 11:33

Kwa kukaia wanisighie ini, ukawoka kutasa Ashtorethi mlungu ghwa waka ghwa Wasidoni, na Kemoshi mlungu ghwa Wamoabu na Milkomu mlungu ghwa Waamoni; nao ndewuebonya agho ghiko gha hachi imbiri kwapo, kwa kuiwadia memu yapo na sharia rapo kara kara na ndee Daudi.

2 WAZURI 1:3

Ela malaika wa BWANA ukamzera mlodi Elija, Mtishbi, “Wuka, kwendekwana na wandu wadumwa ni mzuri wa Samaria kuwizere, ‘Welee, huwo Mlungu oosoweka Israeli kwendaakotia malagho kwa Baalzebubu mlungu ghwa Ekroni?’

2 MALAGHO GHA NGELO 13:9

Welee, ndemuwiwingie wakohani wa BWANA awo wana wa Haruni na Walawi; mkakubonyera wakohani wenyu mmbeni sa wandu wa masanga mazima? Mundu ose uchagha kukuwika wakfu ukidwa mwanwanjau na bauru mfungade, uawuya mkohani wa iyo iseko milungu.

ZABURI 106:20

Wikaindanisha wubaa ghwa Mlungu na fwana ya ng'ombe ijagha nyasi.

ZABURI 115:4

Milimu yawo ni feza na dhahabu, kazi ra mikonu ya wandu.

ZABURI 3:3

Ela oho ko ngao enilindia ee BWANA, ni oho kunisimiagha, na kunikumba ngolo.

ISAYA 37:19

nao wakorie milungu yawo nayo ni kazi ya mikonu ya wadamu, ya midi na magho; niko oredimieghe kuinona.

JEREMIA 16:20

Kwani mdamu wadima kukubonyera moni milungu? Iyo si milungu ingi.”

JEREMIA 18:13

BWANA waghamba, “Kotienyi mbari rose ra wandu ngera mndungi wasikire ilagho sa ijo; Wandu wa Israeli wabonyere ilagho jizamie nandighi.

JEREMIA 2:5

BWANA waghamba welee, “Ni ikosaki weke ndeyo wijiwonie kwapo, hata jikawibonya wighende kula nani; wikatasa milimu ya kisha, nawo weni wikawuya wandu wa kisha?

JEREMIA 2:8

Awo wakohani ndewicheekotia, ‘BWANA oko hao?’ Awo wandu weni wereiwadieghe Sharia walemelo ni kunimanya vilongozi vikanilegha; walodi wikaloda kwa chia ya Baali, wikanugha vilambo visewadie fwaida ingi.

JEREMIA 5:7

BWANA waaghamba, “Nidima wada kukufuya wughoma? Wana wako wanileghie, na kughema kwa ivo viseko milungu ingi. Iji nerewijishireghe wikaghuda, werelakieghe na kungia andenyi ya nyumba ra malaya.

EZEKIELI 14:5

nipate kurighalua ngolo ra wandu wa Israeli cha kwapo, awo wilaghashiro na kufuma kwapo kwa wundu ghwa iyo milimu yawo.

EZEKIELI 5:7

Sikira Jerusalemu seji ini Bwana MLUNGU nighoragha: Kwa kukaia kwaleghie kusikira malaghiro ghapo na sharia rapo, kwawuya mundu osumbua kuchumba mbari ra wandu rikumarie chia rose. Kwanughie mizango ya iro mbari ra wandu.

MIKA 4:5

Kula mbari yadatasa na kusikira mlungu ghwawo, ela isi dichamtasa BWANA Mlungu odu kwa kala na kala.

WAROMA 1:23

na kughuindanisha wubaa ghwa Mlungu usewadie kuwoa kungi, na milimu iko na fwana sa ya wadamu wiwoagha, angu nyonyi, angu nyamandu, angu shimandu riavuagha.

1 WAKORINTHO 8:4

Wokoni na kuja vindo vifunyiro kizongona kwa milimu, isi damanya angu “Milimu si kilambo chingi,” na angu Mlungu ungi mzima ndeuko, ela umweri.

WAGALATIA 4:8

Aho imbiri, iji morekoghe msemwichi Mlungu, morekoghe wazumba wa iyo milungu iseko milungu kwa tabia yawo anduangi;

WUKUMBUSO 32:16

Kutasa milimu kwawo korem'bonyereghe kuwadwa ni iriso, mabonyo ghawo ghizamie ghikamjosa machu.

WUKUMBUSO 32:21

Waniredie machu kwa wundu ghwa milungu yawo, wanibonyere nikaie na iriso kwa iyo milungu iseko milungu ingi loli. Kwa huwo nichawibonya wiwawo ni ngolo kwa kutumia mbari imu; nichawibonya wiwado ni iriso kwa kutumia mbari ya makelu.

WUKUMBUSO 33:29

Israeli kuboilwa saki! Ndekuwadie ungi ufwanane nenyo, mburi ikirilo ni BWANA. BWANA moni ni ngao yenyu na lufu lonyu upate kumlindia na kumneka wusimi. Wamaiza wako wichacha wikikulomba wughoma, na oho kuchawifasha-fasha.

1 PETRO 1:18

Angu mwamanya morekombologhe kufuma kwa iro chia renyu ra wuduu ra kala, iro moreriwadieghe kufuma kwa weke ndeyo; si kwa vilambo vinonekagha sa feza angu dhahabu anduangi,

1 SAMUELI 4:21

Ukammbanga uja mwana Ikabodi ukighamba, “Ugho wubaa ghwameria kuinjika kufuma kwa Israeli!” Kwa kukaia Sanduku ya Mlungu yameria kuwadwa, na mghosi wake na mumi wameria kufwa.