ISAYA 57:15 - Biblia Ilagho Jiboie Kwa Wandu Wose

¹⁵ Angu uo ukaiagha aighu, ukumikie, ukaiagha kwa kala na kala, uo uwangwagha Mweli, waghamba huwu: “Ini nadakaia koighu andu kwa wueli, sena nadakanya na uo mundu uko na ngolo iheagha na kukusera; nipate kurukisha roho ra wandu wikuserie, na ngolo ra wandu wiko na wundo ghwa kuhea.

ISAYA 57:15 ပူးပေါင်းရင်းမြစ်များ

KUZOYA 21:33

Abrahamu ukawa mkwachu aho Beer-sheba, ukamtasa BWANA Mlungu wa kala na kala.

1 WAZURI 8:27

“Ela loli Mlungu wadima kukaia ndoenyi? Zighana mlungunyi kwa ighu ndekukukatagha, ni kuchumba saki i Hekalu nakuaghia!

2 MALAGHO GHA NGELO 34:27

ghikakubonya kuhee na kukusera imbiri yapo kwendasikira kukaia nichakaba andu aha na wandu waro, kukakusera imbiri yapo, kukarashua nguwo rako na kulila, ini wori nakusikira.

AYUBU 22:29

Mlungu wadawisera awo wikujosagha, na kuwikira awo wikuseragha.

AYUBU 6:10

Ugho ghwakaiagha wuhoreshi ghwapo, hata nadaboilwanya na luwawo lubaa, angu sileghie malagho gha uo Mweli.

ZABURI 111:9

Wawiredie wandu wake wukomboli, ukabonya ilaghano ja kala na kala nawo. Uo ni Mweli uwadie ndighi.

ZABURI 115:3

Mlungu odu oko mlungunyi, wadabonya ijo jose ujikundagha.

ZABURI 123:1

BWANA, nakuzighana oho kuseriagha kifumbi cha nguma mlungunyi.

ZABURI 138:6

Hata ngera koko ighu ee BWANA, kwadawitala wanyonge; Ela wandu wikukasire, ndewivisikagha kwako.

ZABURI 138:7

Hata ngera naidia andenyi ya wasi, kwadanilindia; kwadawitangala wamaiza wapo wiko na machu, na kunikira kwa ndighi rako.

ZABURI 147:3

Wadawiboisa awo wibwaghilo ngolo, na kuwifunga ngoru rawo.

ZABURI 34:18

BWANA wadakaia kaavui na wandu wifue ngolo, na kuwikira awo wisewadie isuwirio.

ZABURI 34:19

Mundu wa hachi wadima kupatwa ni matiriro mengi, ela BWANA wadamkira nagho ghose.

ZABURI 51:17

Vizongona virumirilwagha ni Mlungu, ni roho ikuserie; ndekuchaaimenya ngolo ikuserie, iheagha ee Mlungu.

ZABURI 51:19

Niko kuchaaboilwa ni vizongona va hachi; vizongona vekora, na vizongona vekora vose; niko njau richaafunywa madhabahunyi kwako.

ZABURI 83:18

Kuwibonye wimanye kukaia ni oho kuekeri kuwangwagha BWANA; M'bonyi nguma m'baa ndoenyi kose.

ZABURI 90:2

Imbiri kuseumbie mighondi angu ndoenyi na wurumwengu, oho korekoghe; sena kuchadua kwa kala na kala.

ZABURI 93:2

Kifumbi chako cha nguma chamangishiro kufuma kala ee BWANA, oho ko wa kala na kala.

ZABURI 97:9

Oho BWANA koko aighu nandighi kuchumba ndoenyi kose. Koko ighu na ndighi kuchumba milungu yose.

ZABURI 99:3

Ndewijikase irina jake ibaa jeobosha. Uo ni Mweli.

KUFUMA 15:11

“Nani uko sa oho ee BWANA aghadi ya milungu? Nani uko sa oho kwa wubaa andenyi ya wueli? Mabonyo ghako gha wubaa ghiaobosha, ghiko gha mashiniko?

KUFUMA 15:13

Oho korewighenjere kwa lukundo lwako lwa loli, awo wandu korewikombueghe kumoni; oho korewilongozere kwa ndighi rako, hata andu kwako kokaia kuelie.

KUFUMA 15:18

BWANA uchabonya nguma kwa kala na kala.”

KUFUMA 40:34

Niko iwingu jikaifinikira Hema, na mwengere m'baa ghwa BWANA ghukang'ala-ng'ala andenyi yaro.

KUFUMA 40:35

Na Musa nderedimieghe kungia andenyi ya Hema Ekwania kwa kukaia ijo iwingu jerekaieghe aho, na mwengere ghwa BWANA ghorekoghe andenyi yaro.

MAKATANISHO 16:19

Baa kukaia na roho ekusera chiaimweri na wakiwa, kuchumba kuwagha vilambo vidwalo wunyika chiaimweri na wandu wikukasagha.

