JEREMIA 19:4 - Biblia Ilagho Jiboie Kwa Wandu Wose

⁴ Kwa kukaia wandu wanisighie, na kukunona andu aha kwa kuifukiria milungu mizima marumba, iyo wiseiichi, hata weke ndee, hata wazuri wa Juda wiseiichi; na andu aha wakunonie kwa kudia bagha ra wandu wisewadie ikosa jingi,

JEREMIA 19:4 ပူးပေါင်းရင်းမြစ်များ

2 WAZURI 21:16

Aighu ya agho, Manase orebwaghieghe wandu wengi wisewadie makosa ghangi, hata chia ra Jerusalemu rikachulwa ni bagha ii chia na ii chia; kula na iro kaung'a, orewishekerieghe wandu wa Juda kungia kaung'enyi na kubonya mawiwi imbiri yapo.

2 WAZURI 23:10

Mzuri Josia ukalusha Tofethi wulalo ghotasira milimu, ghuko vololonyi ya wana wa Hinomu, eri mndungi usewuefunya mwana ungi wake kizongona chekora, kwa ghuja mlungu Moleki.

2 WAZURI 24:4

na kwa wundu ghwa kubwagha wandu wa hachi. Kwa kukaia Manase orebwaghieghe wandu wa hachi wengi wa Jerusalemu, na BWANA nderekoghe tayari kumfuya wughoma.

ZABURI 106:38

Wikabwagha wana wawo wisewadie ikosa jingi; wikawifunya wana wawo vizongona kwa milimu ya Kanaani, ndoe ikalushwa ni uko kubwagha.

ISAYA 59:7

Mwaghenda na iseghe kubonya wuwiwi, mwashashira kudia bagha ya wandu wisene ikosa jingi. Maririkanyo ghenyu ni gha wuwiwi, na andu kose mwidagha mwadabonya mawiwi ghenona.

ISAYA 65:11

Ela ndeichaakaia huwo konyu inyo munisighagha ini, na kuleghatala ugho mghondi ghwapo ghwa wueli; inyo mtasagha mlungu Bahati, na mlungu Ndengwa.

JEREMIA 1:16

Nani nichareda kutanya kwapo aighu ya wandu wapo, kwa wundu ghwa ugho wawiwi ghwawo ghose ghonilegha ini, na kufukiria milungu mizima marumba na kwa wundu ghwa kutasa kazi ra mikonu yawo cheni.

JEREMIA 11:13

Kwa kukaia milungu yenyu eewuya mingi kara kara na mizi enyu ee Juda, na madhabahu ghenyu mughiwikie ghemfusha waya gheeka mengi kara kara na chia ra Jerusalemu; mpate kumfukiria Baali marumba.

JEREMIA 15:6

Oho kwanileghie, na oho kwachurie kuwuya nyuma; niko ngaghughorua mkonu ghwapo kukukaba na kukutotesha; nasilwa ni ndighi rekurumaghia.

JEREMIA 16:11

Niko kuchawizera, ‘Ni kwa kukaia weke ndeyo wanisighie, nawo wanughie milungu mizima, wikaidumikia na kuitasa, wikanilegha hata ndewereiwadieghe sharia yapo anduangi.

JEREMIA 17:13

Ee BWANA oho kuko isuwirio ja Israeli, wose wikusighagha wichafushwa waya, na awo wikughalukiagha nambai, wichalaghaya sa marina ghiandikilo andonyi kwa kukaia wamsighie BWANA, uo ndoria ya machi ghiko moyo.

JEREMIA 17:20

kughambe: ‘Sikirenyi ilagho ja BWANA inyo wazuri wa Juda na wandu waro wose, na wandu wose wikaiagha Jerusalemu, awo wingiriagha mbenge iri.

JEREMIA 18:15

Ela wandu wapo awo wanisighie, wadafukiria milungu ya tee marumba; Wamerie kukuwa kwa chia rawo, iro chia rawo ra kala; nawo wanughie chia zima riseboisiro.

JEREMIA 2:13

kwa kukaia wandu wapo wabonyere makosa awi: wanisighie ini ndoria ya machi ghiko moyo, na kukukotera weni visima vawo vibarikie visedimagha kuwadia machi.

JEREMIA 2:17

Agha malagho ndekookuredia kumoni ee Israeli, kwa wundu ghwa kunisigha ini BWANA Mlungu wako, ingelo nerekoghe ngikughenja chienyi?

JEREMIA 2:19

Mawiwi ghako gheni ghichakuneka adhabu, na kuwuya nyuma kwako kuchakukemia. Zighana kuwone kukaia ni ilagho iwiwi sena jibirie ja oho kunisigha ini BWANA Mlungu wako; ndekuwadie ghuja wundu ghwa kuniobua ini andenyi kwako.”

JEREMIA 2:30

Nawinekie wana wako adhabu, ela ndewicheetala kukuboisa weni. Mwawibwaghie walodi wenyu mmbeni, karakara na shimba ifondiagha.

JEREMIA 2:34

Nguwo rako reechulwa ni bagha ya wakiwa wiseko na ikosa jingi, hata kusewiwonie wikibara nyumba; ela sena aighu ya agho ghose,

JEREMIA 22:17

Ela mawoni gha ngolo yako ni aighu ya fwaida risefwanagha, na kudia bagha ra wandu wisewadia ikosa jingi, na kukuzaisira maza rekoronga wandu.”

