DANIELI 8:8 - Biblia Ilagho Jiboie Kwa Wandu Wose

⁸ Ija fwandi ikakuduka loli loli. Ela iji erechurikieghe kukaia nandighi, luja lwembe lwake lubaa lukachika, na wulalo ghwaro rikabuka mbembe inya mbaa rilangayagha mbembe inya ra mlungunyi.

DANIELI 8:8 ပူးပေါင်းရင်းမြစ်များ

2 MALAGHO GHA NGELO 26:16

Ela nguma rake riendachurikia, ukangilwa ni kukukasa komtotesha. Orelemeloghe ni kukaia mloli kwa BWANA, Mlungu wake, ukangia Hekalunyi ufukire marumba aighu ya madhabahu.

ESTA 9:4

Mordekai ukamanyika andu kose isangenyi seji ubonyero kukaia mundu m'baa ngomenyi kwa mzuri, na seji nguma rake rawuyachurikia.

JEREMIA 49:36

nani nichawetesha mbeo aighu ya Elamu kufuma mbembe rose inya ra mlungunyi. Nichawisasara andu kose, na kula mbari ichavikilwa ni wandu wa Elamu.

JEREMIA 5:27

Nyumba rawo rachua mikalo kara kara na mdiwi wachura nyonyi kikapunyi; kwa chia iyo wawurie wandu wabaa wichue mali;

EZEKIELI 16:7

kuzoghuo sa muwalwa ghwa mbuwenyi.’ Kukazoghua na kuwuya mwai mlacha ughokie; kukawoka kutiva nyodo, na iridia jako kuzoghua, ela kodeeka duu putu.

EZEKIELI 28:9

Welee, kuchachuria kughamba wei ‘Ini ne mlungu,’ iji kuko imbiri ya wabwaghi wako? Oho ko mdamu tu, iji kuko mikonunyi kwa wandu wawuyakushoghonua.

DANIELI 11:4

Ngelo wamanga, wuzuri ghwake ghuchachika na kuwaghika mafungu ana ndoenyi kose, ela ndeghuchaangia kwa kivalwa chake, hata awo wazuri ndewichaabonya nguma sa iro orekoghe naro kwa wuzuri ghwake, kwa kukaia ghuchainjwa na kunekwa wazuri wazima.

DANIELI 4:31

Hata imbiri ya madedo agho kusia momunyi kwa mzuri, lwaka lukacha kufuma mlungunyi lukighamba, “Ee Mzuri Nebukadnezari, kwazerwa huwu: Wuzuri ghwameria kuinjwa kwako.

DANIELI 5:20

Ela iji orekujosereghe ngolonyi kwake, na kukurisha ngolo yake ukikukasa, oreinjiroghe kufuma kifumbinyi chake cha nguma.

DANIELI 7:2

Danieli ukaghamba, “Nerewonieghe mawono ghapo nakio, ngawona mbeo ikiweta mbembe rose inya aighu ya bahari mbaa.

DANIELI 7:6

Nyuma ya agho, ngazighana na kuwona nyamandu zima ifwanane na inge, iko na mawawa ana gha nyonyi mghongonyi kwake; nayo erekoghe na vongo vina, ikanekwa kubonya nguma.

DANIELI 8:22

Iro mbembe inya rerebukieghe wulalo ghwa luja lorechikieghe, ni mawuzuri ana ghichaafumirika kwa iyo mbari; ela agho ndeghichaakaia na ndighi ra wuzuri ghwa imbiri.

DANIELI 8:5

Hata iji nerekoghe ngiririkanya agho mawono, ngawona fwandi ikicha naiseghe kufuma cha magharibi kuseko na kuadada ndoe, nayo erekoghe na lwembe lumweri luko na ndighi ghadi na ghadi ya meso ghake.

DANIELI 8:7

Ngawona ikiitika ija bauru, kwa lubio lubaa na kuchikanya mbembe rake iwi. Ija fwandi ikaisirisha ndighi na kuighusha andonyi. Ikaifasha-fasha na maghu ghake, hata ndekorekoghe na mndungi odima kuvuvua ija bauru kufuma kwa ndighi ra ija fwandi anduangi.

MATHAYO 24:31

nao uchawiduma weke malaika wake na lwaka lubaa lwa tarumbeta, kuwikwanya wasaghulwa wake kufuma mbembe inya ra wurumwengu, kufuma kutua uku hata kutua kuja kwa mlungunyi.

MARKO 13:27

Nao uchawiduma weke malaika uwikwanye andwamweri wasaghulwa wake kufuma mbembe inya ra ndoenyi, kufuma kuzoya kwaro ndoenyi hata kutua kwaro.”

WUKUMBUSO 31:20

Kwa kukaia ngameria kuwingira ijo isanga jinorie, nerelaghirieghe kuwineka weke ndee, na iji waja wikaghuda na kubanda, wichaghaluka na kuitasa milungu mizima; wichanimenya na kujinona ilaghano japo.

WUFUNUO 7:1

Nyuma ya maza iri, nerewonieghe weke malaika bana wiko kimusi a mbembenyi inya ra ndoenyi wikiritangala mbeo inya, ingi isepate kuweta ndoenyi, angu baharinyi, angu aighu ya mudi ghungi.