MAKATANISHO 8:23

Ini nerebonyeroghe kufuma kokala, koimbiri wurumwengu ghuseumbilo.

ISAYA 18:4

Angu BWANA wanizerie huwu, “Nichazighana mboaeri kufuma andu kwapo nikaiagha, sa ndoe yakombwa ingelo iruwa jakala, sa iwingu ja mami mrukenyi ngelo ekuwida viro.

ISAYA 33:5

BWANA wachua wubaa, kwa kukaia andu kwake kokaia ni kwa ighu. Uchaichura Jerusalemu na maza ra hachi na loli.

ISAYA 40:28

Wele ndekuichi, angu ndekusikire? Kukaia, BWANA ni Mlungu wa kala na kala, nuo Muumbi wa kutua kose kwa ndoenyi, ndesilwagha jingi hata ndedumbukagha, kumanya kwake ndekulawulwagha.

ISAYA 52:13

BWANA waghamba, “Olenyi mdumiki wapo uchawona nicha, uchakumwa na kujoswa ighu; nao uchakaia ighu na ndighi.

ISAYA 6:1

Mwaka ghuja Mzuri Uzia orefueghe, neremmbonieghe BWANA uko kidombo aighu ya kifumbi chake cha nguma chiwusirilo ighu, na irwao jake jerechueghe Hekalunyi.

ISAYA 6:3

Wikawangana weni na weni wikighamba, “Mweli, mweli, mweli, ni BWANA wa majeshi, ndoenyi kose kwachua wubaa ghwake.”

ISAYA 63:15

Kudizighane kufuma mlungunyi kwako ee BWANA, kufuma agho malalo ghako ghielie gha wubaa. Ugho wuing'oni na kudima kwako koko hao? Ghuao ugho wughoma na lukundo lwako kudikunde nalo?

JEREMIA 10:10

Ela BWANA ni Mlungu wa loli; Uo ni Mlungu uko moyo, na Mzuri wa kala na kala. Ndoe yadasughuswa ni machu ghake, iro mbari ra wandu nderidimagha kurumaghia lubio lwake.

KILILO CHA JEREMIA 3:41

Ndedirughuo ngolo redu cha kwa Mlungu uko mlungunyi dilombe huwu:

EZEKIELI 16:63

Kuchakumbuka na kufwa waya, hata na jingi kusewuyeghora ilagho jingi kukiwona seji kwafushwa waya ingelo nichaakufuya wughoma makosa ghako ghose koreghibonyereghe. Ini Bwana MLUNGU naghamba.”

EZEKIELI 9:4

BWANA ukamzera, “Ghenda mzinyi kose, aghadi ya Jerusalemu, kuwibonye alama chamunyi wandu wiko na wasi na kulilia ughu muzi kwa wundu ghwa wuchafu ghose ghwawuyabonywa andenyi yaro.”

DANIELI 2:11

Iji ilagho mzuri wawuyakotia jakurie, na ndekuwadie mdamu ungi udimagha kummbonyera, isaakaia ngera milungu iseko na mimbi.”

DANIELI 4:17

Kutanya uko kwanughana na sharia idumbulo na kutangazwa ni weke malaika waeli wichereshagha, eri kutua wandu wiko moyo wimanye kukaia Uo-Uko-Aighu-Nandighi wadabonyera mawuzuri ghose gha wadamu nguma, nao wadamneka uo ose umkundagha, na kumjosa uo uko mnyonge.’

DANIELI 4:34

Nebukadnezari ukaghamba, “Kutua kwa agho matuku, ini Nebukadnezari nerewusireghe meso ghapo cha mlungunyi, nawurilwa ni akili rapo, ngamkasa Uo-Uko-Aighu-Nandighi, ngamkasa na kumneka ishima uo uduagha moyo kwa kala na kala. Uo wadabonya nguma kwa kala na kala, na wuzuri ghwake ghwadakaia vivalwa na vivalwa.

JOELI 2:13

Rashuonyi ngolo renyu nguwo mbai.” Wuyenyi kwa BWANA, Mlungu onyu. Uo wachua mvono na wughoma, wachua irumaghio, nao wadamaziria malaghiro ghake; wadafuya wughoma na kuleka kukaba.

MIKA 5:2

BWANA waghamba, “Bethlehemu Efrata, koko mtini putu aghadi ya mizi yose ya Juda; ela nichawusira m'bonyi nguma kufuma kwako, nao uchakaia m'bonyi nguma wa Israeli ufumagha kwa kichuku icheni cha kala.”

MIKA 6:8

Hata! BWANA wadimanyishire ijo jiko icha. Ijo BWANA ujikundagha kodu ni iji: Kubonya ijo jiko ja hachi, kukaia na lukundo lukatie, kukusera na kukaia na wungara na Mlungu odu.

ZEKARIA 2:13

Wandu wose ndewikaie kima imbiri ya BWANA, kwa kukaia waawuyacha kufuma andu kwake kwa wueli.

