ESTA 4:3 - Biblia Ilagho Jiboie Kwa Wandu Wose

³ Itangazo ja mzuri jiendamanyika masanga ghose, chikakaia kililo kibaa kwa Wayahudi wose. Wose wikalila wikisirimika, wikafunga tumu, wikilila na kukema mchungu, na wengi wawo wikirwa nguwo ra magunia na kulala maivunyi.

ESTA 4:3 ပူးပေါင်းရင်းမြစ်များ

ESTA 1:1

Matuku mzuri Ahasuero orekoghe ukibonya nguma, oreghibonyereghe nguma masanga ighana na mirongo iwi na mfungade; kufuma India hata Kushi.

ESTA 3:12

Nao ituku ja ikumi na idadu ja mori ghwa imbiri, Hamani ukawiwanga waandiki wose wa mzuri. Ukafunya momu angu itangazo wajifunya, jifasirilo na kubonywa kopi rikate kwa viteto vose na maandiko ghitumilwaghwa andenyi ya ugho wuzuri, na kudumwa kwa wabaa wose wa masanga, watini na wabaa wori na vilongozi va mbari rose. Itangazo ijo jerefunyiroghe kwa irina ja mzuri Ahasuero, jikakabwa muhuri ghwa pete yake.

ESTA 4:16

“Ghenda kuwikwanye Wayahudi wose wiko Susa, wikufunye kufunga tumu na kulomba kwa wundu ghwapo, mseje hata kunywa kindo chingi kwa matuku adadu na vio varo. Wai wapo wa kazi chiaimweri nani dichabonya wokoni. Konyuma nichaghenda kwa mzuri hata ngera sharia yaleghie. Ikakaia ni kufwa, nifo.”

ESTA 4:2

Ukaghenda hata mbengenyi ya ngome kwa mzuri, ela nderengirieghe andenyi anduangi, kwa kukaia mndungi ndererumiriloghe kungia andenyi ya ngome urwae nguwo ya igunia.

ESTA 4:4

Nao iji wai wa kazi wa weke kolowi wa Esta wamghoria malagho gha Mordekai, malkia Esta ukangilwa ni wasi m'baa. Ukamdumia Mordekai nguwo upate kurwa wulalo ghwa iyo nguwo ya igunia, ela Mordekai ukarilegha.

ESTA 9:31

kuwighoria angu awo na vivalwa vawo vose wighikumbukeghe matuku gha Purimu kwa ngelo yaro sa iji koni wikumbukagha sharia ya kufunga tumu ngelo ya wasi. Malaghiro agho gherefunyiroghe ni Mordekai, chiaimweri na Malkia Esta.

AYUBU 2:8

Ayubu ukawada luwigha lokusuwa, ukasea kidombo a ivunyi.

ISAYA 22:12

Ngelo iyo, Bwana MLUNGU wa majeshi orekoghe ukimmbanga mpate kulila na kukema, na kuara vongo venyu kwa wasi, mkirwa nguwo ra magunia.

ISAYA 22:4

Niko ngaghamba, “Nileke! Nisighe nilile kwa kuwawa, hata kusesumbuke kuninyamirisha, angu nawawa ni uko kunoneka kwa wandu wapo.”

ISAYA 58:5

Munizera uku ni kufunga tumu nerekusaghueghe ini, wei mundu ukusere kwa wasi na kughoghomesha chongo chake sa lunyasi, na kurwa nguwo ra magunia chiaimweri na kulala ivunyi? Mwadima kughamba uku ni kufunga tumu na ituku nijirumiriagha ini BWANA?

EZEKIELI 27:30

wikikulilia na kukema kwa kuwawa kubaa. Wakumba teri aighu ya vongo vawo, na kughala-ghala a ivunyi;

DANIELI 9:3

Niko ngamghalukia BWANA Mlungu na kumlomba kwa kufunga ndighi; ngimlomba na kuvoya kwa kufunga tumu na kurwa nguwo ra magunia, na kusea kidombo ivunyi.

JONA 3:6

Mzuri wa Nineve uendasikira agho malagho ukainjika kifumbinyi chake cha nguma, ukarua nguwo yake, ukakurusha nguwo ya igunia na kusea kidombo aivunyi.

MATHAYO 13:42

wiwikumbe kwa iwiwi ja modo ghubirie, na aho wichalila na kuja maghegho.

MATHAYO 22:13

Nao mzuri ukawizera waja wadumiki, ‘Mfungenyi mikonu na maghu, mumkumbe kwa kira chiko shighadi; aho kuchakaia kulila na kuja maghegho.’

MATHAYO 25:30

Na idana uhu mdumiki usene fwaida, mkumbenyi kwa kira chiko shighadi. Aho kuchakaia na kulila na kuja maghegho.’

JOSHUA 7:6

Nao Joshua andwamweri na vilongozi va Israeli wikarashua nguwo rawo kwa wasi, wikaghwa kiwushu-wushu imbiri ya Sanduku ya Ilaghano, wikakudunga teri vongonyi kwawo na kuwonyera wasi ghwawo, na kulala aho hata luma lwa kenyi.

1 SAMUELI 11:4

Nao iji awo wadumwa wavika muzi ghwa Gibea kwa Sauli, wikaghora agho malagho kwa wandu; na wose wikaarisa mchungu na kulila.