DANIELI 7:27 - Biblia Ilagho Jiboie Kwa Wandu Wose

²⁷ Niko wuzuri, na nguma rose na wubaa ghose ghwa agho mawuzuri gha ndoenyi ghichaanekwa waeli, awo wandu wa Uo Uko Aighu Na Ndighi, na wuzuri ghwawo ghuchakaia ghwa kala na kala. Wabonyi nguma wose wa ndoenyi wichawidumikia na kuwisikira.’

DANIELI 7:27 ပူးပေါင်းရင်းမြစ်များ

ZABURI 145:13

Wuzuri ghwako ni ghwa kala na kala, na nguma rako radua vivalwa hata vivalwa. BWANA ni mloli kwa malagho ghake ghose, nao ni mucha kwa mabonyo ghake ghose.

ZABURI 22:27

Mbari rose ra wandu richamkumbuka BWANA. Wurumwengunyi kose, wandu wichamghalukia uo, na vinyumba vose va wandu vichamtasa.

ZABURI 72:11

Wazuri wose ndewimghoghomie, na mbari rose rimdumikie.

ZABURI 86:9

Mbari rose ra wandu kuribonyere, richacha na kukughoghomia ee BWANA, naro richajineka wubaa irina jako.

ISAYA 14:2

Na wandu wa iro mbari wichawitesia wandu wa Israeli kuwuya isangenyi jawo, nawo wichakaia andenyi ya isanga werenekeloghe ni Mlungu. Waja wandu wichawuya wazumba wawo wa womi na wa waka; awo wandu weni werewidwaeghe wunyika, niwo weni sena wandu wa Israeli wichaawidwa wunyika na kuwibonyera nguma.

ISAYA 54:3

Angu kuchashabuka nandighi, chia ya mkonu ghwa kiwomi na ghwa kiwaka. Kivalwa chako chichawada isanga jawo jerekailoghe ni iro mbari ra wandu, na mizi yaro ichachua wandu.

ISAYA 9:7

Kubonya nguma kwake kwa sere ndekuchaakaia na kutua kungi; Uchaseria kifumbi cha nguma cha ndee Daudi, ukighumangisha wuzuri ghwake kwa hachi na loli; kufuma idana hata kwa kala na kala. BWANA wa majeshi nuo uchaabonya agha.

DANIELI 2:44

Matuku gha awo wazuri, Mlungu wa mlungunyi uchawika wuzuri ghusechaanonwa jingi, hata nguma raro nderichaasighilwa mndungi. Wuzuri ugho ghuchachikanya-chikanya agha mawuzuri ghose, na kughimeria; nagho ghuchadua kwa kala na kala.

DANIELI 4:34

Nebukadnezari ukaghamba, “Kutua kwa agho matuku, ini Nebukadnezari nerewusireghe meso ghapo cha mlungunyi, nawurilwa ni akili rapo, ngamkasa Uo-Uko-Aighu-Nandighi, ngamkasa na kumneka ishima uo uduagha moyo kwa kala na kala. Uo wadabonya nguma kwa kala na kala, na wuzuri ghwake ghwadakaia vivalwa na vivalwa.

DANIELI 6:26

Ini nafunya momu andenyi ya wuzuri ghwapo, wandu wiobuo na kusughisika imbiri ya Mlungu wa Danieli. Uo ni Mlungu uko moyo, uduagha kwa kala na kala; wuzuri ghwake ndeghuchaanonwa jingi; na nguma rake nderiwadie kutua kungi.

DANIELI 7:14

Ukanekwa kubonya nguma, na wubaa, na wuzuri; eri wandu wa mbari rose, na kichuku na viteto, wipate kumdumikia. Kubonya nguma kwake ni kwa kala na kala, na wuzuri ghwake ndeghuchaanoneka anduangi.

DANIELI 7:18

Ela waeli wa Uo-Uko-Aighu-Nandighi wichapata ugho wuzuri, na kukaia nagho kwa kala na kala.’

DANIELI 7:22

Uo wa matuku mengi ukacha na kutangaza kutanya aighu ya waeli wa Uo-Uko-Aighu-Nandighi. Ngelo ikavika, na waeli wikaghuwusa ugho wuzuri.

OBADIA 1:21

Wasimi wa Jerusalemu wichaikaba Edomu na kuibonyera nguma na BWANA moni uchakaia mzuri.”

ZEKARIA 14:9

Niko BWANA uchawuya mzuri wa ndoenyi kose; kula mundu uchamtasa uo Mlungu, na kummanya kwa ijo irina jimweri.

LUKA 1:33

Nao uchaibonyera nguma nyumba ya Jakobo kwa kala na kala; na wuzuri ghwake ndeghuchaakaia na kutua kungi anduangi.”

JOHANE 12:34

Nao ijo izungu jikamtumbulia, “Isi daghorelwa ni Sharia edu angu Kristo uchadua kwa kala na kala. Yakaia wada oho kughora, ‘Suti Mwana wa Mdamu ujoso aighu?’ Uo Mwana wa Mdamu nani?”

1 WAKORINTHO 15:24

Niko kuja kutua kuchaacha, ingelo Kristo uchaamneka uja Aba Mlungu ugho wuzuri; nyuma ya kunona kula wubaa na nguma na kudima.

WUFUNUO 11:1

Niko nganekwa mrangi ghopima ghuko sa mzata na kuzerwa, “Wuka kuipime iyo Hekalu ya Mlungu na madhabahu; na awo witasagha aho kuwitale.

WUFUNUO 11:15

Niko uo malaika wa mfungade ukaikaba tarumbeta yake, kukakaia na chwaka mbaa mlungunyi rikighamba, “Wuzuri ghwa wurumwengu ghwawuya wuzuri ghwa Bwana odu na ghwa Kristo wake, nao uchabonya nguma kwa kala na kala.”

WUFUNUO 17:14

Nawo wichalwa na uo Mwana wa Ng'ondi chiaimweri na awo wikwanye, werewangiloghe wikasaghulwa, nawo ni waloli; na uo Mwana wa Ng'ondi uchawisima, angu uo ni Bwana wa weke bwana na Mzuri wa wazuri.”

WUFUNUO 19:16

Oko na irina jiandikilo ijohonyi kwake na barenyi kwake, MZURI WA WAZURI, na BWANA WA WEKE BWANA.

WUFUNUO 20:4

Niko ngawona vifumbi va nguma, na awo wereviserieghe, ni awo werenekeloghe nguma retanya. Na wokoni nerewonieghe roho ra wandu weredumbuloghe vongo kwa wundu ghwa kumshuhudia Jesu, na kwa wundu ghwa ilagho ja Mlungu, awo wisereitasireghe iyo nyamandu hata mlimu ghwake; hata ndewerebonyeroghe alama ingi yake chamunyi kwawo, angu mikonunyi kwawo anduangi. Wikakaia moyo, na kubonya nguma andwamweri na Kristo miaka elfu.

WUFUNUO 22:5

Kio ndechichaakaia sena anduangi, hata ndewichaakunda mwengere ghungi ghwa taa, angu ghwa iruwa, angu Bwana Mlungu uchakaia taa yawo; nawo wichabonya nguma kwa kala na kala.