ZEKARIA 9:9

Zumenyi ee wandu wa Sioni! Kemenyi kwa kuboilwa inyo wandu wa Jerusalemu! Wonenyi mzuri onyu uamchea! Oko na wusimi m'baa; ela ni mmboa nao wajoka aighu ya punda; punda mtini, mwana wa punda.

MATHAYO 6:9

Idana mlombeghe sa huwu: ‘Aba odu kuko mlungunyi, Irina jako jikaso.

LUKA 1:49

Angu Uo-Uwadie-Ndighi wanibonyera maza mbaa, na irina jake jaelie.

LUKA 4:18

“Roho wa Bwana oko aighu kwapo, angu orenishingieghe mavuda niwichilie wakiwa Ilagho Jiboie. Wanidumie niwighorie wafungwa malagho gha kufungulwa kwawo, na vitungure kupata kuwona kwawo, kuwifungua awa wikorongwagha;

MABONYO GHA WADUMI 3:14

Ela inyo moremleghieghe uja Mweli, uo Mhachi; mkakunda mfunguilo m'bwaghi wandu.

WAROMA 1:20

Kufuma Mlungu waumba wurumwengu, ndighi rake ra kala na kala na wulungu ghwake ghusewonekagha, vamerie kuwoneka worinyi kwa chia ya ivo vilambo vibonyero. Kwa huwu, awo wandu ndewiwadie jekudederia anduangi;

2 WAKORINTHO 1:4

uo udihoreshagha andenyi ya wasi ghodu ghose, eri na isi didime kuwihoresha awo wiko na wasi ghungi, kwa ugho wuhoreshi ghoni dihoreshwagha nagho ni Mlungu.

2 WAKORINTHO 2:7

Jasighwa ni inyo mumfuye wughoma, na kumkumba ngolo usekechangilwa ni wasi ghomchumba ndighi na kulaghaya.

2 WAKORINTHO 7:6

Ela Mlungu, uo uwihoreshagha ngolo wanyonge, oredihoreshereghe ngolo kwa kucha kwa Tito.

WUKUMBUSO 33:27

Mlungu wakaie mlindiri wako ngelo rose; mikonu yake ya kala na kala niyo yawuyakumaziria Orewisimieghe wamaiza wenyu imbiri yenyu; ukamzera muwitoteshe wose.

1 TIMOTHEO 1:17

Idana kwa uo Mzuri wa ngelo rose, useidagha, usewonekagha, Mlungu uekeri, ndejikaie ishima na wubaa kwa kala na kala. Amen.

1 TIMOTHEO 6:16

Uo uekeri nuo uko na irangi jisenonekagha, nao wadakaia andenyi ya mwengere ghusedimagha kusoghoderwa, uo mndungi usemmbonie jingi, hata usedimagha kummbona; kwake uo ndejikaie ishima na kubonya nguma kwa kala na kala. Amen.

WAEBRANIA 9:14

ni kuchumba saki bagha ya Kristo, uo kwa chia ya Roho wa kala na kala, orekufunyireghe moni kwa Mlungu kuseko na iboli jingi, ichamuelesha nia renyu mfume kwa kazi rifue, mpate kumdumikia Mlungu uko moyo.

JAKOBO 4:6

Ela wanekagha mvono ghuchumbie, kwa huwu Maandiko ghaghamba, “Mlungu wawitangala wang'eti, ela wawineka mvono awo wikuseragha.”

1 PETRO 5:5

Wokoni na inyo muko watini mkuwike aisi ya waghosi. Inyo mmbose mkaie na wumboa kula mundu na mmbao; angu, “Mlungu wawitangala wang'eti, ela wawineka mvono awo wiko na wumboa.”

WUFUNUO 15:4

Nani useobuagha na kujikasa irina jako, ee Bwana? Angu oho kuekeri koko mweli. Wandu wa mbari rose wichacha na kukutasa oho, angu kutanya kwako kwamerie kufunukulwa.”

WUFUNUO 3:7

“Na uo malaika wa ikanisa ja Filadelfia kumuandikie huwu: ‘Agha ni malagho gha uo Mweli, uo mloli, uo uko na ugho mfunguo ghwa Daudi; uo ukarughua, mndungi ndedimagha kurugha; ukarugha, mndungi ndedimagha kurughua anduangi.

WUFUNUO 4:8

Iro nyamandu riko moyo inya, riko na mawawa arandadu kula imu, rachue meso chia rose, hata na nandenyi; naro radabora kari kose kio na dime rikighamba, “Mweli, Mweli, Mweli, ni uo Bwana Mlungu Uwadie-Ndighi-Rose; uo orekoghe, uo uko, nao nuo uchagha.”

1 SAMUELI 2:2

“Ndekuwadie mweli ungi uko sa BWANA, hata ndekuwadie ungi okatanishwa nao; ndekuwadie mlindiri ungi sa Mlungu odu.