ISAYA 5:2 - Biblia Ilagho Jiboie Kwa Wandu Wose

² Oreilimieghe, ukafunya magho gherekoghe, ukawa mzabibu ghuboie; ukaagha mnara ghadi na ghadi ya ndoe, ukakota kina chekamia zabibu, ukaweseria upate zabibu riboie, ela ghukava zabibu ra isakenyi.

ISAYA 5:2 ပူးပေါင်းရင်းမြစ်များ

2 SAMUELI 7:10

Sena nichawisaghuya wandu wapo Israeli andu nichaawiwika, wipate kukaia andu kwawo koni wisechaasumbulwa ni mndungi sena; hata wandu wawiwi ndewichaawikoronga sena sa kala,

NEHEMIA 13:15

Matuku ghaja nerewonieghe wandu andenyi ya Juda wikikama zabibu ituku ja Sabato; wikareda kitungu cha viro na kuvidukishira weke punda, na divei, zabibu, tini na misigo ya kula mbari wikaireda Jerusalemu ituku ja Sabato ngawikania wandu wiseuzeghe vindo ituku ijo.

ZABURI 80:8

Korediredieghe sa mzabibu kufuma Misri, kukariwinga mbari zima na kughuwa isangenyi kwawo.

ZABURI 80:9

Koreghuboisireghe ndoe; ghukadunga miri ndenyi, na kuera isangenyi.

KUFUMA 33:16

Angu ichamanyika wada ngera loli kwaboilwagha ni ini na wandu wako? Welee, si iji oho kwaghendanya nesi, siko aho dichaamanyika nicha ini chiaimweri na wandu wako, kwa wandu wose wiko ndoenyi anguwada?”

ISAYA 1:8

Muzi ghwa Jerusalemu ghoosighwa sa kiwanda chiko mbuwenyi ya mizabibu; sa kigharo aghadi ya mbuwa ya marenge; sa muzi ghurughailo ni waghenyi.

ISAYA 5:7

Wandu wa Israeli niwo iyo mbuwa ya BWANA wa majeshi, na wandu wa Juda niwo ugho mzabibu ghuboie oreghuwaeghe; ukalola kuwona loli ikibonywa, ela wulalo ghwaro ukawona kifwa, ukalola kuwona mabonyo gha hachi, ela wulalo ghwaro ukasikira kililo.

JEREMIA 11:17

Ini BWANA wa majeshi, uo orekuwaeghe wamerie kughora mawiwi aighu yako, kwa wundu ghwa mawiwi ghibonyero ni wandu wa Israeli na wandu wa Juda; wikanivavira ngolo kwa kumfukiria Baali marumba.”

JEREMIA 2:21

Ela sena nerekuwaeghe karakara na mzabibu ghusaghulo, ghufumie kwa mbeu ndicha. Kwaghalukie-ghalukie wada, kukawuya mzabibu ghwa isakenyi?

HOSEA 10:1

Wandu wa Israeli weeka sa mzabibu ghuvagha matunda kwa wungi. Ngelo wawuyachurikia kukaia nicha, niko wawuyachuria kuagha madhabahu mengi. Seji isanga jake jichuriagha kuva mavalo mengi, ni huwo wichurie kuagha nguro rake ra magho riboie retasa.

MIKA 4:8

Na oho, ee Jerusalemu, andu Mlungu orekoghe ukichereshera wandu wake sa mlisha uko mnarenyi, nichakubonya kukaie muzi m'baa ghwa wuzuri ghonyu sa kala.

MITALO 23:9

Angu nammbona niko koighu mighondinyi namzighana niko aighu ya mighondi mitini. Hawaja ni wandu wikaiagha wiekeri, hata ndewikutalagha weni andwamweri na mbari zima.

MATHAYO 21:19

Hata iji waghuwona mtini mbai na mbai ya chia ukaghughendia, nao nderepatireghe itunda jingi ela malemba maduu. Ukaghuzera ghuja mudi, “Jingi kuseve itunda sena.” Nao ghuja mtini ghukanyaya shwa wori.

MATHAYO 21:33

Nao Jesu ukawizera, “Sikirenyi mfwano ghumu. Mundu wa nyumba umu orelimieghe mbuwa ya mizabibu, ukaibonyera wurigha, ukakota kina chekamia zabibu, ukaagha mnara na kuipangisha walimi; nao ukadamba cha isanga izima.

MATHAYO 21:34

Hata iji kimu cha makuwido chavika, ukawiduma wadumiki wake kwa walimi upate ifungu jake ja makuwido.

MARKO 11:13

Nao iji wawona mtini kula koni, ghuko na malemba mengi, ukaghusughudia eri upate itunda jingi aho. Hata iji wabusa, nderewonieghe itunda jingi, ela malemba maduu; angu ndeerekoghe ngelo ya matini anduangi.

MARKO 12:1

Jesu ukazoya kughora nawo kwa mifwano. “Mundu umu orelimieghe mbuwa ya mizabibu, ukairighia masanju, ukakota kina chekamia zabibu, ukaagha mnara. Ukaipangisha mbuwa iyo kwa walimi, nao moni ukadamba cha isanga izima.

MARKO 12:2

Kimu chekuwida zabibu chiendavika, ukaduma mdumiki wake kwa walimi, wimpatire ifungu ja mavalo gha mizabibu.

WAROMA 9:4

Awo ni Waisraeli, na uko kubonywa kukaia wana wa Mlungu ni kwawo, na wubaa ni ghwawo, na ilaghano ni jawo, na uko kunekwa Sharia ni kwawo, na wutasi ni ghwawo, na malaghiro ni ghawo;

1 WAKORINTHO 9:7

Nani udumikagha sa asikari kwa gharama rake moni? Nani uwagha mizabibu usejagha matunda gharo? Nani ulishagha mfugho usenywagha mariwa?

WUKUMBUSO 32:6

Huwo niko mumlipagha BWANA inyo wakelu msewadie akili? Uo ni ndeyo na Muumbi onyu, wam'bonyere mkawuya mbari.

WATANYI 16:4

Nyuma ya agho, Samsoni ukamkunda mwai uwangwagha Delila ukaiagha Vololo ya Soreki.