JEREMIA 22:3

BWANA waghamba, m'bonye malagho gha loli na gha hachi, mmbunje kilambo cha uo usokelo ni mkorongi. Msebonye kiwiwi, angu kumkita mghenyi, angu mwana mkiwa, angu muka mkiwa, angu kudia bagha ya mundu usena ikosa andu aha.

JEREMIA 26:15

Ela mmanye kwa loli mkanibwagha, mchakuredia aighu yenyu na aighu ya muzi ughu na wandu waro ikosa ja kubwagha mundu usewadie ikosa jingi. Kwa kukaia ni loli BWANA ooniduma konyu kughora agho malagho ghose mwaghisikira kwa madu ghenyu.”

JEREMIA 26:23

wikamfunya Uria aja Misri, wikamreda kwa Mzuri Jehoiakimu; nao ukam'bwagha kwa lufu na kughukumba mumbi ghwake andu korikia kwa wandu wa kawaida.)

JEREMIA 44:3

kwa wundu ghwa wuwiwi wereghubonyereghe na kuwusira machu ghapo, iji wereghendieghe kufukiria milungu mizima marumba na kuitasa; iyo, awo weni angu inyo, hata weke ndeyo wisereimanyireghe anduangi.

JEREMIA 5:6

Kwa huwo wichabwaghwa ni shimba ifumagha kilembenyi, na kikwau chifumagha kireti chichawitotesha. Inge yaawuyalaliria mizi yawo, mndungi uchaafuma ucharashulwa vipande vipande, kwa kukaia makosa ghawo ni mengi, na kuwuya nyuma kwawo kwakaia kubaa.

JEREMIA 7:6

nao mkaie msemkorongagha mghenyi, na mwana mkiwa, na muka mkiwa angu kudia bagha ya wandu wisena ikosa andenyi ya muzi ughu, nenyo msighe kuinugha milungu mizima emnonia inyo mmbeni;

JEREMIA 7:9

Kwani mwadima kuiwa, na kubwagha, na kulaka, na kughema kwa tee, na kufukiria Baali marumba, na kutasa milungu mizima msereimanyireghe,

KILILO CHA JEREMIA 4:13

Agha gheebonyeka kwa kukaia walodi wake wabonyere kaung'a, na wakohani wake wikabonya makosa ghiwishekerie wandu wa hachi kubwaghwa.

EZEKIELI 20:26

ngawisigha wikulushe weni kwa kutumia manosi ghawo gheni wighifunyire, ngawibonya wifunye wavalwa wawo wa imbiri kizongona chekora, eri niwioboshe. Nerebonyereghe huwo eri wimanye kukaia ini ne BWANA.

EZEKIELI 7:22

Nichalangaya noko nisewizighane, eri awo wandu wawiwi wipate kuilusha Hekalu yapo; viting'a vichangia na kuilusha.

EZEKIELI 8:11

Naimbiri kwawo waghosi mirongo mfungade wa Israeli werekaieghe kimusi wikwanye na Jaazania mwana wa Shafani aghadi kwawo. Kula umu orekoghe wawadia luwigha lofukiria marumba, na mosi ghwaro ghukakaia ghukifukia nokoighu.

DANIELI 11:31

Masikari ghifumagha kwake wichacha na kuilusha Hekalu na ngome. Wichaghiria vizongona va nakesho na va nakenyi visefunyo, nawo wichammbika uja Mmbiwi Mnoni andenyi ya Hekalu.

LUKA 11:50

eri ipate kukotelwa kwa kivalwa ichi, bagha yose ya walodi idirilo kufuma kuzolwa kwa wurumwengu.

WUKUMBUSO 13:13

wei wandu wamu wa kisha wa mzenyu waghendie na kuwilaghasha wandu wa ugho muzi wikighamba, wei wighende kutasa milungu mizima, iyo mseiichi,

WUKUMBUSO 13:6

“Mwanyinyu wa mayo, angu mwana wako wa womi angu wa waka, angu muka wako umoni kumkunde, angu mghenyi wako wa ngolonyi, ukakusesea kwa kiviso wei muendetasa milungu mizima iyo hata weke ndeyo wisereiichighi;

WUKUMBUSO 28:20

“BWANA uchakuredia njowe, kulaghalo ni akili, kusumbuke na kulemwa ni maza rako rose kuribonyagha, hata kwanoneka na kusia shwa wori kwa wundu ghwa mabonyo ghako ghizamie angu kumsighie.

WUKUMBUSO 28:36

“BWANA uchakudwa chiaimweri na mzuri wako kumsaghue kughende kwa mbari kuseiichi oho, hata weke ndeyo; na aho kuchaitasa milungu mizima ya midi na ya magho.

WUKUMBUSO 28:64

Nao uchamsaghisa aghadi ya wandu wose ndoenyi ii chia na ii chia; na aho mchaidumikia milungu mizima ya midi na ya magho, iyo msereiichighi hata weke ndeyo.

WUFUNUO 16:6

Kwa kukaia wandu weredirieghe bagha ya waeli na walodi, na oho kwawineka bagha winyo. Ni malipo ghawo!”

WATANYI 5:8

Iji Waisraeli wereisaghueghe milungu ya kighenyi, na wuda ghukacha hata mbengenyi; mwawonie mndungi wawada ngao angu ifumu aghadi ya wandu elfu mirongo ina wa Israeli?